ឃាត់ខ្លួនជនសង្ស័យ០៤នាក់ ករណីស្ទាក់វាយកំហែងយកម៉ូតូតាមដងផ្លូវនៅស្រុកបសេដ្ឋ
ខេត្តកំពង់ស្ពឺ ៖ លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ បានបញ្ជាកម្លាំងនគរបាល ឲ្យបើកប្រតិបត្តិការស្រាវជ្រាវ រយៈពេល ៧២ម៉ោង…
ខេត្តកំពង់ស្ពឺ ៖ លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ បានបញ្ជាកម្លាំងនគរបាល ឲ្យបើកប្រតិបត្តិការស្រាវជ្រាវ រយៈពេល ៧២ម៉ោង ឈានដល់ការបង្ក្រាប និងឃាត់ខ្លួនជនសង្ស័យ ០៤នាក់ (ជាមុខសញ្ញា យ៉ាសកម្មករណីស្ទាក់វាយកំហែងយកម៉ូតូ (ប្លន់) តាមដងផ្លូវ ។
បើតាមស្នងការដ្ឋាននគរបាលខេត្តកំពង់ស្ពឺ បានអោយដឹងថា ក្រុមជនសង្ស័យ បានធ្វើសកម្មភាពធាក់យកម៉ូតូ លើឈ្មោះ ហៀង ឆៃយ៉ា ភេទប្រុស អាយុ១៨ឆ្នាំ រស់នៅភូមិព្រះម្លប់ ឃុំភារីមានជ័យ ស្រុកបសេដ្ឋ កាលពីថ្ងៃទី១៥ មីនា ២០២៥ វេលាម៉ោង២៣និង៥០នាទីយប់ នៅចំណុចផ្លូវកៅស៊ូ ស្ថិតក្នុងភូមិផ្សារស្លាបលែង ឃុំស្វាយរំពារ ស្រុកបសេដ្ឋ ខេត្តកំពង់ស្ពឺ ។
តាមការបញ្ជាក់ពីលោកវរសេនីយ៍ឯក ចន សុភីត អធិការ នគរបាលស្រុកបសេដ្ឋ និងដោយបានកិច្ចសហការពីកម្លាំងនគរបាលជំនាញ និងកម្លាំងអធិការដ្ឋាននគរបាលស្រុកជាប់ព្រំប្រទល់ ជំនាញព្រហ្មទណ្ឌស្រុកបសេដ្ឋ បានធ្វើការឃាត់មុខសញ្ញាបានជនសង្ស័យចំនួន ០៤នាក់ រួមនឹងវត្ថុតាង ម៉ូតូ ០២គ្រឿង (ម៉ូតូធ្វើសកម្មភាពប្លន់០១គ្រឿង និងម៉ូតូជនរងគ្រោះ០១គ្រឿង) ។
ជនសង្ស័យទាំង ០៤ នាក់ រួមមានឈ្មោះ ៖
១. ឈ្មោះ គិន ចាន់ណាប់ ភេទប្រុស អាយុ១៧ឆ្នាំ
២. ឈ្មោះ វ៉ាន់ ប៊ុនធា ហៅធឿន ភេទប្រុស អាយុ១៩ឆ្នាំ ទាំង០២នាក់ រស់នៅភូមិត្រពាំងផុងថ្មី ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ (ជាជនដៃដល់) ។
៣. ឈ្មោះ គឹម ដែន ភេទប្រុស អាយុ១៨ឆ្នាំ រសនៅភូមិឃ្លោក ឃុំព្រះខែ ស្រុកបសេដ្ឋ ខេត្តកំពង់ស្ពឺ ។
៤. ឈ្មោះ រិន ចាន់ធូ ភេទប្រុស អាយុ១៥ឆ្នាំ រស់នៅភូមិព្រៃបាក្រុង ឃុំព្រះខែ ស្រុកបសេដ្ឋ ខេត្តកំពង់ស្ពឺ ។
ការឃាត់ជនសង្ស័យទាំង៤នាក់ខាងលើនេះ ដោយបានការឯកភាពពីតំណាងអយ្យការ ផងដែរ ។ សមត្ថកិច្ចនគរបាលបានធ្វើការប្រគល់ម៉ូតូ ០១គ្រឿង ជូនជនរងគ្រោះ ដើម្បីប្រើប្រាស់វិញ រីឯមុខសញ្ញាបក្ខពួកចោរទាំង៤នាក់ ត្រូវបានកសាងសំណុំរឿងបញ្ជូនមកការិយាល័យជំនញ នៃស្នងការដ្ឋាននគរបាលខេត្តកំពង់ស្ពឺ ចាត់ការបន្តរតាមនីតិវិធី ៕
ចែករំលែកព័តមាននេះ