រាជធានីភ្នំពេញ ៖ បុរសអ្នកអូសរទេះដើររើសអេតចាយពេលយប់ម្នាក់ ទំនងជាអស់កម្លាំងពេកនិងអត់ងងុយផងនោះទៅមុខលែងរួច ក៏បានប្រះខ្លួនដេកនៅលើបង់ថ្មមុខសាលាបុណ្យភូមិមួយកន្លែងនៅវេលាទៀបភ្លឺ ។ លុះដល់ព្រឹកឡើងអត់ឃើញក្រោកទៅណាសោះ អ្នកភូមិបាននាំគ្នាដាស់ឲ្យក្រោក ស្រាប់តែប្រទះឃើញគាត់ស្លាប់បាត់បង់ជីវិតបាត់ទៅហើយ ចំពោះការស្លាប់នេះសមត្ថកិច្ចសង្ស័យថាបណ្ដាលមកពីជំងឺខ្យល់គ ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង៦ព្រឹកថ្ងៃទី១៩ ខែមីនា ឆ្នាំ២០២៥ នៅលើកៅអីថ្មមុខសាលាបុណ្យភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
អ្នកភូមិព្រៃទា១ដែលមានទីលំនៅជិតកន្លែងកើតហេតុនោះបាននិយាយថា បុរសដែលស្លាប់ខាងលើនោះឈ្មោះ កង អ៊ុយ អាយុ៤១ឆ្នាំ ស្នាក់នៅក្នុងភូមិកើតហេតុនោះដែរ គាត់គឺជាអ្នកអូសរទេះដើររើសអេតចាយគ្រប់ច្រកល្ហកពេលយប់ជារៀងរាល់ថ្ងៃ ។ ដោយឡែកនៅវេលាម៉ោងប្រមាណ៣ទៀបភ្លឺថ្ងៃកើតហេតុ ប្រហែលជសបុរសនោះអស់កម្លាំងខ្លាំងពេក ហើយមិនស្រួលខ្លួនផង ព្រោះដើររើសអេតចាយមិនបានដេកពួននោះ ក៏បានទៅដេកនៅលើបង់ថ្មនៅមុខសាលាបុណ្យភូមិដោយយកជើងគងលើរទេះអេតចាយរបស់គាត់និងបានលង់លក់យ៉ាងស្រួល ។
អ្នកភូមិដដែលបានប្រាប់ឲ្យដឹងបន្តទៀតថា ខណៈនោះពួកគាត(អ្នកភូមិ) បាននាំគ្នាទៅមើលដែរ ប៉ុន្តែមិនមាននរណាហ៊ានដាស់បុរសនោះឲ្យក្រោកឡើយ ព្រោះឃើញដេកលក់ស្រួលពេក ហើយនឹកស្មានថាបុរសនេះអស់កម្លាំងផងឲ្យដេកបានស្កប់ទៅចុះ ។ ប៉ុន្តែរហូតដល់វេលាម៉ោង៦ព្រឹកថ្ងៃដដែល នៅតែដេកអត់ឃើញបុរសនេះភ្ញាក់ក្រោកចេញទៅណាសោះ ទើបពួកគាត់ចូលទៅដាស់ ស្រាប់តែឃើញបុរសនោះស្លាប់បាត់ទៅហើយ ក៏មានការភ្ញាក់ផ្អើលទាំងព្រឹកតែម្ដង ។
បន្ទាប់មកពួកគាត់បានរាយការណ៍ជូនអាជ្ញាធរភូមិដើម្បីជួយរាយការណ៍បន្តទៅកាន់សមត្ថកិច្ចឲ្យជួយចុះទៅមើល និងធ្វើកោសល្យវិច័យ ហើយសមត្ថកិច្ចដាក់ការសង្ស័យថា បុរសនេះស្លាប់ដោយជំងឺខ្យល់គ ៕
ចែករំលែកព័តមាននេះ