ទីក្រុងគែ៖ ថ្មីៗនេះ ក្រុមហាម៉ាស់ប្រកាសទទួលយកសំណើបទឈប់បាញ់ដែលបង្ហាញជូនដោយអេហ្ស៊ីប និងកាតាក្នុងនាមជាប្រទេសសម្របសម្រួលការចរចា។ ប៉ុន្តែអ៊ីស្រាអែលប្រកាសប្រឆាំងនឹងសំណើនោះ។ អាមេរិកក្នុងនាមជាប្រទេសសម្របសម្រួលមួយផងដែរប្រកាសឈរនៅខាងអ៊ីស្រាអែលយ៉ាងពេញទំហឹង។ បន្ទាប់ពីអ៊ីស្រាអែលផ្ទុះសង្គ្រាមជាថ្មី អេហ្ស៊ីបកាលពីដើមសប្ដាហ៍នេះបានស្នើសុំឱ្យភាគីជម្លោះវិលមករកបទឈប់បាញ់ឡើងវិញ។
គេមិនទាន់ដឹងច្បាស់ថាតើសំណើនេះបានកែសម្រួលពាក្យពេចន៍ឃ្លោងឃ្លាអ្វីខ្លះ ឬក៏ទុកនៅទាំងដុលដដែលមុនពេលថ្នាក់ដឹកនាំក្រុមហាម៉ាស់ លោកខាលីល អាល់ ហាយ៉ា (Khalil al-Hayyah) ប្រកាសថាលោកទទួលយកបទឈប់បាញ់។ កាលពីដើមសប្ដាហ៍នេះ មន្ត្រីរដ្ឋាភិបាលអេហ្ស៊ីបម្នាក់ប្រាប់ឱ្យដឹងពីខ្លឹមសារសំខាន់ៗនៃសំណើនោះ។ លើកនេះ ក្រុមហាម៉ាស់យល់ព្រមដោះលែងចំណាប់ខ្មាំងដែលនៅរស់ចំនួន៥នាក់។ ក្នុងនោះក៏មានជនជាតិអ៊ីស្រាអែលកាត់អាមេរិកាំងម្នាក់ផងដែរ។
ជាថ្នូរត្រឡប់មកវិញ អ៊ីស្រាអែលយល់ព្រមអនុញ្ញាតឱ្យដឹកជំនួយចូលតំបន់ហ្កាហ្សា និងផ្អាកបាញ់គ្នារយៈពេលមួយអាទិត្យ។ ក្រៅពីនេះ អ៊ីស្រាអែលយល់ព្រមដោះលែងអ្នកទោសជនជាតិប៉ាឡេស្ទីនរាប់រយនាក់ពីពន្ធនាគារ។ ខុទ្ទកាល័យរបស់លោកណឺតាន់យ៉ាហ៊ូគ្រាន់តែជំទាស់នឹងសំណើនោះ ប៉ុន្តែមិនបានបរិយាយលម្អិតនោះទេ។
កាលពីជាង១សប្ដាហ៍មុន អ៊ីស្រាអែលចាប់ផ្ដើមវាយប្រហារតំបន់ហ្កាហ្សាជាថ្មីបណ្ដាលឱ្យស្លាប់មនុស្សរាប់រយនាក់។ សេតវិមាននិយាយកាន់ជើងអ៊ីស្រាអែលចំពោះចំណាត់ការនេះ និងដាក់ការស្ដីបន្ទោសទៅលើក្រុមហាម៉ាស់។ សេតវិមានថាមកពីហាម៉ាស់មិនព្រមដោះលែងចំណាប់ខ្មាំង។ ឥឡូវនេះ អ៊ីស្រាអែលមិននិយាយច្រើនទេ។ ខ្លួនត្រូវតែបន្តវាយប្រហារដើម្បីដាក់សម្ពាធរហូតដល់ចំណាប់ខ្មាំងនៅសល់៥៩នាក់វិលត្រឡប់មកវិញទាំងអស់។ ក្នុងនោះគេជឿថាចំណាប់ខ្មាំង២៤នាក់នៅរស់។
អ៊ីស្រាអែលបានទាមទារដាច់ខាតមិនឱ្យហាម៉ាស់វិលទៅកាន់អំណាចនៅហ្កាហ្សាវិញឡើយ។ អ៊ីស្រាអែលចង់ឱ្យហាម៉ាស់កាត់រំសាយអង្គការចាត់តាំងនយោបាយ និងយោធាចោលទាំងស្រុង។ ចំណែកថ្នាក់ដឹកនាំធំៗរបស់ហាម៉ាស់ត្រូវរស់នៅ និរទេសខ្លួននៅប្រទេសដទៃ។ អ៊ីស្រាអែលក៏បន្តវាយលុកកាន់តែខ្លាំងទៅលើតំបន់រ៉ាហ្វាក្បែរព្រំដែនប្រទេសអេហ្ស៊ីបផងដែរ៕
ចែករំលែកព័តមាននេះ