អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuter បានរាយការណ៍ថា តម្លៃមាសអន្តរជាតិបានបន្តកើនឡើងដល់កម្រិតខ្ពស់បំផុតគ្រប់ពេលសាជាថ្មីទៀតហើយ នៅព្រឹកថ្ងៃទី២០ ខែមីនា ឆ្នាំ២០២៥ ក្នុងតម្លៃមិនធ្លាប់មានពីមុន…
អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuter បានរាយការណ៍ថា តម្លៃមាសអន្តរជាតិបានបន្តកើនឡើងដល់កម្រិតខ្ពស់បំផុតគ្រប់ពេលសាជាថ្មីទៀតហើយ នៅព្រឹកថ្ងៃទី២០ ខែមីនា ឆ្នាំ២០២៥ ក្នុងតម្លៃមិនធ្លាប់មានពីមុន ៣,០៥៥ដុល្លារក្នុង១អោន ឬ ៣,៦៨០ដុល្លារក្នុង១តម្លឹង ខណៈដែលធនាគារកណ្តាលអាមេរិកបានចេញការណែនាំអំពីការកាត់បន្ថយអត្រាការប្រាក់ចំនួន២លើក ដែលអាចកើតមាននៅឆ្នាំនេះ ព្រមទាំងការជំរុញចំពេលមានភាពតានតឹងផ្នែកភូមិសាស្ត្រនយោបាយ និងសេដ្ឋកិច្ចពិភពលោក ដែលកំពុងតែបន្ត។
គិតត្រឹមថ្ងៃទី២០ ខែមីនា ឆ្នាំ២០២៥ នៅវេលាម៉ោង១២:០០នាទីថ្ងៃត្រង់ តម្លៃមាសអន្តរជាតិស្ថិតក្នុងតម្លៃ ៣,០៥០ដុល្លារក្នុង១អោន ឬ ៣,៦៧៥ដុល្លារក្នុង១តម្លឹង បន្ទាប់ពីបានហក់ឡើងដល់កម្រិតខ្ពស់បំផុតគ្រប់ពេល ៣,០៥៥ដុល្លារក្នុង១អោន ឬ ៣,៦៨០ដុល្លារក្នុង១តម្លឹង។ តម្លៃមាសបានទម្លុះរនាំង ៣,០០០ដុល្លារក្នុង១អោនជាលើកដំបូង កាលពីថ្ងៃទី១៤ ខែមីនា ឆ្នាំ២០២៥។
តម្លៃមាសត្រូវបានជំរុញដោយស្ថានភាពទីផ្សារពាណិជ្ជកម្មមិនច្បាស់លាស់ជាច្រើន នៅជុំវិញពិភពលោក គួបផ្សំនឹងភាពតានតឹងភូមិសាស្ត្រនយោបាយ រួមទាំងកត្តាប្រាក់ដុល្លារអាមេរិកមានសញ្ញាចុះខ្សោយ និងការរំពឹងទុកថា អត្រាការប្រាក់នឹងត្រូវបានកាត់បន្ថយនៅពេលក្រោយ បន្ទាប់ពីធនាគារកណ្តាលអាមេរិកបានរក្សាអត្រាគោលរបស់ខ្លួននៅក្នុងកម្រិតពី ៤.២៥%-៤.៥០% កាលពីថ្ងៃពុធ។ អ្នកបង្កើតគោលនយោបាយបានរំពឹងថា ធនាគារកណ្តាលអាមេរិកនឹងផ្តល់នូវការកាត់បន្ថយអត្រាការប្រាក់ចំនួន២លើកនៅចុងឆ្នាំនេះ ខណៈដែលតម្លៃមាសតែងតែងើបឡើងនៅពេលអត្រាការប្រាក់ទាប។
លោក Jerome Powell ប្រធានធនាគារកណ្តាលអាមេរិកបានថ្លែងថា គោលនយោបាយដំបូងរបស់ប្រធានាធិបតីអាមេរិក លោក ដូណាល់ ត្រាំ (Donald Trump) រួមទាំងពន្ធនាំចូលផងនោះ ហាក់ដូចជាបានធ្វើឱ្យសេដ្ឋកិច្ចសហរដ្ឋអាមេរិកមានកំណើនយឺត ហើយយ៉ាងហោចណាស់អាចបង្កើតអតិផរណាខ្ពស់ជាបណ្ដោះអាសន្ន។
ពន្ធនាំចូលរបស់លោក ត្រាំ ដែលនាំធ្វើឱ្យមានភាពតានតឹងពាណិជ្ជកម្មសកលត្រូវបានគិតថាអាចបង្កើតជាអតិផរណា និងធ្វើឱ្យប៉ះពាល់ដល់កំណើនសេដ្ឋកិច្ចអាមេរិក។ ភាពមិនប្រាកដប្រជាសង្គ្រាមពន្ធ លទ្ធភាពកាត់បន្ថយអត្រាការប្រាក់របស់ធនាគារកណ្តាលអាមេរិក និងការបន្តភាពតានតឹងនៅតំបន់មជ្ឈិមបូព៌ាបានរួមចំណែកដល់តម្រូវការមាសកាន់តែខ្លាំងឡើង៕
ចែករំលែកព័តមាននេះ