ទីក្រុងយេរូសាឡឹម៖ មន្ត្រីរដ្ឋាភិបាលអ៊ីស្រាអែលថ្លែងថាទៅថ្ងៃអនាគត តំបន់ហ្កាហ្សាមិននៅក្រោមការគ្រប់គ្រងរបស់អ៊ីស្រាអែលទេ ហើយក៏មិនត្រូវអនុញ្ញាតឱ្យក្រុមហាម៉ាស់វិលត្រឡប់មកគ្រប់គ្រងតំបន់នេះវិញដែរ។ ការថ្លែងដូច្នេះនៅពេលអ៊ីស្រាអែលចាប់ផ្ដើមវាយប្រហារជាថ្មីដោយសារបទឈប់បាញ់មិនអាចបន្តសុពលភាពតទៅទៀត (ហាម៉ាស់មិនព្រមដោះលែងចំណាប់ខ្មាំង) និងនៅពេលលោកត្រាំនៅតែចិញ្ចឹមចិត្តចង់យកតំបន់ហ្កាហ្សាធ្វើជារមណីយដ្ឋានលំហែកាយមាត់សមុទ្រ។
មន្ត្រីជាន់ខ្ពស់អ៊ីស្រាអែលម្នាក់ប្រាប់ទស្សនាវដ្ដីញូស្វីក (Newsweek) ថារដ្ឋាភិបាលរបស់ខ្លួនគ្មានផែនការចូលកាន់កាប់តំបន់ហ្កាហ្សាទេ។ សំខាន់ត្រូវខំវាយកម្ចាត់ក្រុមហាម៉ាស់សិន។ រួចហើយនរណាចង់គ្រប់គ្រងតំបន់នេះក៏គ្រប់គ្រងទៅ។ អគ្គកុងស៊ុលអ៊ីស្រាអែលប្រចាំទីក្រុងញូយ៉ក លោកសាច់សា (Tsach Saar) ប្រាប់ថាលោកហ៊ានធានាអះអាងនៅក្នុងរឿងនេះថាយើងមិនចង់រវីរវល់នឹងតំបន់ហ្កាហ្សាតទៅទៀតទេ។ ធ្វើម៉េចឱ្យតែចប់សង្គ្រាមឆាប់ៗទៅនឹងអាលយើងចាកចេញវិញភ្លាម។
ដើម្បីធានាសន្តិសុខរបស់ជនជាតិអ៊ីស្រាអែល និងដើម្បីទប់ស្កាត់មិនឱ្យមានសោកនាដកម្មថ្ងៃទី៧ ខែតុលា ឆ្នាំ២០២៣ យើងត្រូវតែកម្ទេចក្រុមហាម៉ាស់ចោលសិន។ បើដល់ថ្នាក់រលាយបាត់រូបទាំងស្រុង ហោចណាស់ក៏រលាយអង្គការចាត់តាំងយោធា និងនយោបាយរបស់ពួកគេ។ យើងនឹងរួមគ្នាជាមួយក្រុមសម្ព័ន្ធមិត្ត និងប្រទេសជាដៃគូដើម្បីដោះស្រាយបញ្ចប់បញ្ហានេះ។
អគ្គកុងស៊ុលរូបនេះថ្លែងថាអ៊ីស្រាអែលកំពុងសិក្សាជម្រើសមួយចំនួនដើម្បីរៀបចំផែនការអនាគតសម្រាប់តំបន់ហ្កាហ្សា។ ក្នុងនោះក៏រួមទាំងសំណើរបស់អាមេរិកផងដែរ។ លោកត្រាំធ្លាប់ដាក់ជាសំណើថាត្រូវតែរកទីកន្លែងថ្មីសម្រាប់ជនជាតិប៉ាឡេស្ទីន២លាននាក់។ ប្រទេសដែលអាចទទួលយកជនជាតិប៉ាឡេស្ទីនមានដូចជាប្រទេសនៅមជ្ឈិមបូព៌ា ឬប្រទេសនៅអាហ្វ្រិក។
គំនិតរបស់ត្រាំមានទាំងមតិគាំទ្រ និងមតិប្រឆាំង។ បណ្ដាប្រទេសអារ៉ាប់ចេញមុខប្រឆាំងជំទាស់។ ប៉ុន្តែនាយករដ្ឋមន្ត្រីអ៊ីស្រាអែលគាំទ្រគំនិតនេះ។ កាលពីខែកុម្ភៈ នៅសេតវិមាន លោកណឺតាន់យ៉ាហ៊ូចាត់ទុកថានេះគំនិតជាគំនិតល្អកម្ររកបាន។
ដោយសារមានប្រតិកម្មខ្លាំងពេក លោកត្រាំកែសម្រួលផែនការរបស់គាត់បន្តិចវិញ។ គាត់ថាគាត់មិនបណ្ដេញជនជាតិប៉ាឡេស្ទីនទាំងបង្ខំទេ។ ការផ្លាស់ប្ដូរទីលំនៅនេះធ្វើឡើងទៅតាមគោលការណ៍ស្ម័គ្រចិត្ត។ អគ្គកុងស៊ុលអ៊ីស្រាអែលចាត់ទុកថាគំនិតចុងក្រោយនេះមានហេតុផលសមរម្យ៕
ចែករំលែកព័តមាននេះ