ទីក្រុងវ៉ាស៊ីនតោន៖ លោកត្រាំហាក់ដូចជាទទួលស្គាល់ថាលោកពូទីនមិនមែនងាយស្រួលនិយាយគ្នាប៉ុន្មានទេ ហើយហាក់ដូចជាចូលចិត្តលេងខិតលើ ឬដើរខ្សែលើ។ អ្វីដែលមិនចំណេញ លោកពូទីនមិនយល់ព្រមទេនាំឱ្យខាតប្រយោជន៍នយោបាយរបស់គាត់។ ថ្មីៗនេះ លោកត្រាំព្រលយពាក្យថា «លោកពូទីនអាចនឹងបង្អែបង្អង់នៅក្នុងការចរចាគ្នា។ លោកហាក់ដូចជាមិនទាន់ចង់ទទួលយកបទឈប់បាញ់ដ៏ពេញលេញមួយនៅក្នុងពេលឆាប់ៗនេះទេ»។
លោកថ្លែងដូច្នេះបន្ទាប់ពីទីក្រុងវ៉ាស៊ីនតោនប្រកាសថារុស្ស៊ី និងអ៊ុយក្រែនយល់ព្រមទទួលយកបទឈប់បាញ់នៅសមុទ្រខ្មៅដើម្បីអនុញ្ញាតឱ្យធ្វើពាណិជ្ជកម្មដូចធម្មតាឡើងវិញ។ កាលពីពេលកន្លងមក លោកត្រាំចោទថាអ៊ុយក្រែនមិនទាន់ត្រៀមខ្លួនទទួលយកសន្តិភាពនៅឡើយទេ។ ប៉ុន្តែលោកហ្សេឡិនស្គីប្រកែកជាហូរហែថាមិនអីចឹងទេ លោកចង់បានសន្តិភាពណាស់។
លោកហ្សេឡិនស្គីចោទថារុស្ស៊ីទៅវិញទេដែលមិនចង់បានសន្តិភាព។ លោកចោទថារុស្ស៊ីចង់ពន្យារពេលចរចាគ្នា។ កាលពីយប់មិញ ត្រាំជឿជាក់ថារុស្ស៊ីចង់បញ្ចប់សង្គ្រាមដែលអូសបន្លាយពេលជាង៣ឆ្នាំមកហើយ។ គ្រាន់តែថារុស្ស៊ីចង់យកជើងរាទឹកបន្តិចសិន។ «សង្គ្រាមនេះខ្ញុំបានធ្វើជាច្រើនឆ្នាំមកហើយ។ ខ្ញុំមិនទាន់ចង់ចុះហត្ថលេខាលើកិច្ចព្រមព្រៀងបញ្ចប់សង្គ្រាមនៅពេលឆាប់ៗនេះទេ។ ខ្ញុំចង់លេងល្បែងសង្គ្រាមនេះជាបន្តទៀតសិន។ ប៉ុន្តែខ្ញុំក៏មិនចង់ធ្វើបែបនេះដែរ»។
កាលពីដើមខែមីនា អ៊ុយក្រែនឯកភាពទទួលយកជាឯកតោភាគីទុកជាមុននូវសំណើឈប់បាញ់រយៈពេល៣០ថ្ងៃ ជាប្រភេទបទឈប់បាញ់ដ៏ពេញលេញដែលស្នើឡើងដោយលោកត្រាំ។ តាមពិត ប្រភពខ្លះថារុស្ស៊ី និងអាមេរិកបានដឹងខ្លឹមសារត្រួសៗនៃសំណើនោះតាំងពីយូរមកហើយ។ ពោលគឺពួកគេបានបញ្ជូនសេចក្ដីព្រាងឱ្យគ្នាមើល និងបានពិភាក្សាគ្នាជាហូរហែ។
ប៉ុន្តែនៅទីបំផុត លោកពូទីនច្រានចោលសំណើនោះតាមភាសាការទូត។ លោកគាំទ្រចំណុចសំខាន់ៗជាគោលនៃសំណើនេះ ប៉ុន្តែលោកសូមឱ្យសរសេរឡើងវិញឱ្យបានពិស្ដារជាងនេះ។ លោកហ្សេឡិនស្គីយល់ថាលោកពូទីនត្រៀមខ្លួនបដិសេធសំណើនេះតាំងពីដំបូងទី។ គ្រាន់តែថាគាត់អៀនមាត់ មិនហ៊ានបដិសេធដោយត្រង់ៗនៅចំពោះមុខលោកត្រាំតែប៉ុណ្ណោះ។
ក្រោយមកនៅក្នុងការសន្ទនាគ្នាតាមទូរស័ព្ទ លោកពូទីនយល់ព្រមផ្អាកវាយប្រហារទៅលើទីតាំងផលិតថាមពល និងហេដ្ឋារចនាសម្ព័ន្ធ។ ថាមិនទាន់រួចពីមាត់ផង អ៊ុយក្រែន និងរុស្ស៊ីវាយប្រហារទីតាំងទាំងនោះ។ ឥឡូវនេះ ក្រោយការជួបគ្នានៅអារ៉ាប៊ីសាអូឌីត រុស្ស៊ី និងអ៊ុយក្រែនឯកភាពគ្នាមែនទែនហើយថាត្រូវតែផ្អាកបាញ់គ្នានៅសមុទ្រខ្មៅ។ ជាពិសេស ហាមបន្លំប្រើនាវាដឹកទំនិញសម្រាប់បម្រើក្នុងវិស័យយោធា។ អាមេរិក និងអ៊ុយក្រែនក៏បានព្រមព្រៀងគ្នាដាច់ដោយឡែក១ទៀតផងដែរ។
ប៉ុន្តែកិច្ចព្រមព្រៀងនេះត្រូវជួបឧបសគ្គដោយសារការចងផ្អោបលក្ខខណ្ឌទាមទារពីទីក្រុងម៉ូស្គូ។ នៅក្នុងសេចក្ដីថ្លែងការណ៍របស់ខ្លួនថ្ងៃនេះវិមានក្រឹមឡាំងបញ្ជាក់ថាខ្លួននឹងអនុវត្តតាមកិច្ចព្រមព្រៀងនៅសមុទ្រខ្មៅលុះត្រាតែអាមេរិកឈប់ដាក់ទណ្ឌកម្មទៅលើការនាំចេញជីកសិកម្ម និងកសិផល ហើយត្រូវអនុញ្ញាតឱ្យរុស្ស៊ីប្រើប្រាសកំពង់ផែ និងប្រព័ន្ធទូទាត់សាច់ប្រាក់។
លោកហ្សេឡិនស្គីថ្លែងថាយើងចាំមើលសកម្មភាពរបស់រុស្ស៊ីទាំងអស់គ្នានារយៈពេលប៉ុន្មានថ្ងៃទៅមុខទៀត។ លោកថារុស្ស៊ី អាចបញ្ចេញកាឡាសាឱ្យយើងឃើញច្រើនណាស់ ទោះបីមិនទាំងអស់ក៏ដោយ។ លោកអរគុណអាមេរិកដែលខិតខំសម្របសម្រួលឱ្យមានកិច្ចព្រមព្រៀងនេះ។ ប៉ុន្តែលោកថាអ៊ុយក្រែនមិនទាន់ជឿទុកចិត្តរុស្ស៊ីទេ។ រុស្ស៊ីអាចនឹងមិនអនុវត្តឱ្យបានត្រឹមត្រូវទៅតាមកិច្ចព្រមព្រៀងនេះឡើយ។
ឥឡូវនេះ កុំថាឡើយដល់ទៅកិច្ចព្រមព្រៀងសន្តិភាពដើម្បីបញ្ចប់សង្គ្រាមអ៊ុយក្រែនជាស្ថាពរ សូម្បីតែបទឈប់បាញ់ដ៏ពេញលេញមួយត្រឹមតែរយៈពេល៣០ថ្ងៃក៏មិនទាន់ដឹងថាអាចសម្រេចបាន ឬអត់ផងទេ។ ក្រុមអ្នកចរចារបស់អាមេរិកកំពុងថ្លឹងថ្លែងមើលលក្ខខណ្ឌដែលទាមទារដោយភាគីទាំង២ អ៊ុយក្រែន និងរុស្ស៊ី។ ប្រភពខ្លះថានោះជាលក្ខខណ្ឌដ៏ពិបាកៗដែលមិនងាយដោះស្រាយទាល់តែសោះ៕
ចែករំលែកព័តមាននេះ