រាជធានីភ្នំពេញ ៖ យោងតាមការផ្សព្វផ្សាយព័ត៌មានលើបណ្តាញសង្គមរបស់មន្ទីរប្រឆាំងបទល្មើសគ្រឿងញៀន នៅថ្ងៃទី៣១ ខែមីនា ឆ្នាំ២០២៥ នេះ បានឲ្យដឹងថា អនុវត្តតាមបទបញ្ជារបស់នាយឧត្តមសេនីយ៍ ស…
រាជធានីភ្នំពេញ ៖ យោងតាមការផ្សព្វផ្សាយព័ត៌មានលើបណ្តាញសង្គមរបស់មន្ទីរប្រឆាំងបទល្មើសគ្រឿងញៀន នៅថ្ងៃទី៣១ ខែមីនា ឆ្នាំ២០២៥ នេះ បានឲ្យដឹងថា អនុវត្តតាមបទបញ្ជារបស់នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ប៊ុន ប៉ាម៉ារីលុច អគ្គស្នងការរងទទួលដឹកនាំកម្លាំងប្រតិបត្តិការស៊ើបអង្កេតបង្ក្រាបបទល្មើសគ្រឿងញៀន និងលោកឧត្តមសេនីយ៍ឯក ព្រុំ សន្ធរ អគ្គស្នងការរងទទួលដឹកនាំការងាររដ្ឋបាល និងបច្ចេកទេស មន្ទីរប្រឆាំងគ្រឿងញៀន និងដឹកនាំបញ្ជាផ្ទាល់ពីលោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន កាលពីថ្ងៃទី២៦ ខែមីនា ឆ្នាំ២០២៥ កម្លាំងជំនាញ (ក១) នៃមន្ទីរប្រឆាំងគ្រឿង ញៀន ដឹកនាំដោយលោកឧត្តមសេនីយ៍ទោ អ៊ិន សុង នាយករងមន្ទីរ និងលោកវរសេនីយ៍ឯក គង់ សីវឌ្ឍនា នាយការិយាល័យក១ សហការជាមួយកម្លាំងជំនាញនៃស្នងការដ្ឋាននគរបាលរាជធានីភ្នំពេញ និងខេត្តព្រះសីហនុ ក្រោមការសម្របសម្រួលពីលោក វង្ស សាវ៉ាត ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងលោក ឆាយ សុត្រា ព្រះរាជអាជ្ញារងនៃអយ្យការអមសាលាដំបូងខេត្តព្រះសីហនុ បានធ្វើការស្រាវជ្រាវតាមជំនាញ រហូតឈានដល់ការបង្ក្រាបក្រុមឧក្រិដ្ឋជន ពាក់ព័ន្ធករណីដឹកជញ្ជូនឆ្លងដែនដោយខុសច្បាប់នូវសារធាតុញៀន នៅក្នុងភូមិសាស្ត្ររាជធានីភ្នំពេញ និងខេត្តព្រះសីហនុ ។
ប្រតិបត្តិការនេះ សម្រេចបានជាលទ្ធផលកម្លាំងជំនាញធ្វើការខ្លួនជនសង្ស័យចំនួន៥នាក់ ក្នុងនោះ មានជនជាតិភូមា២នាក់ និងជនជាតិចិន៣នាក់ ព្រមទាំងរឹបអូសបាននូវថ្នាំញៀនសរុបទម្ងន់ប្រមាណ១០១ គីឡូ៩៥៧.៨៨ ក្រាម ដែលមានប្រភពគ្រឿងញៀននាំមកពីតំបន់ត្រីកោណមាស ហើយបម្រុងលោតឆត្របន្តទៅកាន់ប្រទេសទី៣ តាមលំហសមុទ្រ ។
ក្រោយចាប់ខ្លួនជនសង្ស័យទាំង៥នាក់ និងវត្ថុតាង ត្រូវបានសមត្ថកិច្ចជំនាញនៃមន្ទីរប្រឆាំងគ្រឿង ញៀន កសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញតាមនីតិវិធី ។
ចែករំលែកព័តមាននេះ