សង្គ្រាមអ៊ុយក្រែន ៖ បន្ទាប់ពីជួបពិភាក្សាគ្នា ជាមួយប្រធានាធិបតីរុស្ស៊ី លោកវ្ល៉ាឌីមៀរ ពូទីន ប្រធានាធិបតីអាមេរិក លោកដូណាល់ត្រាំ បានជួបពិភាក្សាគ្នាតាមទូរស័ព្ទ កាលពីថ្ងៃទី១៩មីនា…
សង្គ្រាមអ៊ុយក្រែន ៖ បន្ទាប់ពីជួបពិភាក្សាគ្នា ជាមួយប្រធានាធិបតីរុស្ស៊ី លោកវ្ល៉ាឌីមៀរ ពូទីន ប្រធានាធិបតីអាមេរិក លោកដូណាល់ត្រាំ បានជួបពិភាក្សាគ្នាតាមទូរស័ព្ទ កាលពីថ្ងៃទី១៩មីនា ជាមួយសមភាគីអ៊ុយក្រែន លោកវ៉ូ់ឡូឌីមៀរ ហ្សេឡេនស្គី ម្ដង ។
តាមបណ្ដាញសង្កម TRUTH SOCIAL របស់លោក ប្រធានាធិបតីអាមេរិក ចាត់ទុកការជួបគ្នាជាមួយប្រធានាធិបតីអ៊ុយក្រែនថា ជាការសន្ទនាគ្នាដ៏ល្អបំផុត ដើម្បីស្វែងរកកិច្ចព្រមព្រៀងមួយរវាងក្រុងគៀវនិងក្រុងមូស្គូ។ ចំណែកលោកហ្សេឡេនស្គិវិញ អះអាងតាមបណ្ដាញសង្គមថា បានពិភាក្សាដោយវិជ្ចមាននិងដោយត្រង់ៗជាមួយសមភាគីអាមេរិក។
ការជួបពិភាក្សាគ្នារវាងប្រធានាធិបតីទាំង២នោះ កើតមានបន្ទាប់ពីការជួបគ្នាតាមទូរស័ព្ទ រវាងលោកពូទីននិងលោកត្រាំ។ ក្រោយការជួបគ្នានោះលោកពូទីន ព្រមទទួលយកការឈប់វាយប្រហារលើបណ្ដាហេដ្ឋារចនាសម្ព័ន្ធថាមពលនៅអ៊ុយក្រែនរយៈពេល៣០ថ្ងៃ។ លោកពូទីនបានចេញបញ្ជាភ្លាមៗដល់កងទ័ពលោកឲ្យអនុវត្តបែបនោះ។
ចំណែកសេតវិមានវិញ ក្នុងសេចក្ដីប្រកាសរបស់ខ្លួនអះអាងថា មេដឹកនាំទាំង២បានព្រមព្រៀងគ្នាថា ចលនាឆ្ពោះទៅរកសន្តិភាពនឹងចាប់ផ្ដើម តាមរយៈការឈប់វាយប្រហារលើបណ្ដាហេដ្ឋារចនាសម្ព័ន្ធ្ថថាមពល។
លើសពីបទឈប់បាញ់រយៈពេល៣០ថ្ងៃ លើហេដ្ឋារចនាសម្ព័ន្ធថាមពលនៅអ៊ុយក្រែន លោកត្រាំនិងលោកពូទីនបានយល់ស្របគ្នាថា ការចរចាស្ដីពីជម្លោះនឹងចាប់ផ្ដើមភ្លាមៗ។ សេតវិមានប្រកាសថា ការចរចាគ្នានោះនឹងធ្វើនៅមជ្ឈឹមបូព៌ា។ តាមសេតវិមានថា ការចរចានោះពិសេសផ្ដោតលើបញ្ហាបច្ចេកទេស នៃការអនុវត្តបទឈប់បាញ់គ្នានៅសមុទ្រខ្មៅ បទឈប់បាញ់គ្នាទាំងស្រុងមួយនិងសន្តិភាពជាអចិន្ត្រៃយ៍។
លើចំណុចនោះលោកហ្សេឡេនស្គីនិយាយថា លោកគាំទ្រ ដំណើរការនោះនិងអះអាងពីឆន្ទៈលោកក្នុងការអនុវត្ត។ លោកបន្តថាសម្រាប់រូបលោកយល់ថានោះអាចជាដំណាក់កាលដំបូងមួយឆ្ពោះទៅបញ្ចប់សង្គ្រាម។
ទាក់ទិននឹងការបង្កើតការធានាសន្តិសុខក្នុងដែនដីអ៊ុយក្រែន លោកត្រាំំគូសបញ្ជាក់ប្រាប់លោកហ្សេឡេនស្គីថា សហរដ្ឋអាមេរិកអាចគ្រប់គ្រងបណ្ដាមជ្ឈមណ្ឌលនុយក្លេអ៊ែរ និងអគ្គិសនីអ៊ុយ
ក្រែន។ តាមអ្នកនាំពាក្យសេតវិមានលោកស្រីការ៉ូលីនលីវីតថា នោះនឹងជាកិច្ចការពារនិងការជួយទ្រទ្រង់ដ៏ប្រសើរ សម្រាប់បណ្ដាហេដ្ឋារចនាសម្ព័ន្ធថាមពលអ៊ុយក្រែន។ ដើម្បីការពារអ៊ុយក្រែនលោកត្រាំក៏អះអាងផងដែរថា លោកនឹងជួយអ៊ុយក្រែន ឲ្យទទួលបានប្រព័ន្ធការពារអាកាសថែមទៀតពិសេសនៅអឺរ៉ុប។
ការផ្លាស់ប្ដូរគ្នាខាងការទូតរវាងក្រុងវ៉ាសិុនតោននិងក្រុងគៀវនឹងបន្តទៀតនាប៉ុន្មានថ្ងៃខាងមុខ។ យោងតាមប្រធានាធិបតីអ៊ុយក្រែនថា ការផ្លាស់ប្ដូរគ្នានោះធ្វើឡើងតាមរយៈក្រុមរបស់អ៊ុយក្រែននិងអាមេរិកដែលនឹងជួបគ្នានៅអារ៉ាប៊ីសាអូឌីត។
ក៏ទោះបីមានការផ្លាស់ប្ដូរគ្នាខាងការទូតជាច្រើនរយៈពេលប៉ុន្មានថ្ងៃចុងក្រោយនេះក្ដី តែកិច្ចព្រមព្រៀងឈប់បាញ់គ្នា រវាងក្រុងគៀវនិងក្រុងមូស្គូហាក់ដូចជានៅឆ្ងាយនៅឡើយ។ ការវាយប្រហារគ្នាននៅតែបន្ត។ រុស្សុីនិងអ៊ុយក្រែនបានចោទប្រកាន់គ្នាទៅវិញទៅមកថា វាយប្រហារតាមអាកាស កាលពីយប់ថ្ងៃទី១៨ទៅ១៩មីនា។
កងទ័ពរុស្ស៊ីបានបាញ់មីស៊ីល៦គ្រាប់ និងបញ្ចេញដ្រូន១៤៥គ្រឿង វាយប្រហារលើអ៊ុយក្រែន។ ចំណែកកងការពារអាកាសរុស្ស៊ីវិញអះអាងពីការបាញ់ទម្លាក់ដ្រូនអ៊ុយក្រែន៥៧គ្រឿង ៕
/
ចែករំលែកព័តមាននេះ