ទីក្រុងវ៉ាស៊ីនតោន៖ លោកត្រាំព្រមានថាលោកអាចនឹងប្រើប្រាស់កម្លាំងយោធាដើម្បីចូលកាន់កាប់កោះហ្គ្រីនលេនទាំងបង្ខំបើសិនស្ថានការណ៍ឈានដល់ដំណាក់កាលទុំជោរ។ នេះជាសារនយោបាយថ្មី១ទៀតដែលឆ្លុះបញ្ចាំងអំពីមហិច្ឆតារបស់រដ្ឋាភិបាលលោកត្រាំដែលប្ដេជ្ញាថាត្រូវតែគ្រប់គ្រងកោះដ៏ធំជាងគេនៅលើពិភពលោកនេះឱ្យបានទោះបីនៅក្នុងតម្លៃណាក៏ដោយ។ ម៉្យាងទៀត ការថ្លែងដូច្នេះបន្ទាប់ពីអនុប្រធានាធិបតីអាមេរិកទើបតែទៅពិនិត្យមើលស្ថានការណ៍នៅលើកោះនេះ។
លោកត្រាំថ្លែងប្រាប់ទូរទស្សន៍អឹនប៊ីស៊ី (NBC) នៅថ្ងៃអាទិត្យថា១០០%យើងត្រូវតែយកកោះហ្គ្រីនលេនមកគ្រប់គ្រងឱ្យខាងតែបាន។ លោកថាសម្រាប់ដំណាក់កាលនេះជាឱកាសល្អណាស់ដែលគេគួរតែប្រគល់កោះនេះឱ្យអាមេរិកកាន់កាប់តាមសម្រួល។ ប៉ុន្តែលោកក៏បានដាក់ចេញជម្រើសទាំងអស់នៅលើតុដើម្បីត្រៀមចាត់វិធានការនៅក្នុងករណីចាំបាច់ផងដែរ។
កាលពីថ្ងៃសុក្រ ហ្គ្រីនលេនប្រកាសពីការត្រៀមបង្កើតរដ្ឋាភិបាលចម្រុះដែលចូលរួមដោយគណបក្សនយោបាយជាច្រើន។ កាលពីមុន ពិភពលោកគ្រាន់តែគិតថាលោកត្រាំប្រហែលជានិយាយតែមាត់ទេនៅក្នុងបំណងចង់បានកោះហ្គ្រីនលេន។ ប៉ុន្តែពេលនេះ គេមិនអាចលេងសើចបានទេ។ ប៉ុន្មានអាទិត្យចុងក្រោយនេះ លោកប្រកាសចង់បានកោះនេះកាន់តែខ្លាំង។
លោកថាកោះនេះមានសារៈសំខាន់ណាស់សម្រាប់សន្តិសុខជាតិអាមេរិក។ អាមេរិកត្រូវការកោះនេះដើម្បីពង្រឹងកម្លាំងឈរជើងរបស់ខ្លួននៅតំបន់អាកទិច។ ការថ្លែងរបស់ត្រាំមិនមែនឥតហេតុផលទេ។ នៅពីក្រៅឆាកនយោបាយអាចនឹងមានបញ្ហា ឬការជជែកគ្នាតឹងសរសៃកជាមិនខានទេបានជាលោកហ៊ានព្រមានប្រើកម្លាំងយោធា។ រយៈពេលមួយសប្ដាហ៍ចុងក្រោយនេះ អាមេរិក និងដាណាម៉ាកដែលស្ថិតនៅក្នុងអង្គការណាតូជាមួយគ្នាបានប៉ះទង្គិចគ្នាដោយពាក្យសម្ដីយ៉ាងល្វីងជូរចត់។
អនុប្រធានាធិបតីអាមេរិក លោកជេឌីវេន រិះគន់ថាដាណាម៉ាកដែលជាអាណាព្យាបាលរបស់ហ្គ្រីនលេនបានធ្វើសកម្មភាពតិចតួចណាស់ដើម្បីការពារសនិ្តសុខជាតិរបស់ដែនដីមួយនេះ។ ជាកិច្ចឆ្លើយតប រដ្ឋមន្ត្រីការបរទេសដាណឺម៉ាកបានវាយបកវិញចំពោះលោកវេន។ លោករដ្ឋមន្ត្រីរូបនេះថាដាណឺម៉ាកបានជះលុយរាប់ពាន់លានដុល្លារដើម្បីសន្តិសុខរបស់ហ្គ្រីនលេន។
ឥឡូវនេះ វ៉ាស៊ីនតោនកំពុងត្រៀមប្រើប្រាស់យុទ្ធសាស្ត្រ «ដំបង និងការ៉ុត» ដើម្បីធ្វើយ៉ាងណាគ្រប់គ្រងកោះហ្គ្រីនលេនឱ្យបាន។ ជាដំបូង អាមេរិកចង់ប្រើធម៌ត្រជាក់សិន។ លោកជេឌីវេនថ្លែងថាអាមេរិកមិនចាំបាច់ប្រើយោធាទេបើហ្គ្រីនលេនផ្ដាច់ខ្លួនទាំងស្រុងពីប្រទេសដាណាម៉ាក ហើយយល់ព្រមចុះកិច្ចព្រមព្រៀងប្រគល់ទឹកដីតាមសម្រួលទៅឱ្យអាមេរិកកាន់កាប់។
តាមមើលទៅ ដាណឺម៉ាកមិនទាន់ពន្លែងដៃ ឬមិនទាន់ដាច់ចិត្តពីហ្គ្រីនលេនទេ។ នាប៉ុន្មានថ្ងៃទៀតនេះ នាយករដ្ឋមន្ត្រីដាណឺម៉ាក លោកស្រីមេតេ ហ្វ្រេដេរីកសឹន (Mette Frederiksen) ត្រៀមបំពេញទស្សនកិច្ចនៅកោះនេះដើម្បីពង្រឹងកិច្ចសហប្រតិបត្តិការជាមួយគ្នា។ ផ្ទុយពីទស្សនកិច្ចរបស់លោកវេនដែលចុះទៅសួរសុខទុក្ខទាហានអាមេរិកនៅទីនោះ ថ្នាក់ដឹកនាំដាណឺម៉ាកមានលក្ខណៈផ្លូវការជាង។ លោកស្រីនឹងជួបអ្នកតំណាងរដ្ឋាភិបាលហ្គ្រីនលេន និងប្រជាជនរស់នៅលើកោះនោះ៕
ចែករំលែកព័តមាននេះ