ទីក្រុងវ៉ាស៊ីនតោន៖ ប្រេសិតពិសេសរបស់លោកត្រាំនៅតែមានសុទិដ្ឋិនិយមចំពោះការចរចាគ្នាដើម្បីដោះស្រាយបញ្ហាអ៊ុយក្រែន។ លោកយល់ថាលោកពូទីនចង់បានសន្តិភាព។ លោកស្ទីវវីតខូសបង្ហាញសុទិដ្ឋិនិយមមុនគម្រោងជួបគ្នានៅអារ៉ាប៊ីសាអូឌីត។ លោកថ្លែងប្រាប់ថាទូរទស្សន៍ហ្វក់ដោយជំនឿយ៉ាងមុតមាំថាលោកពូទីនចង់បានសន្តិភាពណាស់។
អាមេរិកចាប់ផ្ដើមត្រៀមបញ្ជូនគណៈប្រតិភូរបស់ខ្លួនមួយក្រុមទៅប្រទេសអារ៉ាប៊ីសាអូឌីតជាបណ្ដើរៗហើយដើម្បីជួបមន្ត្រីរដ្ឋាភិបាលអ៊ុយក្រែន។ ភាគីទាំង២នឹងពិនិត្យមើលលទ្ធភាពនៃការបង្កើតបទឈប់បាញ់បន្ទាប់ពីអ៊ុយក្រែន និងរុស្ស៊ីបង្កើនការវាយប្រហារគ្នាទៅលើទីតាំងផលិតថាមពល។ ជាពិសេស ទីតាំងស្តុកទុកប្រេងរបស់រុស្ស៊ីនៅតែបន្តឆាបឆេះយ៉ាងសន្ធោសន្ធៅ។
លោកវីតខូសយល់ថាតាមរយៈគម្រោងជួបគ្នានៅអារ៉ាប៊ីសាអូឌីត ដំណើរការចរចាអាចនឹងរីកចម្រើនទៅមុខ។ ជាពិសេសគម្រោងជួបគ្នានេះនឹងនិយាយអំពីការផ្អាកបាញ់ប្រហារទៅលើកប៉ាល់ដឹកទំនិញនៅសមុទ្រខ្មៅ។ លោកវីតខូសចាត់ទុកថានេះជាដំណាក់កាលដំបូងនៃការស្រុះស្រួលមូលមតិគ្នា។ ចាប់ផ្ដើមពីចំណុចនេះ លោករំពឹងថាភាគីទាំង២នឹងឈានដល់ការព្រមព្រៀងឈប់បាញ់គ្នាដ៏ពេញលេញមួយ។
សូមរំលឹកថាកាលពីសប្ដាហ៍មុន លោកពូទីនយល់ព្រមផ្អាកវាយប្រហារទីតាំផលិតថាមពលរបស់អ៊ុយក្រែនជាបណ្ដោះអាសន្ន។ ប៉ុន្តែលោកច្រានចោលដោយភាសាការទូតនូវសំណើនៃបទឈប់បាញ់ដ៏ពេញលេញ១រយៈពេល៣០ថ្ងៃដែលអ៊ុយក្រែនបានប្រកាសទទួលយកទុកជាមុនបើសិនរុស្ស៊ីទទួលយក។ សំណើនេះរៀបចំដោយក្រុមការងាររបស់លោកត្រាំ។
ចំពោះសំណួរថាបើក្រុមបស្ចិមប្រទេសនៅតែបន្តរិះគន់លោកពូទីនដូចសព្វថ្ងៃនេះតើលោកគិតដូចម្ដេច? លោកវីតខូសឆ្លើយតបថានៅក្នុងសាច់រឿងអ្វីក៏មានតួអង្គ២សំខាន់ (ចង់សំដៅលើតួអង្គចិត្តល្អ និងតួអង្គចិត្តអាក្រក់)។ លោកវីតខូសសូមផ្ដាំទៅក្រុមសម្ព័ន្ធមិត្តនៅក្នុងអង្គការណាតូសូមកុំបារម្ភជ្រុលពេករហូតដល់ទៅខ្លាចលោកពូទីនឈ្លានពានប្រទេសជិតខាង។
លោកថ្លែងថាលោកពូទីនមិនមែនចិត្តទុរយសដល់ថា្នក់លេបយកទ្វីបអឺរ៉ុបទាំងមូលទេ។ លោកបានប្រៀបធៀបព្រឹត្តិការណ៍ពេលនេះទៅព្រឹត្តិការណ៍មុនសង្គ្រាមលោកលើកទី២ ហើយវិនិច្ឆ័យឃើញថាវាមិនដូចគ្នាទេ៕
ចែករំលែកព័តមាននេះ