រាជធានីភ្នំពេញ ៖ ផ្ទះចំនួន៤ខ្នង រួមទាំងទ្រព្យសម្បត្តិខាងក្នុង ត្រូវបានអគ្គិភ័យបំផ្លាញទាំងស្រុង ខណៈផ្ទះជាច្រើនខ្នងទៀតត្រូវបានរងការឆាបឆេះកម្រិតមធ្យម ជុំវិញករណីអគ្គិភ័យឆេះផ្ទះ នៅសង្កាត់ស្វាយប៉ាក ។ ហេតុការណ៍ខាងលើនេះបានកើតឡើងកាលពីវេលាម៉ោង៨និង៣៥នាទី…
រាជធានីភ្នំពេញ ៖ ផ្ទះចំនួន៤ខ្នង រួមទាំងទ្រព្យសម្បត្តិខាងក្នុង ត្រូវបានអគ្គិភ័យបំផ្លាញទាំងស្រុង ខណៈផ្ទះជាច្រើនខ្នងទៀតត្រូវបានរងការឆាបឆេះកម្រិតមធ្យម ជុំវិញករណីអគ្គិភ័យឆេះផ្ទះ នៅសង្កាត់ស្វាយប៉ាក ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង៣៥នាទី យប់ថ្ងៃទី៣០ ខែមីនា ឆ្នាំ២០២៥ ទីតាំងកើតហេតុ ស្ថិតនៅលើកំណាត់ផ្លូវជាតិលេខ៥ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឮសម្លេងផ្ទុះដូចផាវ មួយសន្ទុះក្រោយមក ស្រាប់តែឃើញមានអណ្តាតភ្លើងពណ៌ក្រហម និងមានផ្សែងខ្លាំងហ៊ុយចេញពីផ្ទះកើតហេតុ ដែលជាប្រភេទផ្ទះឈើលើថ្មក្រោម បង្កជាអគ្គិភ័យឆាបឆេះយ៉ាងសន្ធោសន្ធៅ ។
អ្នកឃើញហេតុការណ៍បានបន្តទៀតថា ភ្លាមៗនោះ អ្នកភូមិបានស្រែកហៅគ្នា ដើម្បីជួយយកទឹកពន្លត់ ប៉ុន្តែអណ្តាតភ្លើងកាន់តែឆេះខ្លាំងឡើង បណ្តាលឱ្យរាលដាលពីផ្ទះមួយ ទៅផ្ទះមួយខ្នងទៀត។ អ្នកភូមិក៏បាននាំគ្នារាយការណ៍ទៅកាន់សមត្ថកិច្ចមូលដ្ឋាន ដើម្បីសុំជំនួយពីរថយន្តពន្លត់អគ្គិភ័យតែម្តង ។
បន្ទាប់ពីទទួលដំណឹងនេះ ការិយាល័យនគរបាលបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ចេញរថយន្តពន្លត់អគ្គិភ័យជាច្រើនគ្រឿង ពីគ្រប់គោលដៅ ទៅកាន់ទីតាំងកើតហេតុ ដើម្បីអន្តរាគមន៍ភ្លាមៗ ។
គួរបញ្ជាក់ថា៖ អគ្គិភ័យខាងលើ បានលេបត្របាក់ផ្ទះចំនួន១ខ្នង រួចបន្តឆាបឆេះផ្ទះចំនួន៣ខ្នងទៀត ទាំងស្រុង បណ្តាលឲ្យខូចខាតទ្រព្យស្ទើរទាំងអស់ ។ ចំណែកអណ្តាតភ្លើង បន្ត ឆេះរាលដាលដល់ ជញ្ជាំងផ្ទះចំនួន០៧ខ្នងទៀត រួមទាំងសម្ភារៈមួយចំនួនធំផងដែរ ។
ករណីនេះ មន្ត្រីជំនាញបានប្រើប្រាស់រថយន្តពន្លត់អគ្គិភ័យសរុប២៣គ្រឿង រួមមានរថយន្តរបស់ការិយាល័យនគរបាលបង្ការពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ និងរថយន្តពន្លត់អគ្គិភ័យដែលចូលរួមសហការ មកពីគោលដៅផ្សេងៗគ្នាផងដែរ ។ ចំពោះមូលហេតុនៃការឆាបឆេះនេះ សមត្ថកិច្ចជំនាញ កំពុងធ្វើការស្រាវជ្រាវ ៕
ចែករំលែកព័តមាននេះ