រឿងកំណែទម្រង់ គឺជារឿងចាំបាច់ត្រូវតែធ្វើ ប៉ុន្តែអភិក្រមនៃការធ្វើ និងដំណើរការនៃការអនុវត្តក៏ដូចជា វិធីសាស្ត្រនៃការធ្វើមិនអាចដូចគ្នាបានទេ ។ កំណែទម្រង់នៅកម្ពុជា មិនអាចដូចកំណែទម្រង់នៅវៀតណាម ឬក៏នៅឡាវ ឬប្រទេសផ្សេងបានឡើយ…
រឿងកំណែទម្រង់ គឺជារឿងចាំបាច់ត្រូវតែធ្វើ ប៉ុន្តែអភិក្រមនៃការធ្វើ និងដំណើរការនៃការអនុវត្តក៏ដូចជា វិធីសាស្ត្រនៃការធ្វើមិនអាចដូចគ្នាបានទេ ។ កំណែទម្រង់នៅកម្ពុជា មិនអាចដូចកំណែទម្រង់នៅវៀតណាម ឬក៏នៅឡាវ ឬប្រទេសផ្សេងបានឡើយ ។ សូមកុំយកកម្មវិធីកំណែទម្រង់ប្រទេសមួយមកប្រៀបធៀបនឹងប្រទេសមួយពីព្រោះបរិបទសង្គម នយោបាយ សេដ្ឋកិច្ច ក៏ដូចជា វប្បធម៌ គឺវាខុសគ្នា ។
តាំងតែពីខែកុម្ភៈ មកដល់ខែមីនានេះ ប្រធានបទនៃការធ្វើកំណែទម្រង់មានការជជែកគ្នាច្រើនគួរសមដែរ នៅក្នុងសង្គម ជាពិសេស គឺក្រោយពេលដែលសភាវៀតណាមបានសម្រេចអនុម័ត កាលពីថ្ងៃទី១៨ ខែកុម្ភៈ នូវច្បាប់រៀបចំរដ្ឋាភិបាលថ្មីដែលនៅក្នុងនោះវៀតណាមប្រកាសកាត់បន្ថយការចំណាយរបស់រដ្ឋពី១៥ ទៅ២៥% និងកាត់តម្រឹមក្រសួងពី១៨មកនៅត្រឹម១៤ ។
ចំណែកកាលពីថ្ងៃទី២០ ខែមីនា ថ្មីៗនេះឡាវ ដែលគេដឹងមានរបបនយោបាយស្រដៀងគ្នានឹងវៀតណាមក៏ត្រូវបានរដ្ឋសភាអនុម័តកាត់បន្ថយក្រសួងពី១៧ មកនៅត្រឹម១៣ផងដែរ ។ រឿងនេះ គឺជារឿងនៅប្រទេសវៀតណាម និងឡាវ មិនអាចយកមកពាក់ព័ន្ធនឹងកម្ពុជាបានឡើយ ដោយសារកម្ពុជា និងប្រទេសទាំងពីរ ទោះបីជាមានភូមិផងរបងជាមួយគ្នា ហើយក៏មានទំនាកទំនង និងភាតរភាពប្រទាក់ក្រឡាគ្នាច្រើនក៏ពិតមែន ប៉ុន្តែកម្ពុជាមានស្ថានភាពនយោបាយ សង្គម និងសេដ្ឋកិច្ចខុសពីប្រទេសទាំងពីរ ។
ពាក់ព័ន្ធនឹងបញ្ហានេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានគូសបញ្ជាក់យ៉ាងច្បាស់លាស់រួចហើយ កាលពីថ្ងៃទី២០ ខែមីនា ដដែល នៅពេលដែលបានចូលរួមបិទសន្និបាតក្រសួងមុខងារសាធារណៈ ។ សម្តេចមហាបវរធិបតី បានបញ្ជាក់យ៉ាងច្បាស់ថា កំណែទម្រង់ គឺចាំបាច់ណាស់ ដែលកម្ពុជាត្រូវតែធ្វើដោយថែមទាំងបញ្ជាក់ និងសង្កត់អត្ថន័យថា កំណែទម្រង់ គឺរស់ហើយ បើមិនកំណែទម្រង់ គឺស្លា.ប់ ប៉ុន្តែកម្ពុជាមានអភិក្រមនៃការធ្វើកំណែទម្រង់តាមបរិបទរបស់កម្ពុជាផ្ទាល់ ។ សម្តេចមហាធិបតី នៅពេលនោះបានមានប្រសាសន៍ថា ប្រទេសជាច្រើនជុំវិញពិភពលោកបានបន្តធ្វើកំណែទម្រង់វិស័យសាធារណៈដោយជ្រើសរើសអភិក្រមបង្រួម ដើម្បីពង្រឹង ប៉ុន្តែកម្ពុជាបានជ្រើសរើសផ្លូវផ្សេង ។
សម្តេចធិបតី បានលើកឡើងថា នៅពេលនេះសហរដ្ឋអាមេរិក ចក្រភពអង់គ្លេស ប៉ាគីស្ថាន ម៉ាឡេស៊ី វៀតណាម និងអាហ្សង់ទីនជាដើម បានអនុវត្តកំណែទម្រង់វិស័យសាធារណៈដោយបង្រួមដើម្បីពង្រឹង ប៉ុន្តែកម្ពុជាអនុវត្តតាមអភិក្រមនោះទេ គឺកម្ពុជាមានអភិក្រមផ្ទាល់ ដោយអនុវត្តតាមវិធីសាស្ត្រ «ពង្រឹងជាជាងពង្រីក» ។
បច្ចុប្បន្ននេះ ប្រទេសកម្ពុជាមានក្រសួង និងរដ្ឋលេខាធិការដ្ឋានចំនួន៣០ ដែលមានមន្ត្រីរាជការសរុបចំនួន២៣២.០៣៤នាក់ ក្នុងនោះស្រី ៩៦.៩៦៩នាក់ ។ នៅក្នុងស្ថានភាពបែបនេះ សម្តេចធិបតីបានសង្កត់ធ្ងន់ថា កម្ពុជាកំពុងតែស្ថិតនៅក្នុងស្ថានភាពលើសមន្ត្រីហើយក៏ខ្វះមន្ត្រី ពោល គឺកន្លែងខ្លះមានមន្ត្រីច្រើនគ្នា ប៉ុន្តែខ្វះមន្ត្រីជំនាញ ដូច្នេះហើយទើបរាជរដ្ឋាភិបាល ផ្អាកការជ្រើសរើសមន្ត្រីរាជការថ្មី ហើយតម្រូវឲ្យស្ថាប័ននានា ធ្វើការវិភាគមុខងារមន្ត្រី ដើម្បីពិនិត្យគុណវឌ្ឍន៍ និងការទទួលខុសត្រូវ ហើយលើកទឹកចិត្តឲ្យមន្ត្រីធ្វើការឲ្យត្រូវនឹងសមត្ថភាពព្រមទាំងជំនាញ ។
នៅក្នុងឱកាសដដែលនោះ សម្តេចមហាបវរធិបតី ក៏បានប្រកាសជា ចំហថា កម្ពុជានឹងមិនធ្វើការកំណែទម្រង់តាមរយៈរូបភាពបង្រួមក្រសួង ឬកាត់បន្ថយបុគ្គលិកដូចជា ប្រទេសមួយចំនួនបានកំពុងតែធ្វើនោះឡើយ ។
យោងតាមប្រព័ន្ធផ្សព្វផ្សាយវៀតណាម សភាវៀតណាម បានអនុម័តវិសោធនកម្មច្បាប់ស្តីពីការរៀបចំរដ្ឋាភិបាលថ្មីដោយកាត់បន្ថយក្រសួងចំនួន៤ ដើម្បីជួយសន្សំថវិការដ្ឋ ដោយក្នុងនោះប៉ុស្តិ៍ទូរទស្សន៍រដ្ឋចំនួន៥ និងក្រសួង៤ទៀតនឹងត្រូវច្របាច់បញ្ចូលគ្នាជាមួយនឹងក្រសួងដទៃទៀត ។
នៅវៀតណាម នៅពេលនេះក្រសួងផែនការ និងវិនិយោគ ត្រូវបានច្របាច់ចូលជាមួយក្រសួងហិរញ្ញវត្ថុ ហើយក្រសួងដឹកជញ្ជូន និងក្រសួងសំណង់នឹងត្រូវបញ្ចូលគ្នា ។ ក្រសួងធនធានធម្មជាតិ និងបរិស្ថាន និងក្រសួងកសិកម្ម នឹងត្រូវច្របាច់បញ្ចូលគ្នាផងដែរ ។ ការរៀបចំរចនាសម្ព័ន្ធក្រសួងឡើងវិញរបស់វៀតណាមនឹងប៉ះពាល់ដល់ការងារមន្ត្រីរដ្ឋចំនួន ១០ម៉ឺននាក់ ដោយថ្នាក់ដឹកនាំរដ្ឋាភិបាលមានសមាជិក២៥រូប គឺនាយករដ្ឋមន្ត្រីមួយរូប ឧបនាយករដ្ឋមន្ត្រី៧រូប រដ្ឋមន្ត្រី១៤រូប និងប្រធានស្ថាប័នថ្នាក់រដ្ឋមន្ត្រី៣រូប ។
ក្រៅពីនេះវៀតណាមក៏កំពុងតែសិក្សារៀបចំកាត់បន្ថយរដ្ឋបាលកម្រិតខេត្ត៥០ភាគរយដើម្បីរុញរដ្ឋាភិបាលកាន់តែជិតស្និទ្ធជាមួយប្រជាជន សម្រួលប្រតិបត្តិការ និងកែលម្អសេវាសាធារណៈ។ ដោយឡែកនៅឡាវឯណោះវិញសភា បានគាំទ្រជាឯកច្ឆ័ន្ទលើផែនការ ដែលកាត់បន្ថយចំនួនក្រសួងពី១៧ មកនៅត្រឹម១៣ តាមសំណើរបស់នាយករដ្ឋមន្ត្រី ស៊ុនសៃ ស៊ីផាន់ដន (Sonexay Siphandone)។
ក្រោមរចនាសម្ព័ន្ធថ្មី ក្រសួងផែនការ និងវិនិយោគ ត្រូវបានបញ្ចូលគ្នាជាមួយក្រសួងហិរញ្ញវត្ថុ ដោយរក្សាឈ្មោះក្រសួងហិរញ្ញវត្ថុ ។ ដោយឡែក ក្រសួងថាមពល និងរ៉ែ ត្រូវបានរួមបញ្ចូលគ្នាជាមួយក្រសួងឧស្សាហកម្ម និងពាណិជ្ជកម្ម ដែលនឹងបន្តប្រតិបត្តិការក្រោមឈ្មោះដដែល ។ រីឯក្រសួងធនធានធម្មជាតិ និងបរិស្ថាន ត្រូវបានបញ្ចូលគ្នាជាមួយក្រសួងកសិកម្ម និងរុក្ខាប្រមាញ់ ហើយអង្គភាពថ្មីនេះត្រូវបានគេហៅថា ក្រសួងកសិកម្ម និងបរិស្ថាន ។
ក្រៅពីនោះ ក្រសួងមហាផ្ទៃត្រូវបានរំលាយ ហើយអង្គភាពនានានៅក្នុងក្រសួងនេះ ត្រូវបានបែងចែកទៅតាមអង្គភាពផ្សេងៗ ដោយអង្គភាពដែលនៅសល់ខ្លះ ត្រូវបានដាក់នៅក្រោមគណៈកម្មាធិការបុគ្គលិក និងនៅក្រោម គណៈកម្មាធិការមជ្ឈិមបក្ស ខណៈដែលមុខងារអភិបាលកិច្ច និងរដ្ឋបាលដែនដី ត្រូវបានផ្ទេរទៅនៅក្រោមការិយាល័យនាយករដ្ឋមន្ត្រី និងក្រសួងពាក់ព័ន្ធផ្សេងទៀត ។
លើសពីនេះ ក្រសួងព័ត៌មាន វប្បធម៌ និងទេសចរណ៍ត្រូវបានរៀបចំឡើងវិញ ដោយវិស័យព័ត៌មានឥឡូវនេះត្រូវបានគ្រប់គ្រងដោយក្រុមប្រឹក្សាឃោសនា និងបណ្តុះបណ្តាលរបស់គណៈកម្មាធិការមជ្ឈិមបក្ស ហើយក្រសួងត្រូវប្តូរឈ្មោះជាក្រសួងវប្បធម៌ និងទេសចរណ៍ ។
សរុបទៅការធ្វើកំណែទម្រង់ គឺជារឿងចាំបាច់ដែលកម្ពុជាត្រូវតែធ្វើ ប៉ុន្តែដើម្បីស្ថិរភាពសេដ្ឋកិច្ច សង្គម និងនយោបាយ ជាពិសេស គឺធានាបាននូវសន្តិភាព និងការអភិវឌ្ឍ ប្រកបដោយចិរភាពការកំណត់យកអភិរក្រមនៃការអនុវត្តកម្មវិធីកំណែទម្រង់ គឺកម្ពុជាគួរតែអនុវត្តតាមគន្លង និងបទពិសោធន៍ ជាពិសេស គឺយន្តការ និងបែបបទនៃការធ្វើរបស់ខ្លួន ។ នៅវៀតណាម នៅឡាវ គេមានបរិបទសង្គម នយោបាយ និងសេដ្ឋកិច្ចផ្សេងគេធ្វើតាមបែបរបស់គេ ប៉ុន្តែយើងក៏មានរបស់យើង ដូច្នេះយើងគួរតែពង្រឹង និងអនុវត្តតាមវិធីរបស់ខ្លួន ប៉ុន្តែដាច់ខាតគ្រប់គ្នាត្រូវចូលរួម ហើយការវះកាត់ គឺចាំបាច់ត្រូវតែធ្វើផងដែរ ៕
ចែករំលែកព័តមាននេះ