ខេត្តកណ្តាល ៖ បុណ្យប្រពៃណីជាតិ បានខិតចូលមកដល់ក្នុងនោះ អាជ្ញាធរខេត្តកណ្ដាលកំពុងតែពន្លឿនក្នុងការរៀបចំតុបតែងគ្រឿងលម្អផ្សេងៗ នៅតាមបណ្ដោយនឹងដងទន្លេ ដើម្បីទទួលស្វាគមន៍បងប្អូនប្រជាពលរដ្ឋមកដើរលេងកម្សាន្ត ក្នុងការប្រារព្ធកម្មវិធីសង្ក្រាន្ត ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ។…
ខេត្តកណ្តាល ៖ បុណ្យប្រពៃណីជាតិ បានខិតចូលមកដល់ក្នុងនោះ អាជ្ញាធរខេត្តកណ្ដាលកំពុងតែពន្លឿនក្នុងការរៀបចំតុបតែងគ្រឿងលម្អផ្សេងៗ នៅតាមបណ្ដោយនឹងដងទន្លេ ដើម្បីទទួលស្វាគមន៍បងប្អូនប្រជាពលរដ្ឋមកដើរលេងកម្សាន្ត ក្នុងការប្រារព្ធកម្មវិធីសង្ក្រាន្ត ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ។
ជាក់ស្ដែងនៅថ្ងៃទី២៦ ខែមីនា ឆ្នាំ២០២៥នេះ អាជ្ញាធរកំពុងរៀបចំតុបតែង លាបថ្នាំកែលម្អចិញ្ចើមផ្លូវ ដើមឈើតាមដងផ្លូវ និងសម្អាត រក្សាអនាម័យ បរិស្ថាន កែលម្អសោភណភាព លាបរបងផ្ទះ របងវត្ត សាលារៀន និងគ្រឹះស្ថានសាធារណៈនានា រួមជាមួយការរៀបចំកែលម្អ សួនច្បារ បង្គន់អនាម័យចល័ត និងថង់សំរាមគ្រប់ទីតាំងកម្សាន្តផងដែរ ។
អ្នកស្រី អៀង ម៉ាឡែន ប្រជាពលរដ្ឋរស់នៅក្រុងតាខ្មៅ បានលើកឡើងថា ពួកគាត់មានអារម្មណ៍ត្រេកអរ សប្បាយចិត្តនៅពេលដែលឃើញមានអាជ្ញាធរយកចិត្តទុកដាក់ ក្នុងការរៀបចំពិធីសង្ក្រាន្តខេត្តកណ្តាល ដែលជាការទាក់ទាញភ្ញៀវទេសចរជាតិ និងអន្តរជាតិ ក្នុងការចូលរួមទស្សនា កម្មវិធីខាងលើនេះ ។
ពលរដ្ឋ បន្តលើកឡើងថា ជារៀងរាល់ឆ្នាំ ពួកតែងតែសង្កេតឃើញ មានប្រជាពលរដ្ឋបាននាំគ្នាលេងល្បែងប្រជាប្រិយខ្មែរ ដូចជា ៖ ចោលឈូង, បោះអង្គញ់, វាយក្អម, ចាប់កូនខ្លែង, លាក់កន្សែង, ទាញព្រ័ត្រ, ពង្រាត់កូនក្រមុំ, ដណ្តើមស្លឹកឈើ, លោតប៉ាវ ហើយពួកគាត់ជឿជាក់ថាឆ្នាំនេះ និងមានភ្ញៀវទេសចរណ៍ជាតិ អន្តរជាតិ មកលេងកាន់តែច្រើនជាឆ្នាំមុន ។
លោក គ្រុយ ម៉ាឡែន អភិបាលរងខេត្តកណ្ដាល និងជាប្រធានអនុគណៈកម្មការឃោសនាផ្សព្វផ្សាយ អនាម័យ និងបរិស្ថាន នៃគណៈកម្មការរៀបចំ សង្ក្រាន្តខេត្តកណ្តាល បានដឹកនាំកិច្ចប្រជុំឃោសនាផ្សព្វផ្សាយអំពីព្រឹត្តិការណ៍ ពិធីបុណ្យសង្ក្រាន្តខេត្តកណ្តាល អបអរពិធីបុណ្យចូលឆ្នាំថ្មី ប្រពៃណីជាតិ ផ្លាស់ពីឆ្នាំរោង ចូលឆ្នាំម្សាញ់ ព.ស.២៥៦៩ គ.ស.២០២៥ នៅក្រុងតាខ្មៅ ប្រារព្ធធ្វើឡើងនៅសួនច្បារមាត់ទន្លេបាសាក់ ក្រុងតាខ្មៅ មានរយៈពេល ០៣ថ្ងៃ គឺចាប់ពីថ្ងៃទី១៤-១៥-១៦ ខែមេសា ឆ្នាំ២០២៥ ខាងមុខនេះ ។
ជាមួយនឹងការរៀបចំព្រឹត្តិការណ៍ សង្ក្រានខេត្តកណ្តាល បាននឹងកំពុងរៀបចំ តុបតែង កន្លែងកម្សាន្តរួមទាំងមានការលេងល្បែងប្រជាប្រិយជាច្រើនក្នុងក្រុងតាខ្មៅ ដើម្បីត្រៀមទទួលភ្ញៀវទេសចរជាតិ អន្តរជាតិមកទស្សនាកម្សាន្ត ។
លោកអភិបាលរងខេត្តកណ្តាល បានសំណូមពរទៅដល់ប្រជាពលរដ្ឋក្នុងស្រុក ត្រូវចូលរួមជួយផ្សព្វផ្សាយបន្ត ដើម្បីអាចទាក់ទាញភ្ញៀវទេសចរណ៍ជាតិ នឹងអន្តរជាតិ មកលេងកម្សាន្ត រយៈពេល០៣ថ្ងៃ ដែលរដ្ឋបាលខេត្តកណ្តាល បានរៀបចំនេះ អោយបានច្រើនកុះករ ៕
ចែករំលែកព័តមាននេះ