ទីក្រុងយេរូសាឡឹម៖ ថ្ងៃនេះ អ៊ីស្រាអែលវាយប្រហារយ៉ាងខ្លាំងក្លាទៅលើបញ្ជាការដ្ឋានរបស់ក្រុមហេសបូឡានៅប្រទេសលីបង់ខាងត្បូងបន្ទាប់ពីអ៊ីស្រាអែលសង្ស័យថាពួកគេបាញ់រ៉ុកកែតជាច្រើនគ្រាប់ចេញពីទីនោះចូលដែនអាកាសរបស់អ៊ីស្រាអែល។ លោកណឺតាន់យ៉ាហ៊ូថ្លែងថាលោកបានបញ្ជាទៅរដ្ឋមន្ត្រីការពារជាតិថាត្រូវតែវាយប្រហារទីតាំងរបស់ក្រុមភេរវកម្មរាប់សិបកន្លែង។
ក្រសួងសុខាភិបាលលីបង់ថ្លែងថាមនុស្ស២នាក់ស្លាប់ និង៨នាក់រងរបួស។ នាយករដ្ឋមន្ត្រីលីបង់ថ្លែងថាប្រទេសរបស់លោកកំពុងត្រូវគេអូសទាញឱ្យធ្លាក់ចូលទៅក្នុងភ្នក់ភ្លើងសង្គ្រាមហើយ។ ហេសបូឡាជាចលនាប្រដាប់អាវុធដែលមានអ៊ីរ៉ង់នៅពីក្រោយខ្នង។ ពួកគេថាមិនបានបាញ់រ៉ុកកែតចូលអ៊ីស្រាអែលទេ។ ខ្លួននៅតែបន្តអនុវត្តតាមស្មារតីនៃបទឈប់បាញ់ជានិច្ច។
កងរក្សាសន្តិភាពរបស់អង្គការសហប្រជាជាតិដែលឈរជើងនៅលីបង់ថ្លែងថាខ្លួនកំពុងព្រួយបារម្ភថាអំពើហិង្សាអាចនឹងផ្ទុះឡើងកាន់តែខ្លាំង។ ដូច្នេះ ខ្លួនសូមជំរុញឱ្យអ៊ីស្រាអែល និងលីបង់បន្តអនុវត្តឱ្យបានត្រឹមត្រូវតាមការសន្យារបស់ខ្លួនដែលថាមិនពង្រីកសង្គ្រាមទេ។ អ៊ីស្រាអែលថ្លែងថារ៉ុកកែតបីគ្រាប់ដែលបាញ់ចេញពីលីបង់នោះត្រូវខ្លួនបាញ់ទម្លាក់ចោលទាំងអស់។
ប៉ុន្មានម៉ោងក្រោយមក កងទ័ពរដ្ឋាភិបាលលីបង់ (ផ្សេងពីក្រុមហេសបូឡា គ្រាន់តែស្ថិតនៅលើទឹកដីលីបង់តែមួយ) បានចុះស្រាវជ្រាវ និងរកឃើញជើងទម្រងបាញ់រ៉ុកកែត៣គ្រឿង ហើយបានកម្ទេចចោលទាំងអស់។ ក្រោយមក នៅល្ងាចថ្ងៃសៅរ៍ ក្រុមហេសបូឡាបានចេញសេចក្ដីថ្លែងការណ៍មួយបញ្ជាក់ថាខ្លួនគ្មានពាក់ពន្ធនឹងការបាញ់រ៉ុកកែតចូលអ៊ីស្រាអែលនោះទេ។
តាមពិត អ៊ីស្រាអែល និងហេសបូឡាធ្លាប់ប៉ះទង្គិចគ្នាកាលពីប៉ុន្មានខែមុន ហើយក្រោយមកភាគីទាំង២ក៏បានចុះកិច្ចព្រមព្រៀងឈប់បាញ់គ្នា។ អ៊ីស្រាអែលបន្តគ្រប់គ្រងទីតាំង៥កន្លែងនៅលីបង់ខាងត្បូង។ រដ្ឋាភិបាលលីបង់ចាត់ទុកថានេះជាការរំលោភអធិបតេយ្យភាពជាតិរបស់ខ្លួន និងរំលោភស្មារតីនៃបទឈប់បាញ់ដែលតម្រូវឱ្យអ៊ីស្រាអែលដកកងទ័ពទាំងអស់។
អ៊ីស្រាអែលបកស្រាយថាដោយសារកងទ័ពរដ្ឋាភិបាលលីបង់មិនទាន់មានវត្តមាននៅទីនោះដើម្បីការពារសន្តិសុខជាតិឱ្យបានពេញលេញ។ ដូច្នេះ អ៊ីស្រាអែលត្រូវតែដាក់ទ័ពជាបន្តទៀតដើម្បីមើលការខុសត្រូវការពារជនជាតិរបស់ខ្លួនដែលរស់នៅតាមព្រំដែន។ ករណីរ៉ុកកែតបាញ់ចូលទឹកដីអ៊ីស្រាអែលនៅថ្ងៃនេះជាការដាក់សម្ពាធកាន់តែខ្លាំងទៅលើរដ្ឋាភិបាលលីបង់។ ម៉្យាងទៀត អ៊ីស្រាអែលអាចយកហេតុផលនេះដើម្បីបង្ហាញថាលីបង់មានសន្តិសុខជាតិនៅទន់ខ្សោយ។ កងទ័ពជាតិរបស់ពួកគេមិនទាន់អាចគ្រប់គ្រងសភាពការណ៍បាននៅឡើយទេ។
សភាពការណ៍នៅលីបង់សព្វថ្ងៃនេះមានភាពរញ៉េរញ៉ៃបន្តិចដោយសារកងទ័ពរដ្ឋាភិបាលមានភាពទន់ខ្សោយ។ ចំណែកក្រុមហេសបូឡាដែលជាចលនាប្រដាប់អាវុធក្រៅរដ្ឋាភិបាលបែរជាមានកម្លាំងខ្លាំងទៅវិញ។ គ្រាន់តែថាហេសបូឡាមិនប្រឆាំងនឹងរដ្ឋាភិបាលលីបង់ទេ។ ពួកគេប្រឆាំងនឹងអ៊ីស្រាអែលតែប៉ុណ្ណោះ ហើយទទួលជំនួយរបស់អ៊ីរ៉ង់។ ដូច្នេះ ឯករាជ្យពីរដ្ឋាភិបាល៕
ចែករំលែកព័តមាននេះ