រឿងអាកាសធាតុ និងការបំពុលខ្យល់នៅកម្ពុជា គឺជារឿងគួរតែយកចិត្តទុកដាក់ ហើយតាមដានឡើងវិញ ដើម្បីសុវត្ថិភាពផ្នែកសុខភាព និងជាការចូលរួមចំណែកការពារខ្លួនទប់ទល់នឹងបញ្ហា ដែលអាចកើតមានជាយថាហេតុ ។ នៅកម្ពុជា រឿងអាកាសធាតុនៅមិនទាន់ជាបញ្ហាបារម្ភនៅឡើយទេ…
រឿងអាកាសធាតុ និងការបំពុលខ្យល់នៅកម្ពុជា គឺជារឿងគួរតែយកចិត្តទុកដាក់ ហើយតាមដានឡើងវិញ ដើម្បីសុវត្ថិភាពផ្នែកសុខភាព និងជាការចូលរួមចំណែកការពារខ្លួនទប់ទល់នឹងបញ្ហា ដែលអាចកើតមានជាយថាហេតុ ។
នៅកម្ពុជា រឿងអាកាសធាតុនៅមិនទាន់ជាបញ្ហាបារម្ភនៅឡើយទេ ប៉ុន្តែចំណុចដែលគួរតែយកចិត្តទុកដាក់នោះ គឺថានៅថៃដែលស្ថិតនៅក្នុងតំបន់អាកាសធាតុជាមួយនឹងកម្ពុជាដែរនោះមានព័ត៌មានថា នៅតំបន់ខ្លះកម្តៅអាចកើនឡើងរហូតដល់ទៅ៤០អង្សាសេហើយ កាលពីថ្ងៃម្សិលមិញ ។
សារព័ត៌មាន The Nation បានរាយការណ៍ កាលពីថ្ងៃទី២៤ ខែមីនា ឆ្នាំ២០២៥ថា សីតុណ្ហភាពនៅខេត្ត៩ នៅថៃសីតុណ្ហភាពអាចឡើងដល់ទៅ៤០អង្សាសេ ហើយបានព្រមានថា រលកកម្តៅនេះអាចនឹងកើតមាននៅទូទាំងប្រទេស ។
សម្រាប់កម្ពុជាយើង រឿងសីតុណ្ហភាពនេះ ខាងក្រសួងធនធានទឹក និងឧតុនិយមបានផ្សាយថា រហូតដល់ថ្ងៃទី២៦ ខែមីនា ឆ្នាំ២០២៥ ខាងមុខសីតុណ្ហភាពនៅគ្រប់តំបន់ ពោល គឺទំនាប កណ្តាល ខ្ពង់រាប និងតំបន់មាត់សមុទ្រសីតុណ្ហភាព គឺឡើងមិនលើសពី៣៥អង្សាសេឡើយ ។
ជារួមបញ្ហាសីតុណ្ហភាពនៅកម្ពុជាមិនទាន់ឡើងដល់កម្រិតដែលយើងហៅថា ជារលកកម្តៅនៅឡើយទេ ប៉ុន្តែសូមកុំភ្លេចតាមដាននូវបច្ចុប្បន្នភាពនៃព័ត៌មានពីព្រោះសីតុណ្ហភាព គឺមាន ការប្រែប្រួល និងលឿនខ្លាំង ។ ដោយឡែក ក្រៅពីបញ្ហាសីតុណ្ហភាព រឿងបំពុលខ្យល់វិញ ដែលស្ងប់ស្ងាត់មួយរយៈកាលពីថ្ងៃទី២៤ ខែមីនា កម្រិតបំពុលខ្យល់នៅក្នុងប្រទេសកម្ពុជា ហាក់កើតមានជាថ្មី ដោយមានសេចក្តីរាយការណ៍ថា វាកើតមាននៅភ្នំពេញ និងនៅសៀមរាប ។
តាមសន្ទស្សន៍គុណភាពខ្យល់ https://www.iqair.com/ បានបង្ហាញថា កាលពីថ្ងៃទី២៤ គុណភាពខ្យល់នៅរាជធានីភ្នំពេញ និងខេត្តសៀមរាបកម្រិតបំពុលខ្យល់បានកើនឡើងដល់កម្រិត មិនល្អសម្រាប់ក្រុមដែលងាយរងគ្រោះ ។
គុណភាពខ្យល់នៅរាជធានីនៅថ្ងៃនោះ ត្រូវវាយតម្លៃថា ជាទីក្រុងដែលបំពុលខ្លាំងបំផុត ទី១៥ក្នុងពិភពលោក និងទី៦ អាក្រក់បំផុតនៅអាស៊ីអាគ្នេយ៍នេះ ដោយនៅក្រោមហាណូយ និង បាងកក ប៉ុន្តែនៅថ្ងៃទី ២៥ ខែមីនា ស្ថានភាពហាក់ថយចុះបន្តិច តែនឹងវិលមកស្ថានភាពប្រសើរវិញចាប់ពីថ្ងៃទី២៦ ខែមីនា តទៅ ។ កំហាប់ធូលីនៅក្នុងខ្យល់ពេលនោះ គឺនៅក្នុងរង្វង់ ៣៨ មីក្រូក្រាមនៅក្នុងមួយម៉ែត្រគូប ។
ទន្ទឹមនឹងនេះ នៅខេត្តសៀមរាប កម្រិតបំពុលខ្យល់មានការថយចុះ ប៉ុន្តែក៏បន្តស្ថិតនៅក្នុងលំដាប់ខ្ពស់គួរសមដដែល ដែលមានកំហាប់ធូលីនៅក្នុងខ្យល់ប្រមាណជា៥១ មីក្រូក្រាមនៅក្នុងមួយម៉ែត្រគូប ។ ស្ថានភាពបំពុលខ្យល់នៅខេត្តសៀមរាប នឹងអាចធ្លាក់នៅក្រោមកម្រិតបំពុលគឺនៅក្នុងរង្វង់ថ្ងៃទី២៦ ខែមីនា ខាងមុខ ។
កំណើនសីតុណ្ហភាព និងកំហាប់បំពុលខ្យល់វាមិនមែនជាកត្តាដែលកើតដោយកម្ពុជានោះទេ វា គឺជាបាតុភូតិធម្មជាតិគួបផ្សំ និងបញ្ហាបម្រែបម្រូលអាកាសធាតុ ហើយកម្រិតបំពុលខ្យល់វិញក៏មិនមែនដោយសារតែបញ្ហានៅក្នុងស្រុកតែមួយនោះទេ គឺវាវាជាបាតុភូតតំបន់ ។ បរិយាកាស គឺគ្មានព្រំដែនទេ ដូច្នេះសំខាន់ គឺយើងប្រុងប្រយ័ត្នដោយខ្លួនឯង ៕
ចែករំលែកព័តមាននេះ