ទីក្រុងកៀវ៖ សន្ទនាគ្នារវាងលោកត្រាំ និងលោកពូទីនកាលពីយប់មិញរហូតមកដល់ពេលនេះមិនទាន់បានប៉ុន្មានម៉ោងផង រុស្ស៊ីពន្លះអ៊ុយក្រែនមួយប្រាវទៀតដោយយន្តហោះដ្រូនជាច្រើនគ្រឿង រួមទាំងមីស៊ីលផងដែរបណ្ដាលឱ្យស្លាប់មនុស្សយ៉ាងតិច២នាក់ និងរបួស១៨នាក់។ នេះបើយោងតាមការផ្សាយរបស់សារព័ត៌មានកៀវឯករាជ្យ (The Kyiv Independent)។…
ទីក្រុងកៀវ៖ សន្ទនាគ្នារវាងលោកត្រាំ និងលោកពូទីនកាលពីយប់មិញរហូតមកដល់ពេលនេះមិនទាន់បានប៉ុន្មានម៉ោងផង រុស្ស៊ីពន្លះអ៊ុយក្រែនមួយប្រាវទៀតដោយយន្តហោះដ្រូនជាច្រើនគ្រឿង រួមទាំងមីស៊ីលផងដែរបណ្ដាលឱ្យស្លាប់មនុស្សយ៉ាងតិច២នាក់ និងរបួស១៨នាក់។ នេះបើយោងតាមការផ្សាយរបស់សារព័ត៌មានកៀវឯករាជ្យ (The Kyiv Independent)។
កាសែតអនឡាញដដែលនេះផ្សាយបន្តទៀតថារុស្ស៊ីបានបាញ់មីស៊ីលផ្លោងម៉ាកអ៊ីស្កាន់ដឺអឹម (Iskander-M) ចំនួន២គ្រាប់, បាញ់មីស៊ីលការពារដែនអាកាសម៉ាកអែស៣០០ (S-300) និងបញ្ជូនយន្តហោះដ្រូនពិត និងដ្រូនក្លែងក្លាយ១៤៥គ្រឿងវាយប្រហារអ៊ុយក្រែនយ៉ាងសន្ធាប់កាលពីយប់មិញទៅលើទីតាំងជាច្រើនកន្លែង។ អ៊ុយក្រែនអាចបាញ់ទម្លាក់ដ្រូន៧២គ្រឿង។ ចំណែកដ្រូនក្លែងក្លាយ (ប្រើសម្រាប់បោកបញ្ឆោតប្រព័ន្ធការពារដែនអាកាស) ហោះសុខៗស្រាប់តែបាត់ដានអស់រលីង។
កងទ័ពអាកាសអ៊ុយក្រែនមិនបានធ្វើអត្ថាធិប្បាយថាគ្រាប់មីស៊ីលរុស្ស៊ីបានបង្កការខូចខាតកម្រិតណាទេ។ រុស្ស៊ីក៏វាយប្រហារទៅលើទីក្រុងស្លូវីយ៉ង់ (Sloviansk) នៃតំបន់ដូញែត (Donetsk) ផងដែរបណ្ដាលឱ្យរបួសមនុស្សបីនាក់។ នេះបើយោងតាមចៅហ្វាយក្រុងស្លូវីយ៉ង់ លោកវ៉ាឌីម ហ្វ៊ីឡាស់ស្គីន (Vadym Filashkin)។ សាក្សីនិយាយថាផ្នែកខ្លះនៃទីក្រុងស្លូវីយ៉ង់ពោរពេញដោយភាពងងឹតសូន្យសុងបន្ទាប់ពីដាច់ភ្លើងអគ្គិសនី។
ក្រឡេកទៅមើលតំបន់ខាគីវ (Kharkiv) ឯណោះវិញ រុស្ស៊ីក៏វាយប្រហារផងដែរកាលពីយប់មិញបណ្ដាលឱ្យស្ត្រីវ័យ៤៥ឆ្នាំម្នាក់ស្លាប់ ខណៈដែលមនុស្ស៤នាក់ទៀតរងរបួស។ កាលនោះ រុស្ស៊ីប្រើប្រាស់ដ្រូនវាយប្រហារត្រូវចំរថយន្តមួយគ្រឿងដែលកំពុងបើកបរនៅលើផ្លូវហាយវេ។ នេះបើយោងតាមការបង្ហើបឱ្យដឹងពីអភិបាលតំបន់ខាគីវ។ នៅតំបន់ខាគីវដដែលនេះ គេឃើញថាផ្ទះរបស់អ្នកស្រុក រួមទាំងដេប៉ូស្តុកទុកឥវ៉ាន់ ត្រាក់ទ័រ និងរថយន្តជាច្រើនគ្រឿងបានរងការខូចខាត។
នៅសង្កាត់ប៊ូឆា (Bucha) នៃទីក្រុងកៀវ បុរសម្នាក់វ័យ៦០ឆ្នាំត្រូវរបួសពេញខ្លួនដោយសារអំបែងគ្រាប់មីស៊ីល។ ផ្ទះរបស់អ្នកស្រុក៩ខ្នងរងការខូចខាត។ ចំណែកនៅទីក្រុងស៊ូមី (Sumy) មន្ទីរពេទ្យ១កន្លែងក៏រងការវាយប្រហារផងដែរដោយយន្តហោះដ្រូនជាច្រើនគ្រឿង។ ដូច្នេះ អ្នកជំងឺដែលកំពុងឈឺធ្ងន់ បន្តោកសេរ៉ូមយ៉ាងណាក៏ដោយក៏ត្រូវតែរត់ប្រាសអាយុសិនដែរ។
នៅភូមិអ៊ូរ៉យឌី (Uhroidy) នៃសហគមន៍ក្រាស់ស្នូភីលា (Krasnopillia) មនុស្សម្នាក់ស្លាប់ បីនាក់រងរបួស និងផ្ទះកម្ពស់២ជាន់រងការខូចខាតដោយសារការវាយប្រហាររបស់រុស្ស៊ី។ វាយប្រហារកាលពីពេលយប់មិនទាន់អស់ចិត្ត នៅព្រឹកថ្ងៃទី១៩ ខែមីនា រុស្ស៊ីបញ្ជូនដ្រូនទៅវាយប្រហារកាប៊ីនភ្លើងសម្រាប់ដំណើរការផ្លូវរថភ្លើងនៅតំបន់ឌីនីប្រូ (Dnipro)ជាបន្តទៀត។ ប៉ុន្តែសំណាងល្អរថភ្លើងអាចដំណើរការបានជាធម្មតាទោះបីមានបញ្ហាដាច់ភ្លើងក៏ដោយ។
គួរកត់សម្គាល់ថានៅក្នុងការសន្ទនាគ្នាជាមួយលោកត្រាំកាលពីយប់មិញ លោកពូទីនយល់ព្រមផ្អាកវាយប្រហារគ្នាទៅវិញទៅមករវាងរុស្ស៊ី និងអ៊ុយក្រែនទៅលើទីតាំងផលិតថាមពល (អគ្គិសនី ប្រេង និងហ្គាស។ល។) រយៈពេល៣០ថ្ងៃ។ ប៉ុន្តែលោកទាំង២មិនទាន់បានកំណត់ឱ្យបានច្បាស់ថានឹងរៀបចំកិច្ចព្រមព្រៀងនេះនៅពេលណា ហើយនឹងអនុវត្តចាប់ពីពេលណាទេ។ លោកពូទីនបញ្ជាក់ថាលោកយល់ព្រមផ្អាកវាយប្រហារទាល់តែអ៊ុយក្រែនយល់ព្រមផ្អាកវាយប្រហារទៅលើរុស្ស៊ីដែរ។ នេះបើយោងតាមសេចក្ដីប្រកាសរបស់វិមានក្រឹមឡាំងកាលពីយប់មិញ៕
ចែករំលែកព័តមាននេះ