នៅកម្ពុជានៅពេលបច្ចុប្បន្ននេះ អ្នកដែលកំពុងតែមានមុខជំនាញ និងរបរមួយដ៏ឯករាជ្យ តាមរយៈការបង្កើតមាតិកា ហើយផ្សព្វផ្សាយនៅលើបណ្តាញសង្គម ដែលភាសាអង់គ្លេសគេនិយមហៅថា Influencer គឺមានកាន់តែច្រើន ប៉ុន្តែប្រាក់ចំណូលរបស់ពួកគេ ប្រហែលជាមិនត្រូវបានគេដឹងទូលំទូលាយឡើយ…
នៅកម្ពុជានៅពេលបច្ចុប្បន្ននេះ អ្នកដែលកំពុងតែមានមុខជំនាញ និងរបរមួយដ៏ឯករាជ្យ តាមរយៈការបង្កើតមាតិកា ហើយផ្សព្វផ្សាយនៅលើបណ្តាញសង្គម ដែលភាសាអង់គ្លេសគេនិយមហៅថា Influencer គឺមានកាន់តែច្រើន ប៉ុន្តែប្រាក់ចំណូលរបស់ពួកគេ ប្រហែលជាមិនត្រូវបានគេដឹងទូលំទូលាយឡើយ ។
បច្ចុប្បន្ននេះ សម្រាប់នៅថៃ គេអាចគ្រប់គ្រងចំណូលរបស់ក្រុមអ្នកដែលមានមុខរបរជា Influencer នេះបានហើយ ដោយសារតែចំណូលរបស់ពួកគេមានការកើនឡើង គួរឲ្យចាប់អារម្មណ៍បែបនេះ ទើបអាជ្ញាធរថៃបានកំពុងតែគិតគូរជំរុញឲ្យក្រុមអ្នកដែលមានមុខរបរនេះ ត្រូវរួមចំណែកបង់ពន្ធជូនរដ្ឋ នៅក្នុងប្រទេសគេហើយ ។
តាមអ្វី ដែលចុះផ្សាយនៅលើសារព័ត៌មាន The Nation បានឲ្យដឹងថា សម្រាប់ក្រុមអ្នក Influencer ដែលមានអ្នកតាមដានពី១Kទៅដល់១០K គេអាចរកចំណូលនៅក្នុងរង្វង់ពី៨០ទៅ១៥០ ដុល្លារនៅក្នុងមួយផុស ដោយឡែកអ្នកដែលមានអ្នកតាមដានពី១០ K ទៅ៥០K គឺអាចរកចំណូលពី១៥០ ដុល្លារទៅ៣០០ដុល្លារ ។ រីឯក្រុម Influencer ដែលមានអ្នកតាមដានប្រមាណជាពី៥០K ទៅ៥០០ K គឺអាចរកប្រាក់ចំណូលបានពី៣០០ដុល្លារទៅ៩០០ដុល្លារ ហើយអ្នកដែលមានអ្នកតាមដានពី៥០០K ទៅដល់១លាន គឺអាចរកចំណូលបានដល់ទៅពី៩០០ ដុល្លារទៅដល់ជិត៣០០០ដុល្លារនៅក្នុងមួយផុស ។
អាស្រ័យថា ស្ថានភាពចំណូលរបស់ពួកគេច្រើនបែបនេះហើយ ទើបអគ្គនាយកដ្ឋានចំណូលថៃ បានចេញសេចក្តីណែនាំមួយទៅដល់ក្រុម អ្នកដែលកំពុងតែរកស៊ីក្នុងវិស័យឌីជីថល ជាពិសេសក្រុមអ្នកលក់រាយតាមអ៊ីនធឺណិត អាជីវកម្មអេឡិចត្រូនិក Influencer លើប្រព័ន្ធផ្សព្វផ្សាយសង្គម អំពីភាពចាំបាច់នៃការបង់ពន្ធ ។
លោក ភិនសៃ សូរ៉ាស្វាឌី (Pinsai Suraswadi) អគ្គនាយកនៃអគ្គនាយកដ្ឋាននាយកដ្ឋានជំនាញនេះ បាននិយាយថា អ្នករកប្រាក់ចំណូលវ័យក្មេងជាច្រើន ពោល គឺនៅក្នុងសេវាកម្ម e-commerce ក្រុមអ្នក Influencerជាដើម សូមគិតគូរចំពោះបញ្ហានេះ ។
លោកបានបន្ថែមថា អគ្គនាយកដ្ឋានមានសិទ្ធិអំណាចក្នុងការធ្វើសវនកម្មលើកំណត់ត្រាចំណូលចំណាយរហូតដល់ប្រាំឆ្នាំចុងក្រោយ ហើយការខកខានក្នុងការបង់ពន្ធអាចនាំឱ្យមានការផាកពិន័យ ។
ដោយឡែក លោកស្រី ស៊ូវីតា ឆារ៉ានវង្ស ( Suvita Charanwong )នាយកប្រតិបត្តិនៃក្រុមហ៊ុន ថែលស្ក(Tellscore) ដែកជាក្រុមហ៊ុនទីភ្នាក់ងារទីផ្សារខាងបង្កើតវេទិកាតាមបណ្តាញសង្គមនៅថៃដែរនោះ ក៏បានគូសបញ្ជាក់អំពីទំហំនៃបញ្ហានេះផងដែរ ។ លោកស្រីបានលើកឡើងថា កម្លាំងការងារឌីជីថលនៅប្រទេសថៃមានប្រហែល ៩ លាននាក់ក្នុងនោះ៧លាននាក់កំពុងធ្វើប្រតិបត្តិការជាអ្នកឯករាជ្យ ហើយលោកស្រីក៏បានឯកភាពចំពោះអ្វី ដែលបានលើកឡើងពីករណី អ្នក Influencer តម្រូវឲ្យបង់ពន្ធផងដែរ ។
នេះគឺជានិន្នាការថ្មីនៅថៃ ប៉ុន្តែនៅកម្ពុជាគេមិនដឹងថា មកដល់ពេលនេះស្ថាប័នជំនាញនៅក្នុងប្រទេសអាចគ្រប់គ្រងរឿងប្រាក់ចំណូលរបស់ក្រុមអ្នកដែលបង្កើតមាតិកាសង្គមពោល គឺក្រុមអ្នកដែល ជា Influencer នេះបាន ឬអត់នៅឡើយ ។ មកដល់ពេលនេះលើបញ្ហាពន្ធក្រុមហ៊ុនប្រព័ន្ធផ្សព្វផ្សាយនានា គឺសុទ្ធតែជាប់កាតព្វកិច្ចត្រូវបង់ពន្ធជាច្រើនប្រភេទ រាប់តាំងពីពន្ធលើប្រាក់ចំណូល ពន្ធលើប្រាក់ចំណាយ ពន្ធលើបុគ្គលិក ហើយក៏ត្រូវជាប់នូវអ្វីដែលគេហៅថា កាតព្វកិច្ច បេឡាជាតិសន្តិសុខសង្គម បន្ថែមមួយទៀតផងដែរ ។
តាមដែលដឹងប្រាក់ចំណូលដែលបណ្តាអ្នកបង្កើតមាតិកានៅលើបណ្តាញសង្គមអាចកំពុងតែទទួលបាននៅពេលនេះអាចមិនដល់ថៃនៅឡើយទេ ប៉ុន្តែទោះបីជាយ៉ាងណាក៏ដោយក៏មិនជាតិចណាស់ណាដែរ ។ ចំណូលដែលពួកគេអាចទទួលបាននៅពេលនេះ គឺអាចមានពីការផុស និងពីការផ្សាយពាណិជ្ជកម្ម ហើយក្រៅពីនោះពួកគេក៏អាចរកចំណូលពីការបង្កើតមាតិកាផ្សព្វផ្សាយពីផលិតផលដែលគេជួលពួកគេឲ្យផលិតបន្ថែមមួយចំណែកទៀត ។
ចំពោះនៅកម្ពុជា Influencer ល្បីៗ មួយចំនួន អាចរកចំណូលបានដល់ទៅ៥០០០ ទៅ១០ ០០០ ដុល្លារក្នុងមួយខែ ។ ប៉ុន្តែទោះបីជាយ៉ាងក្តីចំណូលរបស់ពួកគេ គឺមានភាពមិនទៀងទាត់ទេ ។ យុវជន និងយុវតីមួយចំនួនដែលមានសមត្ថភាពកំពុងតែខិតខំក្នុងការបង្កើតមាតិកាដោយឯករាជ្យ ដើម្បីរកចំណូលជាមួយបណ្តាញសង្គមដូចជា ហ្វេសប៊ុក និងយូធ្យូបជាដើម ៕
ចែករំលែកព័តមាននេះ