ប្រទេសវៀតណាម ៖ ក្រុមបាល់ទាត់ជម្រើសជាតិវៀតណាមបានយកឈ្នះក្រុមជម្រើសជាតិកម្ពុជា ដោយលទ្ធផល ២-១ ក្នុងការប្រកួតមិត្តភាពអន្តរជាតិដកស្រង់បច្ចេកទេស រៀបចំឡើងនៅកីឡដ្ឋាន Go Dau ដែលមានមូលដ្ឋានក្នុងខេត្ត…
ប្រទេសវៀតណាម ៖ ក្រុមបាល់ទាត់ជម្រើសជាតិវៀតណាមបានយកឈ្នះក្រុមជម្រើសជាតិកម្ពុជា ដោយលទ្ធផល ២-១ ក្នុងការប្រកួតមិត្តភាពអន្តរជាតិដកស្រង់បច្ចេកទេស រៀបចំឡើងនៅកីឡដ្ឋាន Go Dau ដែលមានមូលដ្ឋានក្នុងខេត្ត Binh Duong របស់ខ្លួន កាលពីថ្ងៃទី១៩ ខែមីនា ឆ្នាំ២០២៥។
ជ័យជម្នះម្ចាស់ផ្ទះវៀតណាម សម្រេចបានដោយខ្សែបម្រើ Nguyen Hai Long នៅនាទី២៦ និងខ្សែការពារ Nguyen Van Vi នៅនាទី៣៥ មុនពេលកីឡាករ បុង សាំយូអ៊េល ស៊ុតពីចម្ងាយរកបាន១គ្រាប់ឱ្យកម្ពុជា នៅនាទី៦៤ ដែលនេះគឺជាការបង្ហាញខ្លួនលើកដំបូងរបស់ខ្សែបម្រើវ័យក្មេងក្រុមភ្នំពេញក្រោនរូបនេះ ជាមួយក្រុមឈុតធំ។
ក្រោយចប់ការប្រកួត លោក Koji Gyotoku គ្រូបង្វឹកគោព្រៃកម្ពុជា បានថ្លែងថា «នៅតង់ទី២ យើងលេងបានល្អ។ ប៉ុន្តែបើប្រៀបធៀបក្រុមទាំងពីរ វៀតណាមមានប្រៀបជាងខាងកម្លាំង និងបច្ចេកទេស។ ពួកគេក៏បានរៀបចំយ៉ាងប្រុងប្រយ័ត្នក្នុងចំណុចជាច្រើន។ នៅក្នុងតង់ទី១ ពួកគេក៏លេងបានល្អជាងផងដែរ។ ទោះបីជាខ្ញុំមិនពេញចិត្តនឹងលទ្ធផលនេះក៏ដោយ ប៉ុន្តែទម្រង់លេងរបស់កីឡាករកម្ពុជាមិនអន់ឡើយ»។
គ្រូបង្វឹកជនជាតិជប៉ុនរូបនេះ បានបន្ថែមថា «នៅតង់ទី១ យើងមិនអាចមានបាល់លេងបានច្រើនទេ ជាពិសេសតំបន់បម្រើ។ នៅក្នុងតង់ទី២ ខ្ញុំបានរកឃើញបញ្ហារបស់ក្រុម ហើយពីការរកឃើញនោះ យើងបានគ្រប់គ្រងបាល់បន្ថែមទៀត។ បន្ទាប់ពីការប្រកួតនេះ ខ្ញុំនឹងត្រឡប់ទៅពិភាក្សាជាមួយកីឡាករដើម្បីឱ្យពួកគេកែលម្អ»។ នេះបើយោងតាមប្រភពពីសារព័ត៌មានវៀតណាម Znews បានចេញផ្សាយ។
ដោយឡែក លោក Kim Sang-sik គ្រូបង្វឹកក្រុមអ្នកចម្បាំងផ្កាយមាសវៀតណាម ក៏បានលើកឡើងក្រោយចប់ការប្រកួតថា «នៅក្នុងតង់ទី១ យើងបានប្រើយុទ្ធសាស្ត្រលេងដោយគ្មានខ្សែប្រយុទ្ធ។ តាមរបៀបនោះ Quang Hai លេងនៅតំបន់កណ្តាល។ ហើយតាមការគ្រោងទុក Hai Long បានស៊ុតបាល់បញ្ចូលទី។ ចូលដល់តង់ទី២ នៅពេលការប្រកួតកាន់តែស្វិតស្វាញ និងសម្ពាធពីកម្ពុជាកើនឡើង យើងមានបញ្ហាបន្តិចបន្តួចក្នុងការទប់ស្កាត់គូប្រកួត។ ក្រៅពីនេះ Hoang Duc និង Quang Hai ក៏មានបញ្ហារបួសស្រាលផងដែរ ដូច្នេះកីឡាករបម្រុងមានការលំបាកច្រើនក្នុងការទប់ស្កាត់គូប្រកួត»។
ភារកិច្ចបន្ទាប់ក្រុមគោព្រៃកម្ពុជា ត្រូវបើកទ្វារពហុកីឡដ្ឋានជាតិ (អូឡាំពិក) ស្វាគមន៍ក្រុមជម្រើសជាតិអារូបា សម្រាប់ជំនួបមិត្តភាពអន្តរជាតិ វេលាម៉ោង ៧:០០នាទីយប់ នៅថ្ងៃទី២៥ ខែមីនា ឆ្នាំ២០២៥។ ចំណែកវៀតណាមតាមរយៈជ័យជម្នះលើកម្ពុជា នឹងជួយពួកគេត្រៀមខ្លួនបានយ៉ាងល្អ សម្រាប់ការប្រកួតបើកឆាកពូល F វគ្គជម្រុះពានរង្វាន់ Asian Cup ឆ្នាំ ២០២៧ ទល់នឹងក្រុមជម្រើសជាតិឡាវ នៅកីឡដ្ឋាន Go Dau នៅថ្ងៃទី២៥ ខែមីនា ខាងមុខនេះផងដែរ៕ រូបភាព ៖ សហព័ន្ធកីឡាបាល់ទាត់កម្ពុជា និង Znews
ចែករំលែកព័តមាននេះ