រាជធានីភ្នំពេញ ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មរបស់កម្ពុជា បានពន្យល់ថា ការកំណត់ដំឡើងពន្ធរបស់រដ្ឋបាលអាមេរិក ជាធម្មតាការដំឡើងពន្ធ ធ្វើឱ្យទំនិញឡើងថ្លៃ…
រាជធានីភ្នំពេញ ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មរបស់កម្ពុជា បានពន្យល់ថា ការកំណត់ដំឡើងពន្ធរបស់រដ្ឋបាលអាមេរិក ជាធម្មតាការដំឡើងពន្ធ ធ្វើឱ្យទំនិញឡើងថ្លៃ ដូច្នេះអ្នកប៉ះពាល់ គឺអ្នកបញ្ជាទិញ ដែលជាប្រជាជនអាមេរិក រងប៉ះពាល់ដំបូងគេ បន្ទាប់មកលើកម្ពុជា និងអ្នកវិនិយោគលើវិស័យសំខាន់ៗ ដូចជា ៖ វាយណភណ្ឌ និងសំលៀកបំពាក់ ជាដើម ។
តាមរយៈកិច្ចសម្ភាសន៍ពិសេសជាមួយ ទូរទស្សន៍ជាតិកម្ពុជា ស្ដីពីការដំឡើងពន្ធគយ របស់សហរដ្ឋអាម៉េរិក លើទំនិញនាំចូលពីកម្ពុជា នៅយប់ថ្ងៃទី៣ ខែមេសា ឆ្នាំ២០២៥ ថា តើការដំឡើងពន្ធ៤៩% របស់អាមេរិកលើប្រទេសកម្ពុជា តើប៉ះពាល់កម្ពុជាដែរទេ ? ច្បាស់ណាស់ ការដំឡើងពន្ធនេះ ធ្វើឱ្យប៉ះពាល់ដល់ប្រទេសកម្ពុជា។ ប៉ុន្ដែអ្នកប៉ះពាល់ដំបូងគេ គឺអ្នកបញ្ជាទិញ (អាមេរិក) និងអ្នកផលិត (កម្ពុជា) ។
លោកជំទាវ បានបញ្ជាក់ថា ៖ «ដូច្នេះការដំឡើងពន្ធបន្ថែម គឺមានន័យថា គឺប្រជាជនៅសហរដ្ឋអាមេរិក ដែលលោកជាអ្នកបញ្ជាទិញ នូវផលិតផលពីកម្ពុជានោះ គឺលោកជាអ្នកផលប៉ះពាល់ដំបូង នៅទីនោះ ហើយផលប៉ះពាល់បន្ទាប់ ពិតណាស់នៅលើកម្ពុជា»។
ទោះបីជាយ៉ាងណាក៏ដោយ លោកជំទាវរដ្ឋមន្ដ្រី ក៏បានអំពាវនាវដល់ប្រជាពលរដ្ឋកុំមានការព្រួយបារម្ភ ចំពោះបញ្ហានេះ ហើយការងារនេះ រាជរដ្ឋាភិបាលបានយកចិត្តទុកដាក់ខ្ពស់ ដើម្បីដោះស្រាយបញ្ហាទាំងនេះហើយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញ នូវវិធានការជាបន្ទាន់! ឱ្យឯកឧត្តម អូន ព័ន្ធមុនីរ័ត្ន ដែលជាប្រធានគោលនយោបាយ និងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ដើម្បីប្រមូលធាតុចូលដាក់ជូនសម្ដេច ដើម្បីឆ្លើយតប និងការជំរុញវិស័យសេដ្ឋកិច្ចកម្ពុជា។ ក្នុងនាមជាសេនាធិការរាជរដ្ឋាភិបាល ក្រសួងនឹងខិតខំធ្វើការងារនេះឲ្យបានល្អ ។
សូមជម្រានថា ការលើកឡើងរបស់លោកជំទាវ ចម និម្មល បន្ទាប់ពីរដ្ឋបាលលោក ដូណាល់ ត្រាំ នៅថ្ងៃទី៣ ខែមេសា ឆ្នាំ២០២៥ ត្រូវនឹងថ្ងៃទី២ ខែមេសា នៅសហរដ្ឋអាមេរិក បានសម្រេចកំណត់ពន្ធគយលើទំនិញនាំចូលពីកម្ពុជាប្រមាណ៤៩% ដែលកម្រិតខ្ពស់មួយ ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧% ។
បើតាមលោក ដូណាល់ ត្រាំ ការដំឡើងពន្ធនេះ នឹងចូលជាធរមាន នៅថ្ងៃទី៩ ខែមេសា ឆ្នាំ២០២៥ ខាងមុខនេះ ៕
ចែករំលែកព័តមាននេះ