ទីក្រុងប៉េកាំង៖ រដ្ឋមន្ត្រីការបរទេសកាណាដា លោកស្រីមេឡានី ហ្សូលី (Mélanie Joly) ថ្លែងថាត្រឹមតែ១ប៉ប្រិចភ្នែកប៉ុណ្ណោះកាលពីដើមឆ្នាំ២០២៥ អាជ្ញាធរចិនប្រហារជីវិតជនជាតិកាណាដា៤នាក់។ អតីតនាយករដ្ឋមន្ត្រីកាណាដាលោកទ្រូដូបានស្នើសុំយ៉ាងទទូចឱ្យអាជ្ញាធរចិនអនុគ្រោះទោសចំពោះជនជាតិកាណាដាដទៃទៀតដែលជាប់ទោសពីបទជួញដូរគ្រឿងញៀន។ ស្ថានទូតចិនប្រចាំរដ្ឋធានីអូរតាវ៉ា…
ទីក្រុងប៉េកាំង៖ រដ្ឋមន្ត្រីការបរទេសកាណាដា លោកស្រីមេឡានី ហ្សូលី (Mélanie Joly) ថ្លែងថាត្រឹមតែ១ប៉ប្រិចភ្នែកប៉ុណ្ណោះកាលពីដើមឆ្នាំ២០២៥ អាជ្ញាធរចិនប្រហារជីវិតជនជាតិកាណាដា៤នាក់។ អតីតនាយករដ្ឋមន្ត្រីកាណាដាលោកទ្រូដូបានស្នើសុំយ៉ាងទទូចឱ្យអាជ្ញាធរចិនអនុគ្រោះទោសចំពោះជនជាតិកាណាដាដទៃទៀតដែលជាប់ទោសពីបទជួញដូរគ្រឿងញៀន។
ស្ថានទូតចិនប្រចាំរដ្ឋធានីអូរតាវ៉ា (Ottawa) ថ្លែងថាការប្រហារជីវិតទាំងនេះពាក់ព័ន្ធនឹងបទល្មើសគ្រឿងញៀន។ ប្រទេសចិនមិនខ្វល់ថាទណ្ឌិតទាំងនោះមានសញ្ជាតិអ្វីទេ បើត្រូវប្រហារជីវិតត្រូវតែប្រហារជីវិតចោលតែម្ដង។ ប៉ុន្តែកាណាដារិះគន់ទង្វើនេះ ហើយថ្កោលទោសជាទម្ងន់។ លោកស្រីហ្សូលីស្នើសុំឱ្យអាជ្ញាធរចិនទុកជីវិតឱ្យពួកគេផង។ ពួកគេមានសញ្ជាតិ២។
មិនថាតែនៅប្រទេសចិនប៉ុណ្ណោះទេ លោកស្រីហ្សូលីថាកាណាដាតែងតែស្នើសុំការទុកជីវិតចំពោះគ្រប់ជនជាតិកាណាដាដែលជាប់ទោសនៅប្រទេសដទៃទៀតទូទាំងពិភពលោក។ ក្រុមគ្រួសារទណ្ឌិតដែលប្រហារជីវិតទាំង៤នាក់នោះបានស្នើសុំឱ្យរដ្ឋាភិបាលកាណាដាប្រមូលទិន្នន័យ និងអត្តសញ្ញាណរបស់ពួកគេឱ្យបានលម្អិតបន្ថែមទៀត។ អ្នកនាំពាក្យស្ថានទូតចិនបញ្ជាក់ថាចិនតែងតែអនុវត្តទោសយ៉ាងធ្ងន់ធ្ងរបំផុតចំពោះបទល្មើសគ្រឿងញៀនមិនថាជនជាតិណាជាជនណាទេ។
ករណីជនជាតិកាណាដាដែលត្រូវប្រហារជីវិតនោះសុទ្ធតែមានភស្តុតាងដាក់បន្ទុកគ្រប់គ្រាន់ណាស់ដើម្បីផ្ដន្ទាទោសពួកគេ។ អ្នកនាំពាក្យក្រសួងការបរទេសចិនថ្លែងថាអាជ្ញាធរចិនតែងតែអនុវត្តដោយស្មើភាពគ្នាទាំងអស់។ ដូច្នេះ ចិនសូមជំរុញឱ្យកាណាដាឈប់ជ្រៀតជ្រែកតទៅទៀតនៅក្នុងកិច្ចការរបស់តុលាការចិនដែលមានឯករាជ្យភាព និងអធិបតេយ្យភាពពេញលេញ។
អ្នកនាំពាក្យចិន លោកស្រីម៉ៅនីង ថ្លែងបន្តទៀតថាការប្រយុទ្ធប្រឆាំងនឹងបទល្មើសគ្រឿងញៀនជាការទទួលខុសត្រូវរួមគ្នារបស់ប្រទេសទាំងអស់នៅទូទាំងពិភពលោក។ លោកស្រីថាមុននឹងឈានដល់ការប្រហារជីវិតជនជាតិកាណាដាទាំងនោះ អាជ្ញាធរចិនបានបានស៊ើបអង្កេត និងជំនុំជម្រះដោយយុត្តិធម៌ណាស់ ហើយក៏ការពារសិទ្ធិរបស់ពួកគេសម្បើមណាស់ដែរ៕
ចែករំលែកព័តមាននេះ