ខេត្តបាត់ដំបង ៖ ព្រានព្រៃម្នាក់ដែលតែងដើរឆ្លុះបរបាញ់សត្វពេលយប់បានស្លាប់យ៉ាងអាណោចអាធ័មនៅលើចង្កេះភ្នំមួយកន្លែង ដោយសារដើរទាក់ខ្សែចរន្តអគ្គិសនីដែលព្រានព្រៃមានអាជីពដូចគ្នាពង្រាយសម្រាប់ឆក់សត្វព្រៃពេលយប់ ។ នេះបើតាមព័ត៌មានបឋមពីអាជ្ញាធរមូលដ្ឋាន ។ ប្រភពបានរាយការណ៍ថា ហេតុការណ៍បានកើតឡើងកាលពីវេលាម៉ោង១១យប់ថ្ងៃទី៣០ មីនា…
ខេត្តបាត់ដំបង ៖ ព្រានព្រៃម្នាក់ដែលតែងដើរឆ្លុះបរបាញ់សត្វពេលយប់បានស្លាប់យ៉ាងអាណោចអាធ័មនៅលើចង្កេះភ្នំមួយកន្លែង ដោយសារដើរទាក់ខ្សែចរន្តអគ្គិសនីដែលព្រានព្រៃមានអាជីពដូចគ្នាពង្រាយសម្រាប់ឆក់សត្វព្រៃពេលយប់ ។ នេះបើតាមព័ត៌មានបឋមពីអាជ្ញាធរមូលដ្ឋាន ។
ប្រភពបានរាយការណ៍ថា ហេតុការណ៍បានកើតឡើងកាលពីវេលាម៉ោង១១យប់ថ្ងៃទី៣០ មីនា នៅត្រង់ចង្កេះ «ភ្នំសំរោង» ស្ថិតក្នុងភូមិសំរោង ឃុំឆ្នាល់មាន់ ស្រុកគាស់ក្រឡ ។ ជនរងគ្រោះឈ្មោះ ឈឹម ទន់ ភេទប្រុស អាយុ៤៥ឆ្នាំ រស់នៅភូមិស្ពាន ឃុំគាស់ក្រឡ ស្រុកគាស់ក្រឡ ។ ប្រភពដដែលបានបញ្ជាក់ថា ជនរងគ្រោះ និងបក្សពួកប៉ុន្មាននាក់ទៀតតែងបបួលគ្នាដើរឆ្លុះសត្វព្រៃពេលយប់ ។ ប៉ុន្តែមិនធ្លាប់ជួបបញ្ហាអ្វីទេ លុះនាំគ្នាដើរឆ្លុះលើកនេះ ស្រាប់តែដើទាក់ខ្សែចរន្តអគ្គិសនីឆក់បណ្ដាលឲ្យស្លាប់នៅនឹងកន្លែងតែម្ដង ។
បើតាមសេចក្ដីរាយការណ៍របស់សមត្ថកិច្ចបាននិយាយថា ខ្សែចរន្តអគ្គិសនីដែលឆក់អ្នកប្រមាញ់សត្វព្រៃរហូតដល់ស្លាប់កណ្ដាលអធ្រាត្រលើចង្កេះភ្នំខាងលើនេះ គឺជាស្នាដៃរបស់ព្រានព្រៃដទៃទៀត ដែលដាក់ពង្រាយខ្សែចរន្តនេះ ដើម្បីឆក់សត្វព្រៃពេលយប់ ។ សេចក្ដីរាយការណ៍បានបញ្ជាក់ដែរថា នៅយប់កើតហេតុ ជនរងគ្រោះមានគ្នា០២នាក់ ដែលជាអ្នកដើរឆ្លុះសត្វដូចគ្នា ។
ពួកគេបាននាំគ្នាដើរឆ្លុះតាមចង្កេះភ្នំសំរោង ដែលជាទីកន្លែងធ្លាប់ដើរឆ្លុះកន្លងមក ស្រាប់តែលើកនេះ ជនរងគ្រោះឈ្មោះ ឈឹម ទន់ បានដើរទាក់ខ្សែចរន្តអគ្គិសនី ដែលព្រានព្រៃផ្សេងទៀតគេដាក់ពង្រាយសម្រាប់«ឆក់សត្វព្រៃ» បណ្ដាលឲ្យឆក់ស្លាប់នៅនឹងកន្លែងតែម្ដង ។
ពាក់ព័ន្ធនឹងការដាក់ពង្រាយខ្សែភ្លើងឆក់សត្វព្រៃ តែបែរជាឆក់មនុស្សស្លាប់នេះ មន្ត្រីម្នាក់បានបង្ហើបឲ្យដឹងថា «គេបានស្គាល់អត្តសញ្ញាណ ម្ចាស់ខ្សែភ្លើងនោះហើយ» តែគេកំពុងស៊ើបអង្កេត និងប្រមូលព័ត៌មានជុំវិញរឿងរ៉ាវនេះបានជុំក្នុងដៃសិន ទើបសមត្ថកិច្ចចាត់វិធានការតាមនីតិវិធីទៅលើម្ចាស់ខ្សែចរន្តអគ្គិសនី ដែលពង្រាយសម្រាប់ឆក់សត្វព្រៃ បែរជាមកឆក់ព្រានព្រៃស្លាប់កណ្ដាលយប់៕
ចែករំលែកព័តមាននេះ