រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានសម្តែងការហួសចិត្ត និងឆ្លើយតបក្រុមអ្នកមតិរិះគន់ថា គ្មានទាហានណាម្នាក់ដើរល្បាតស្ពាយតុតាមខ្លួននោះទេ ហើយអ្នកដែលបារម្ភអាចមកខ្មែរខ្ញុំនឹងជូនទៅមើលផ្ទាល់តែម្តង ។…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានសម្តែងការហួសចិត្ត និងឆ្លើយតបក្រុមអ្នកមតិរិះគន់ថា គ្មានទាហានណាម្នាក់ដើរល្បាតស្ពាយតុតាមខ្លួននោះទេ ហើយអ្នកដែលបារម្ភអាចមកខ្មែរខ្ញុំនឹងជូនទៅមើលផ្ទាល់តែម្តង ។
ការលើកឡើងរបស់សម្តេចមហាបវរធិបតីខាងលើនេះធ្វើឡើង បន្ទាប់ពីសម្តេចបានឃើញអ្នកលេងបណ្តាញសង្គមដែលកំពុងរស់នៅបរទេស និងតែងតែយកការរិះគន់ ឬជេប្រមាថសម្តេចធ្វើជាអាជីវកម្មបានយករូបភាព ទាហានជួរមុខតាមបន្ទាត់ព្រំដែន ដែលកំពុងចុះល្បាតទទួលទានអាហារក្រោមដើមឈើ លើស្មៅ ឬលើដី នៅលើបណ្តាញសង្គម ដោយភ្ជាប់នូវមតិថា ទាហានស្រុកខ្មែរវេទនាណាស់ ។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សា អគារស្នាក់នៅ របស់គ្រូបង្រៀន និងសិស្ស អគារទីចាត់ការ ព្រមទាំងសមិទ្ធផលផ្សេងៗទៀតដែលជាអំណោយដ៏ថ្លៃថ្លាបំផុតរបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅក្នុងវិទ្យាល័យហ៊ុន សែន វាលរេញ នាព្រឹកថ្ងៃទី២៦ ខែមីនា ឆ្នាំ២០២៥ នៅក្នុងខេត្តព្រះសីហនុ សម្តេចមហាបវរធិបតី បានសម្តែងការហួសចិត្តនឹងការលើកឡើងខាងលើនេះដោយសម្តេចក៏បានផ្តល់ការបកស្រាយខ្លីៗទៅវិញថា ទាហានសម័យនេះទំនើបជាងសម័យកាលច្បាំងគ្នាច្រើនណាស់ បើមិនមានផ្ទះថ្មក៏មានផ្ទះឈើសម្រាប់ជាទីតាំងឈរជើងអចិន្ត្រៃយ៍ដែលកិច្ចការទាំងនេះ អ្នកធ្លាប់ទៅស្គាល់ព្រំដែន ឬមួយទាហានព្រំដែនអាចបញ្ជាក់បាន ។
ក្នុងនោះ សម្តេចមហាបវរធិបតី ក៏បានគូសបញ្ជាក់ថា៖« គ្មានពេលណាស្តាប់សំឡេងរំខាននោះទេ ដោយសម្តេចត្រូវចំណាយពេលស្តាប់សំឡេងពិតប្រាកដ ដែលជាសំឡេងប្រជាពលរដ្ឋ ពោលនៅពេលដែលប្រជាពលរដ្ឋមានបញ្ហាពិតប្រាកដ ឧទាហរណ៍បញ្ហាដីធ្លី បញ្ហាសុខភាព ហើយបានអំពាវនាវឱ្យជួយរាជរដ្ឋាភិបាលនឹងជួយដែលនេះទើបជាតម្រូវការពិតប្រាកដ ដោយឡែកការរិះគន់ ដើម្បីស្ថាបនាក៏ត្រូវទទួល»។
ក្នុងនោះ សម្តេចមហាបវរធិបតី បានលើកឡើងថា សម្តេចមិនស្តាប់អ្នកនយោបាយដែលយកបញ្ហាព្រំដែន បញ្ហាទឹកដី មកធ្វើអាជីវកម្មសម្រាប់សាងប្រាក់ចំណូលឱ្យខ្លួនឯងនោះទេ ខណៈដែលការគិតគូពីបញ្ហាព្រំដែន រាជរដ្ឋាភិបាល បានពង្រឹងការចចារ និងកសាងអភិវឌ្ឍន៍ព្រំដែនរាប់សិបឆ្នាំមកហើយ មិនមែនទើបតែមានពេលគេស្រែកឆ្នាំនេះនោះទេ ។
សម្តេចមហាបវរធិបតី ហ៊ុន ម៉ាណែត បានគូសបញ្ជាក់ថា ៖«ខ្ញុំឃើញ អ្នកខ្លះនៅកូរ៉េ អ្នកខ្លះនៅបងប្អូនគាត់ថា ទាហានស្រុកខ្មែរវេទនាណាស់ គេថាទាហានជួរមុខការពារពិតប្រាកដ ឃើញហើយហូបនៅលើដីខ្ញុំថា អញ្ជេះ បើយល់ល្អ អ្នកដែលព្រួយបារម្ភមកខ្ញុំជូនទៅមើលអង្គភាពណា ទីតាំងឈរជើង ខ្ញុំចុះទៅព្រំដែនចុះទៅដល់ចំណុចឈរជើងចំណុចដែលអចិន្ត្រៃយ៍ យើងមានឡេដ្ឋានបេតុង យើងមានអគារ បើមិនបេតុងក៏ឈើ នៅទីនោះរៀបចំគ្រប់គ្រាន់ ចឹងគ្រាន់តែប្រាប់ខ្ញុំទទួលស្គាល់ថា ខាងមុខអត់មានម៉ាស៊ីនត្រជាក់ទេ ទាហានជួរមុខអត់មានម៉ាស៊ីនត្រជាក់ទេ ខ្ញុំហ៊ានទទួលខ្ញុំទទួលខុសត្រូវថា អត់មានទេ ហើយក៏អត់ត្រូវដាក់នៅទាហានជួរមុខដែរព្រោះអត់មានភ្លើង ហើយបងប្អូននៅជួរមុខគាត់ក៏អត់ត្រូវការម៉ាស៊ីនត្រជាក់ដែរ គាត់ត្រូវការបន្ទះសូឡា សាកអាគុយ សាកអ្វីផ្សេងៗ» ។
បន្ថែមលើនេះ ផ្ទុយនឹងការមតិរិះគន់ខាងលើនេះ សម្តេចមហាបវរធិបតីបានលើកឡើងថាទាហានជួរមុខបានទទួលការឧបត្ថម្ភបន្ថែមលើប្រាក់បំប៉ន និងមានការយកចិត្តទុកដាក់ជាខ្លាំងពីសំណាក់ថ្នាក់ដឹកនាំជានិច្ច ៕
ចែករំលែកព័តមាននេះ