គ្រោះរញ្ជួយដីថ្ងៃ២៨ មីនា ដ៏ខ្លាំងបានអង្រួនមីយ៉ាន់ម៉ា ថៃ ដោយបន្សល់ទុកនូវគ្រោះមហន្តរាយដ៏រន្ធត់ ។ កម្ពុជាមានសំណាង គ្រាន់តែទទួលញ័រតិចតួចប៉ុណ្ណោះ ។ គ្រោះរញ្ជួយនេះ…
គ្រោះរញ្ជួយដីថ្ងៃ២៨ មីនា ដ៏ខ្លាំងបានអង្រួនមីយ៉ាន់ម៉ា ថៃ ដោយបន្សល់ទុកនូវគ្រោះមហន្តរាយដ៏រន្ធត់ ។ កម្ពុជាមានសំណាង គ្រាន់តែទទួលញ័រតិចតួចប៉ុណ្ណោះ ។ គ្រោះរញ្ជួយនេះ ទោះបីជាវាមិនប៉ះពាល់ដល់កម្ពុជាមែន ប៉ុន្តែក៏ជាសារមួយលើកកម្ពស់ការប្រុងប្រយ័ត្ន និងព្រមានថា កម្ពុជាគ្រោះធម្មជាតិមួយនេះ អាចគំរាមដល់កម្ពុជា ក្នុងអនាគតណាមួយនោះ ដោយតម្រូវអោយមានវិធានការគិតគូរយ:ពេលវែង ដើម្បីបង្ការ និងទប់ទល់គ្រោះរញ្ជួយដីបែបនេះ។
នៅកម្ពុជាមនុស្សម្នានៅតាមអគារខ្ពស់ៗមួយចំនួនបាននាំគ្នារត់ចុះក្រោម នៅពេលដែលពួកគេមានអារម្មណ៍នៃការញ័រំញ្ជួយ ខណៈដែលគ្រោះរញ្ជួញដីកម្រិតប្រមានជា៧,៧ រ៉ិចទ័រអង្រួនមីយ៉ាន់ម៉ា និងថៃ ។
ក្រៅពីការអារម្មណ៍នៃការភ័យខ្លាចកម្ពុជាមិនមានគ្រោះថ្នាក់ធំដុំឡើយ ប៉ុន្តែផ្ទុយមកវិញ ពលរដ្ឋមីយ៉ាន់ម៉ា គិតត្រឹមព្រឹកថ្ងៃអាទិត្យសារព័ត៌មាននានាបានរាយការណ៍ថា គេបានរកឃើញសាកស.ព១.៦០០ នាក់ទៅហើយ ហើយនៅក្នុងនោះនៅបាត់ខ្លួនដែលគេសង្ស័យថា ស្លា.ប់នោះដល់ទៅ ១ម៉ឺននាក់ឯណោះ ។
ដោយឡែក នៅទីក្រុងបាងកករូបភាពបានបង្ហាញនូវទិដ្ឋភាពដ៏រន្ធត់នៃការញ័ររំញ្ជួយនៅនឹងភ្នែកតាមរយៈបណ្តាញសង្គម ហើយគេជឿជាក់ថា មានអគាររាប់រយរងការខូចខាតនៅក្នុងនោះមនុស្សយ៉ាងហោចណាស់១០នាក់ ត្រូវបានគេរកឃើញស្លា.ប់ ហើយមនុស្សជាង១០០ នាក់ទៀត អាចនឹងជាប់នៅក្រោមគំនរអគារកំពុងសាងសង់មួយកន្លែងដែលដួលរលំ ។
អ្នកជំនាញថា ជាមួយនឹងកម្រិត៧,៧ រ៉ិចទ័រ នៅក្នុងជម្រៅ១០គីឡូម៉ែត្រនៅទីក្រុងមេនដាឡេ នៃប្រទេសមីយ៉ាន់ម៉ា ដែលជាស្នូលនៃការរញ្ជួញមកដល់ទីក្រុងបាងកក គឺមានចម្ងាយជាង ១ពាន់គីឡូម៉ែត ពោល គឺវាមានចម្ងាយហួសពីកម្រិតញ័ររញ្ជួយដែលអាចអង្រួនទីក្រុងបាងកក ប៉ុន្តែអ្វីៗបានកើតឡើងរួចទៅហើយ នៅរសៀលថ្ងៃទី២៨ ខែមីនា ឆ្នាំ២០២៥ ។
ស្ថានភាពនៃការគំរាមកំហែងដោយគ្រោះរញ្ជួយដីនៅពេលនេះ ជាការរំលឹកយ៉ាងច្បាស់លាស់អំពីភាពងាយរងគ្រោះ ដែលបណ្តាប្រទេសក្នុងតំបន់អាស៊ីអាគ្នេយ៍ ជាពិសេសគឺ អាស៊ីអគ្នេយ៍ដីគោក ដែលមានកម្ពុជា ថៃ ឡាវ មីយ៉ាន់ម៉ា វៀតណាម ប្រឈមមុខនឹងសកម្មភាពរញ្ជួយដី ។ សម្រាប់ប្រទេសកម្ពុជា ដែលជាប្រទេសមួយដែលមិនដែលមានបទពិសោធន៍នៃការគំរាមកំហែងដោយគ្រោះរញ្ជួយដី គ្រោះមហន្តរាយនេះជាការដាស់តឿន និងជាឱកាសមួយ ដើម្បីវាយតម្លៃឡើងវិញនូវការត្រៀមខ្លួនរបស់ប្រទេសសម្រាប់គ្រោះមហន្តរាយធម្មជាតិបែបនេះ។
ភាពមិនអាចទាយទុកជាមុនបាននៃការញ័ររញ្ជួយដី គឺជាអ្វីដែលធ្វើឱ្យកម្ពុជាអាចមានគ្រោះថ្នាក់ខ្លាំង ។ គ្រោះធម្មជាតិនេះមិនដូចទឹកជំនន់ ដែលជារឿយៗអាចត្រូវបានគេរំពឹងទុកតាមរយៈការព្យាករណ៍អាកាសធាតុ ឬព្យុះដែលអាចតាមដានក្នុងពេលជាក់ស្តែង តែយើងត្រូវតែដឹងថា ការរញ្ជួយដីកើតឡើងដោយគ្មានការព្រមាន ។ អារម្មណ៍នៃភាពមិនអាចទាយទុកជាមុនបាន គឺជាអ្វីដែលប្រទេសកម្ពុជា ត្រូវតែគិតឡើងវិញ ។ ការរញ្ជួយនាពេលថ្មីៗនេះរំលឹកយើងថា គ្មានប្រទេសណាមួយមានសុវត្ថិភាពទាំងស្រុងពីផលប៉ះពាល់នៃការរញ្ជួយដីនោះទេ។
សរុបមកវិញ ប្រទេសកម្ពុជាបានបោះជំហានឆ្ពោះទៅរកការត្រៀមខ្លួនសម្រាប់គ្រោះមហន្តរាយជាច្រើន ប៉ុន្តែការរញ្ជួយដី គឺគ្មាននៅក្នុងផែនការសកម្មភាពរបស់ខ្លួនឡើយ ដូចនេះគ្រោះមហន្នរាយថ្ងៃទី២៨ មីនា គួរតែដើរតួជាកម្លាំងរុញច្រាន ដើម្បីពង្រឹងកិច្ចខិតខំប្រឹងប្រែងទាំងនេះ ។
រដ្ឋាភិបាលគួរតែផ្តល់អាទិភាពដល់ការកសាងហេដ្ឋារចនាសម្ព័ន្ធធន់ ជាពិសេសនៅតំបន់ទីក្រុង ដូចជា រាជធានីភ្នំពេញ ដែលមានដង់ស៊ីតេប្រជាជនខ្ពស់ ។ អគារចាំបាច់ត្រូវសាងសង់ដោយមានវិធានការទប់ទល់នឹងការរញ្ជួយដី ហើយយុទ្ធនាការផ្សព្វផ្សាយការយល់ដឹងជាសាធារណៈត្រូវតែពង្រីក ដើម្បីអប់រំប្រជាពលរដ្ឋអំពីរបៀបឆ្លើយតបក្នុងករណីមានគ្រោះរញ្ជួយដី ។ បន្ថែមពីលើហេដ្ឋារចនាសម្ព័ន្ធ វាក៏មានសារៈសំខាន់ផងដែរក្នុងការពង្រឹងប្រព័ន្ធឆ្លើយតបគ្រោះមហន្តរាយ ៕
ចែករំលែកព័តមាននេះ