រាជធានីភ្នំពេញ ៖ ជនសង្ស័យម្នាក់និងបក្សពួក ត្រូវបាននគរបាលប៉ុស្តិ៍ចោមចៅទី៣នៃអធិការដ្ឋាននគរបាលខណ្ឌពោធិ៍សែនជ័យធ្វើការឃាត់ខ្លួន កាលពីវេលាម៉ោង៥និង២០នាទីព្រឹកថ្ងៃទី១៩ ខែមីនា ឆ្នាំ២០២៥ នៅចំណុចបន្ទប់ជួលភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ…
រាជធានីភ្នំពេញ ៖ ជនសង្ស័យម្នាក់និងបក្សពួក ត្រូវបាននគរបាលប៉ុស្តិ៍ចោមចៅទី៣នៃអធិការដ្ឋាននគរបាលខណ្ឌពោធិ៍សែនជ័យធ្វើការឃាត់ខ្លួន កាលពីវេលាម៉ោង៥និង២០នាទីព្រឹកថ្ងៃទី១៩ ខែមីនា ឆ្នាំ២០២៥ នៅចំណុចបន្ទប់ជួលភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ការឃាត់ខ្លួននោះ ក្រោយពីជនសង្ស័យខាងលើ ធ្វើសកម្មភាពលួចម៉ូតូ១គ្រឿងពីនារីបុគ្គលិកហាងផឹកស៊ីម្នាក់កាលពី១១ថ្ងៃមុន ហើយត្រូវនាងពឹងឲ្យមិត្តភក្ដិស្រីម្នាក់ឱ្យជួយប្រើល្បិចខលទៅទាក់ទងស្នេហា ទើបរកកន្លែងជននោះលាក់ខ្លួនឃើញ រួចប្ដឹងឲ្យនគរបាលជួយឃាត់ខ្លួនតែម្ដង ។
នគរបាលបានប្រាប់ឲ្យដឹងថា ជនសង្ស័យដែលត្រូវនគរបាលឃាត់ខ្លួននោះ ១-ឈ្មោះ អន សេងហ័រ អាយុ២០ឆ្នាំ គឺជាមិត្តភក្ដិនិងជាអ្នកលួចម៉ូតូនារីរងគ្រោះ ២-ឈ្មោះ ទិន វិច្ឆកា អាយុ១៨ឆ្នាំ គឺជាអ្នកផ្សំគំនិត ៣-ឈ្មោះ នី អាយុ១៨ឆ្នាំ ជាអ្នកស្នាក់នៅបន្ទប់ជួលខាងលើជាមួយគ្នា មិនជាប់ពាក់ព័ន្ធនោះទេ ប៉ុន្តែក៏ត្រូវនគរបាលឃាត់ទៅសួរនាំដែរ ព្រោះស្នាក់នៅបន្ទប់ជួលជាមួយគ្នា ។ ខណៈនោះ កម្លាំងនគរបាលដកហូតបានម៉ូតូ១គ្រឿង ម៉ាកស៊ុយហ្ស៊ុយគីនិក១គ្រឿង ពណ៌.ស លាយលឿងពាក់ស្លាកលេខព្រៃវែង1Y-0227 ។
នគរបានបានប្រាប់បន្តទៀតថា ចំណែកនារីរងគ្រោះឈ្មោះប៉ិច ស៊ី អាយុ២០ឆ្នាំ មុខរបរបុគ្គលិកហាង ផឹកស៊ី ស្នាក់បន្ទប់ជួលស្ថិតនៅភូមិតាសេក សង្កាត់កំបូល ខណ្ឌកំបូល រាជធានីភ្នំពេញ និងមានមានស្រុកកំណើតនៅភូមិព្រែកឆ្តោ ឃុំកំពង់អុស ស្រុកជល់គីរី ខេត្តកំពង់ឆ្នាំង ។ បាត់បង់ម៉ូតូ១គ្រឿងម៉ាកGPX POP -Z ពណ៍ខ្មៅលាយស និងក្រហមពាក់ស្លាកលេខកំពង់ឆ្នាំង1O-1412 ។
នគរបាលបានបញ្ជាក់ប្រាប់ថា ជនសង្ស័យឈ្មោះ អន សេងហ័រ បានស្គាល់រាប់អានគ្នាជាមិត្តភក្ដិជាមួយនារីរងគ្រោះ ទើបបានរយៈពេល២ខែប៉ុណ្ណោះ ហើយបានទៅលេងនាងដល់បន្ទប់ជួល នៅនៅភូមិតាសេក សង្កាត់កំបូល ខណ្ឌកំបូល រាជធានីភ្នំពេញ២លើកមកហើយ ។ លុះលើកទី៣ នៅវេលារសៀលថ្ងៃទី០៨ ខែមីនា ឆ្នាំ២០២៥ ទៅលេងម្ដងទៀត ហើយឆ្លៀតពេលជនរងគ្រោះទុកចិត្ត និងភ្លេចខ្លួនជននោះក៏បានលួចយកម៉ូតូរបស់នាងទុកនៅជាន់ក្រោមនៃផ្ទះជួល រួចជិះគេចខ្លួនបាត់ស្រមោល ។
នគរបាលបានប្រាប់ឲ្យដឹងបន្ថែមផងដែរថា ប៉ុន្តែក្រោយពេលគេចខ្លួនបានរយៈពេល១១ថ្ងៃ ក៏ត្រូវជនរងគ្រោះពឹងមិត្តភក្ដិស្រីរបស់នាងម្នាក់ទៀត ឲ្យប្រើល្បិចខលទាក់ទងស្នេហា ទើបដឹងពីទីកន្លែងដែលជននោះលាក់ខ្លួន រួចប្ដឹងនគរបាលប៉ុស្តិ៍ចោមចៅទី៣ នៃអធិការដ្ឋាននគរបាលខណ្ឌពោធិ៍សែនជ័យ ឲ្យជួយឃាត់ខ្លួនជននោះនិងបក្សពួក២នាក់ទៀតផងដែរ ។ បន្ទាប់ពីការសួរនាំមួយជំហានរួចមក នគរបាលប៉ុស្តិ៍ចោមចៅទី៣ ក៏បានប្រគល់ជនសង្ស័យទាំង៣នាក់ ទៅឲ្យនគរបាលខណ្ឌកំបូល ដើម្បីសួរនាំនិងចាត់ការបន្ត ព្រោះទីតាំងកើតហេតុកន្លែងដែលលួចម៉ូត គឺស្ថិតនៅឯបន្ទប់ជួលក្នុងភូមិតាសេក សង្កាត់កំបូល ខណ្ឌកំបូលនោះ ៕
ចែករំលែកព័តមាននេះ