ទីក្រុងណៃពីដោ ៖ យ៉ាងហោចណាស់មនុស្ស ១៤៤នាក់បានស្លា.ប់ និងជាង ៧៣០នាក់ បានរងរបួសនៅក្នុងគ្រោះរញ្ជួយដីកម្រិត ៧.៧រិចទ័រ ដែលបានវាយប្រហារប្រទេសមីយ៉ាន់ម៉ា នេះបើយោងតាម…
ទីក្រុងណៃពីដោ ៖ យ៉ាងហោចណាស់មនុស្ស ១៤៤នាក់បានស្លា.ប់ និងជាង ៧៣០នាក់ បានរងរបួសនៅក្នុងគ្រោះរញ្ជួយដីកម្រិត ៧.៧រិចទ័រ ដែលបានវាយប្រហារប្រទេសមីយ៉ាន់ម៉ា នេះបើយោងតាម CNN ។
លោក Min Aung Hlaing បាននិយាយនៅក្នុងសន្ទរកថា តាមទូរទស្សន៍ នៅថ្ងៃសុក្រនេះថា «ខ្ញុំបានទៅមើលទីតាំងមួយចំនួនដោយផ្ទាល់ ដែលរងផលប៉ះពាល់ ដើម្បីវាយតម្លៃពីស្ថានភាព។ ខ្ញុំចង់អំពាវនាវ ឱ្យអ្នកគ្រប់គ្នា ចូលរួម និងគាំទ្របេសកកម្មជួយសង្គ្រោះ ដែលកំពុងបន្ត» ។
លោក Min Aung Hlaing បានបន្តថា មនុស្សយ៉ាងហោចណាស់ ៩៦នាក់បានស្លា.ប់ នៅក្នុងទីក្រុងណៃពីដោ និងរាប់សិបនាក់ទៀត បានស្លា.ប់នៅក្នុងទឹកដីផ្សេងទៀតក្នុងប្រទេសមីយ៉ាន់ម៉ា ហើយយ៉ាងហោចណាស់ មនុស្សចំនួន ៧៣២នាក់ទៀត បានរងរបួស។ លោកបានបន្ថែមថា ៖ «ចំនួនអ្នកស្លា.ប់ ត្រូវបានគេរំពឹងថា នឹងកើនឡើងបន្ថែមទៀត» ។
យោងតាមប្រព័ន្ធជូនដំណឹងជាមុន (GTS) របស់នាយកដ្ឋានឧតុនិយម និងទីភ្នាក់ងារអង្កេតតាមដាន ភូគព្ភសាស្ត្ររបស់សហរដ្ឋអាមេរិក (USGS) បានឱ្យដឹងថា កាលពីវេលាម៉ោង១៣និង២០នាទីរសៀល ថ្ងៃទី២៨ ខែមីនា ឆ្នាំ២០២៥នេះ មានបាតុភូតរញ្ជួយដីកើតឡើង ស្ថិតនៅចម្ងាយ ១៦គីឡូម៉ែត្រ ភាគពាយ័ព្យ នៃទីក្រុងសាឃ្លាំង (Sagaing) នៅក្នុងប្រទេសមីយ៉ាន់ម៉ា ។ ការរញ្ជួយនេះ បានកើតឡើងនៅក្នុងស្រទាប់ស្នូលផែនដី ជម្រៅប្រមាណ ១០គីឡូម៉ែត្រ និងមានឥទ្ធិពលមកស្រទាប់ខាងលើ នៃផែនដីក្នុងកម្រិតរញ្ជួយ ៧,៧ រិចទ័រ ដែលបង្កឱ្យមានផលប៉ះពាល់ដល់ប្រទេសមួយចំនួន រួមមាន ៖ ប្រទេសមីយ៉ាន់ម៉ា បង់ក្លាដែស ឥណ្ឌា ឡាវ ថៃ វៀតណាម និងប្រទេសចិន។ ដោយឡែក ប្រទេសកម្ពុជា ក៏ទទួលរងនូវឥទ្ធិពលនេះផងដែរ តែក្នុងកម្រិតតិចតួចប៉ុណ្ណោះ ៕
ចែករំលែកព័តមាននេះ