ខេត្តបាត់ដំបង ៖ ស្ត្រីម្នាក់ស្រែកទ្រហ៊ោយំបោកខ្លួន នៅពេលបាត់កូនប្រុសអាយុជាង៣ឆ្នាំ ហើយកាន់តែរន្ធត់ស្លុតស្មារតី នៅពេលមនុស្សជាច្រើនបានជួយរកឃើញ និងបីសពកូនប្រុសគាត់ឡើងពីក្នុងស្ទឹងសង្កែ ដែលកុមារានោះចុះលេងពេលម្ដាយមិនបានដឹង ហើយលង់ស្លាប់ ខណៈកូនប្រុសបងរបស់គាត់ម្នាក់ទៀត…
ខេត្តបាត់ដំបង ៖ ស្ត្រីម្នាក់ស្រែកទ្រហ៊ោយំបោកខ្លួន នៅពេលបាត់កូនប្រុសអាយុជាង៣ឆ្នាំ ហើយកាន់តែរន្ធត់ស្លុតស្មារតី នៅពេលមនុស្សជាច្រើនបានជួយរកឃើញ និងបីសពកូនប្រុសគាត់ឡើងពីក្នុងស្ទឹងសង្កែ ដែលកុមារានោះចុះលេងពេលម្ដាយមិនបានដឹង ហើយលង់ស្លាប់ ខណៈកូនប្រុសបងរបស់គាត់ម្នាក់ទៀត កំពុងសម្រាកព្យាបាលនៅក្នុងមន្ទីរពេទ្យធំ ក្រោយធ្វើការវះកាត់ ដែលមើលទៅមិនខុសពីរឿង «នាងបដាចារ»ឡើយ ។
ហេតុការណ៍ដ៏សោកសៅនេះបានកើតឡើង កាលពីវេលាម៉ោង៣ និង៣០នាទីរសៀលថ្ងៃទី០២ មេសា នៅក្នុងដងស្ទឹងសង្កែ ត្រង់ចំណុចខាងមុខមន្ទីរពេទ្យបង្អែកខេត្ត (ពេទ្យធំ) ស្ថិតក្នុងភូមិព្រែកមហាទេព សង្កាតស្វាយប៉ោ ក្រុងបាត់ដំបង ។ កុមារារងគ្រោះឈ្មោះ ភឿត រ៉ាយុទ្ធ អាយុ៣ឆ្នាំ៦ខែ រស់នៅស្រុកបវេល ។
បើតាមសាវតារឿង ដែលសមត្ថកិច្ចបានសាកសួរម្ដាយខ្លះៗ គឺកុមារារងគ្រោះបានចុះលេងទឹកស្ទឹងសង្កែ ពេលម្ដាយមិនបានដឹង ពេលដែលគាត់នាំកូនប្រុសរូបនេះទៅអង្គុយហូបបាយនៅលើបង់ថ្មក្បែរមាត់ស្ទឹង។ លុះបាត់កូនរកមិនឃើញទើបផ្អើលឆោឡោរហូតសង្ស័យថា កូនគាត់អាចចុះលេងទឹក ហើយអាចលង់ស្លាប់ទៀតផង ទើបអ្នកនៅជិតនោះជួយចុះរាវក្នុងទឹក ក៏រកឃើញសពកុមារានោះតែម្ដង ។
នៅកន្លែងកើតហេតុ ម្ដាយកុមារារងគ្រោះបានពិពណ៌នាពីដើមចម ដែលនាំឲ្យជួយរឿងអកុសលដ៏សោកសៅនេះថា គាត់បានយកកូនប្រុសម្នាក់ទៀត មកវះកាត់ជំងឺនៅមន្ទីរពេទ្យបង្អែកខេត្ត (ពេទ្យធំ) មួយរយៈហើយ ។ កូនប្រុសបានធូរស្បើយ និងត្រៀមចេញពីមន្ទីរពេទ្យទៅផ្ទះវិញទៀតផង ។
គាត់បានប្រាប់ថា នៅថ្ងៃកើតហេតុ គាត់ក៏បាននាំកូនប្រុសប្អូន (កុមាររងគ្រោះ) ដែលមកជាមួយ ទៅហូបបាយ និងអង្គុយលេងនៅមាត់ស្ទឹងខាងមុខមន្ទីរពេទ្យ ។ គាត់និយាយទៀតថា ពេលកំពុងហូបបាយ គាត់មិនបានចាប់អារម្មណ៍ថា កូនប្រុសគាត់ចុះលេងទឹកស្ទឹងទេ ព្រោះវាបានដើរលេងក្បែរៗនោះ ។
លុះបន្តិចក្រោយមក គាត់មានអារម្មណ៍ថា «បាត់កូន» ហើយក៏ងើបដើររកគ្រប់កន្លែងតាមមាត់ស្ទឹងរកមិនឃើញ សួរនរណាក៏គេមិនដឹង រហូតរត់ទៅរកក្នុងមន្ទីរពេទ្យក៏មិនឃើញទៀត ទើបមានការផ្អើលឆោឡោ ។ ពេលនោះ គាត់ហាក់មានការសង្ស័យថា កូនប្រុសគាត់អាចចុះលេងទឹក ហើយអាចលង់ស្លាប់ទៀតផង ទើបមនុស្សម្នានៅក្បែរនោះជួយចុះរាវរកក្នុងទឹកស្ទឹង រហូតរកឃើញសពកុមារានោះតែម្ដង ។
បើតាមសមត្ថកិច្ចបានប្រាប់ថា បើពិនិត្យលើសាកសពកុមារានោះ មានសភាពរឹងដៃរឹងជើងអស់ទៅហើយ។ គេសន្និដ្ឋានថា សពកុមារារូបនេះ អាចលង់ទឹកស្លាប់ច្រើនម៉ោងហើយ ។ ត្រង់ចំណុចនេះ ស្របទៅនឹងការបំភ្លឺរបស់ម្ដាយដែលបាននិយាយដែរថា នៅម៉ោងប្រហែល១រសៀល នៃថ្ងៃកើតហេតុនោះ គាត់បាននាំកូនប្រុសរូបនេះទៅហូបបាយនៅមាត់ស្ទឹង ។ ដូច្នេះ កូនប្រុសគាត់អាចចុះលេងទឹក ហើយលង់ស្លាប់តាំងពីពេលនោះមក ទើបសាកសពមានស្ថានភាពរឹងបែបនេះ ។
ទោះយ៉ាងណា ជាមួយនឹងភាពសោកសៅនេះ ក្រុមគ្រួសារ រួមជាមួយនឹងមនុស្សជាច្រើនដែលបានប្រឹងប្រែងជួយអន្តរាគមន៍រាវរកសពកុមារាស្ទើរទប់ទឹកភ្នែកមិនបាន ពេលប្រទះឃើញសាកសពកុមារាជាមួយនឹងភាពសោកសង្រែងរបស់ម្ដាយ ដែលស្រែកទ្រហ៊ោយំស្រណោះកូនប្រុសម្នាក់ ត្រូវបាត់បង់ជីវិតត្រឹមមួយប៉ប្រិចភ្នែក ខណៈដែលកូនប្រុសម្នាក់ទៀត សម្រាកព្យាបាលជំងឺក្នុងមន្ទីរពេទ្យ ។
សមត្ថកិច្ចបានបញ្ជាក់ថា ក្រោយរកឃើញសពកូនប្រុស ម្ដាយបានដឹកសពកូនទៅស្រុកកំណើត ដើម្បីធ្វើបុណ្យ ខណៈកូនប្រុសម្នាក់ទៀតដែលសម្រាកព្យាបាលនៅក្នុងមន្ទីរពេទ្យ ទំនងនឹងត្រូវចាកចេញពីមន្ទីរពេទ្យដែរ ព្រោះបើតាមម្ដាយបានប្រាប់ថា កូនប្រុសគាត់ដែលវះកាត់នោះបានធូរស្រាលហើយ ៕
ចែករំលែកព័តមាននេះ