ប្រមុខរាជរដ្ឋាភិបាលកម្ពុជា បានបង្ហាញនូវធនធានមាសដ៏សម្បូរបែបមួយនៅក្នុងប្រទេស ដូច្នេះមន្ត្រីពាក់ព័ន្ធក៏ដូចជា ប្រជាពលរដ្ឋគួរតែនាំគ្នារៀនវិធីសាស្ត្រកែច្នៃមាសនោះឲ្យទៅជាប្រយោជន៍សម្រាប់ខ្លួនឯង សហគមន៍ និងប្រទេសជាតិទាំងមូល ។ ធនធានដែលជាកំណប់មាសដ៏មានតម្លៃដែលនាយករដ្ឋមន្ត្រីសម្តេចធិបតី ហ៊ុន ម៉ាណែត…
ប្រមុខរាជរដ្ឋាភិបាលកម្ពុជា បានបង្ហាញនូវធនធានមាសដ៏សម្បូរបែបមួយនៅក្នុងប្រទេស ដូច្នេះមន្ត្រីពាក់ព័ន្ធក៏ដូចជា ប្រជាពលរដ្ឋគួរតែនាំគ្នារៀនវិធីសាស្ត្រកែច្នៃមាសនោះឲ្យទៅជាប្រយោជន៍សម្រាប់ខ្លួនឯង សហគមន៍ និងប្រទេសជាតិទាំងមូល ។
ធនធានដែលជាកំណប់មាសដ៏មានតម្លៃដែលនាយករដ្ឋមន្ត្រីសម្តេចធិបតី ហ៊ុន ម៉ាណែត បានបង្ហើបនោះ គឺសហគមន៍ទេសចរណ៍ដែលកម្ពុជាមានច្រើន ហើយខ្លះក៏ចេះច្នៃ ខ្លះមិនទាន់ចេះច្នៃ ដែលគប្បីស្ថាប័នពាក់ព័ន្ធគួរតែជួយធ្វើយ៉ាងណាប្រែក្លាយសហគមន៍ទេសចរណ៍ឲ្យកាន់តែផុលផុស ។
ថ្លែងក្នុងពិធីបើកជាផ្លូវការនូវពិធីបុណ្យទន្លេលើកទី៩ នៅខេត្តតាកែវ កាលពីល្ងាចថ្ងៃទី២២ ខែមីនា ឆ្នាំ២០២៥ សម្ដេចមហាបវរធិបតី បានបង្ហើបថា កម្ពុជាមានធនធាននេះច្រើនណាស់ ហើយមានសក្តានុពល ។
ជាមួយគ្នានេះ សម្តេចក៏បានជំរុញឱ្យក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ ក្រសួងទេសចរណ៍ និងអ្នកពាក់ព័ន្ធដទៃទៀតជួយដល់សហគមន៍មូលដ្ឋានក្នុងការគ្រប់គ្រងគំនិតផ្តួចផ្តើមទេសចរណ៍សហគមន៍ប្រកបដោយនិរន្តរភាព ។
នៅក្នុងអំឡុងពេលនោះ សម្តេចមហាបវរធិបតី ក៏បានអំពាវនាវដល់ស្ថាប័នហិរញ្ញវត្ថុ រួមទាំងធនាគារ ធនាគារពាណិជ្ជនានាឱ្យជួយដល់វិស័យទេសចរណ៍តាមសហគមន៍ ដោយសង្កត់ធ្ងន់ថា វាជាគំរូអាជីវកម្មដែលផ្តល់ផលប្រយោជន៍ផ្ទាល់ដល់ប្រជាពលរដ្ឋក្នុងមូលដ្ឋាន ហើយវាក៏ជាគំរូអាជីវកម្មមួយដែលនឹងអាចជួយការការពារធនធានធម្មជាតិ និងបរិស្ថាននៅក្នុងតំបន់នោះផងដែរ ។
សម្តេចមហាបវរធិបតី បានមានប្រសាសន៍ថា អាជ្ញាធរគួរតែសម្របសម្រួលផ្តល់សេវា និងហេដ្ឋារចនាសម្ព័ន្ធចាំបាច់ ទន្ទឹមនឹងការជួយសហគមន៍ផងដែរអំពីអនាម័យការគ្រប់គ្រងកាកសំណល់ និងទីផ្សារ ដើម្បីធានាបាននូវនិរន្តរភាពរយៈពេលវែង ។
តាមការកាត់ត្រាកន្លងមក កម្ពុជាមានសហគមន៍ទេសចរណ៍នៅតាមមូលដ្ឋាននេះប្រមាណជាជាង១២០កន្លែង ។ ហើយមកដល់ពេលនេះសហគមន៍ខ្លះក៏បានដំណើរការខ្លះក៏បានតែបង្កើត ប៉ុន្តែខ្វះមូលដ្ឋាននៃចំណេះដឹង និងការគ្រប់គ្រង ដែលទាមទារការយកចិត្តទុកដាក់ពីអ្នកជំនាញ ។
ទេសចរណ៍តាមសហគមន៍ គឺជាទម្រង់មួយនៃទេសចរណ៍ប្រកបដោយការទទួលខុសត្រូវ ដែលគាំទ្រសហគមន៍មូលដ្ឋាន និងលើកកម្ពស់ជីវភាពរស់នៅរបស់ពួកគេ ។ វា គឺជាគំរូនៃដំណើរការអាជីវកម្មមួយដែលតម្រូវឲ្យមានការចូលរួមពីប្រជាពលរដ្ឋនៅក្នុងសហគមន៍ផ្ទាល់ ។ ការសម្រេចចិត្តគ្រប់គ្រងទាំងអស់ត្រូវបានធ្វើឡើងដោយសហគមន៍ តាមស្មារតី ពិគ្រោះយោបល់ជាមួយសហគមន៍ ហើយប្រាក់ចំណូល និងចំណេញទាំងអស់ផ្តល់ផលប្រយោជន៍ដោយផ្ទាល់ដល់សហគមន៍មូលដ្ឋានផ្ទាល់ ។
ពិតណាស់ សហគមន៍ទេសចរណ៍ គឺប្រៀបបាននឹងកំណប់មាសរបស់ប្រជាសហគមន៍ ប៉ុន្តែទម្រាំវាក្លាយទៅជាមាសដែលអាចចែកគ្នាចាយចែកគ្នាទុកដាក់បាន គឺវាទាមទារឱ្យមានតុល្យភាពនៃតម្រូវការសេដ្ឋកិច្ច សង្គម និងបរិស្ថានរបស់សហគមន៍មូលដ្ឋាន ហើយប្រជាសហគមន៍ និងអ្នកដែលពាក់ព័ន្ធដាច់ខាចត្រូវតែធានាថា ធនធានទេសចរណ៍នេះមានផលប៉ះពាល់អវិជ្ជមានតិចតួច និងទទួលបានអត្ថប្រយោជន៍រយៈពេលវែង ។
ដើម្បីឲ្យសហគមន៍ទេសចរណ៍ក្លាយជាមាសបានចាំបាច់បំផុត គឺត្រូវមានការចូលរួមពីសហគមន៍ ហើយត្រូវតែធ្វើយ៉ាងណាឲ្យប្រជាសហគមន៍មានសិទ្ធិអំណាច និងការការសម្រេចចិត្តនៅក្នុងការគ្រប់គ្រងតំបន់របស់ពួកគេដោយស្ថិតក្រោមច្បាប់ ។ ក្រៅពីនោះ សហគមន៍នេះក៏ទាមទារឲ្យមានការកំណត់ទស្សនៈវិស័យយូរអង្វែង ចេះរៀបចំផែនការ ចេះធ្វើទីផ្សារ ចេះផ្តល់សេវាកម្ម ចេះស្រលាញ់ធនធានធម្មជាតិ និងបរិស្ថាន ហើយក៏ទាមទារការចេះគ្រប់គ្រងនឹងបែងចែកផលប្រយោជន៍ដោយស្មើភាព ។
សរុបទៅសហគមន៍ទេសចរណ៍ គឺជាមាសមិនទាន់ច្នៃមួយនៅកម្ពុជា ដូច្នេះដើម្បីឲ្យវាក្លាយជាកំណប់មាសដ៏ពិតប្រាកដ កម្ពុជាទាមទារនូវការដាក់ចេញនូវផែនការ និងកម្មវិធីអភិវឌ្ឍន៍ ក៏ដូចជា គោលនយោបាយតម្រង់ទិសមួយច្បាស់លាស់ ។ វា គឺជាមាសមែនហើយ ប៉ុន្តែវាក៏មិនមែនជារឿងងាយស្រួលប៉ុន្មានឡើយ នៅក្នុងដំណើរការទាញយកមាសនោះឲ្យចេញជាផលសម្រាប់បម្រើការអភិវឌ្ឍជាតិ និងសហគមន៍បាន ។ ឭថា មាសនរណាក៏ចង់បាន នរណាក៏ចង់គ្រប់គ្រង ប៉ុន្តែបើខ្វះការគ្រប់គ្រងច្បាស់លាស់មិនត្រឹមតែបានមាសមកចែកគ្នាទេ គឺជម្លោះក៏អាចនឹងកើតមានមុនបានមាសនោះមកចែកគ្នាផងក៏មានដែរ ៕
ចែករំលែកព័តមាននេះ