សង្គ្រាមអ៊ុយក្រែន ៖ ប្រធានាធិបតីរុស្ស៊ី លោកវ្ល៉ាឌីមៀរពូទីន និងសមភាគីអាមេរិក លោកដូណាល់ត្រាំ់ បានជួបពិភាក្សាគ្នាតាមទូរស័ព្ទលើកទី២ កាលពីថ្ងៃទី១៨ មីនា ។…
សង្គ្រាមអ៊ុយក្រែន ៖ ប្រធានាធិបតីរុស្ស៊ី លោកវ្ល៉ាឌីមៀរពូទីន និងសមភាគីអាមេរិក លោកដូណាល់ត្រាំ់ បានជួបពិភាក្សាគ្នាតាមទូរស័ព្ទលើកទី២ កាលពីថ្ងៃទី១៨ មីនា ។ គិតទៅបានជាង១ខែបន្ទាប់ពីការជួបគ្នាបែបនោះលើកទីមួយជាប្រវត្តិសាស្ត្រ។ ការកែលម្អទំនាក់ទំនងរវាងអាមេរិក និងរុស្សុីនេះ នាំឲ្យពួកអឺរ៉ុបនិងអ៊ុយក្រែនមានការព្រួយបារម្ភថា ត្រូវគេផាត់ចេញពីការចរចា ដើម្បីបញ្ចប់សង្គ្រាមចាប់តាំងពី៣ឆ្នាំមកហើយនៅអ៊ុយក្រែន។
ស្ថិតក្រោមការគាបសង្កត់របស់លោកត្រាំដែលចោទខ្លួនថា ជាប្រភពនៃជម្លោះអ៊ុយក្រែនកាលពី
សប្ដាហ៍មុន ព្រមទទួលយកសំណើឈប់បាញ់គ្នារយៈពេល៣០ថ្ងៃ រៀបរៀងដោយអាមេរិក។ បន្ទាប់ពីការជួបគ្នាតាមទូរស័ព្ទលើកទី២នោះ ដែលមានរយៈពេលប្រមាណ២ម៉ោង កាលពីថ្ងៃទី១៨មីនា សេតវិមាននិងវិមានក្រឹមឡាំង ចេញផ្សាយរៀងខ្លួនសេចក្ដីប្រកាសលម្អិតនៃសេចក្ដីប្រកាសសំខាន់ៗ។
តាមវិមានក្រឹមឡាំងថា រុស្សុីព្រមទទួលយក ការឈប់វាយប្រហារលើបណ្ដាហេដ្ឋារចនាសម្ព័ន្ធថាមពលនៅអ៊ុយក្រែនរយៈពេល៣០ថ្ងៃ។ លោកពូទីនបានចេញបញ្ជាភ្លាមៗឲ្យអនុវត្តដល់កងយោធារុស្សុី។ ចំណែកសេតវិមានវិញក្នុងសេចក្ដីប្រកាសរបស់ខ្លួនអះអាងថា មេដឹកនាំទាំង២បានព្រមព្រៀងគ្នាថា ចលនាឆ្ពោះទៅរកសន្តិភាពនឹងចាប់ផ្ដើម តាមរយៈការឈប់វាយប្រហារលើបណ្ដាហេដ្ឋារចនាសម្ព័ន្ធ្ថថាមពល។
លើសពីបទឈប់បាញ់រយៈពេល៣០ថ្ងៃលើហេដ្ឋារចនាសម្ព័ន្ធថាមពលនៅអ៊ុយក្រែន លោកត្រាំនិងលោកពូទីនបានយល់ស្របគ្នាថា ការចរចាស្ដីពីជម្លោះនឹងចាប់ផ្ដើមភ្លាមៗ។ សេតវិមានប្រកាសថាការចរចាគ្នានោះនឹងធ្វើនៅមជ្ឈឹមបូព៌៌ាដោយលើកពីការរីកចម្រើនធំធេងនៃទំនាក់ ទំនងល្អប្រសើររវាងសហរដ្ឋអាមេរិកនិងរុស្សុី។ តាមសេតវិមានថា ការចរចានោះពិសេសផ្ដោតលើបញ្ហាបច្ចេកទេស នៃការអនុវត្តបទឈប់បាញ់គ្នានៅសមុទ្រខ្មៅ បទឈប់បាញ់គ្នាទាំងស្រុងមួយនិងសន្តិភាពជាអចិន្ត្រៃយ៍។
លោកពូទីនអំពាវនាវឲ្យមានដំណោះស្រាយជម្លោះជាសកល ស្ថិតស្ថេរនិងយូរអង្វែង ដោយគិតដល់ផលប្រយោជន៍នៃសន្តិសុខរបស់រុស្សុីនិងប្ញសគល់នៃជម្លោះ។តាមបណ្ដាញសង្គមTRUTH SOCIAL របស់លោក ប្រធានាធិបតីអាមេរិកលើកឡើងថា នឹងធ្វើការជាមួយប្រធានាធិបតីរុស្សុីដើម្បីឲ្យទទួលបានបទឈប់បាញ់គ្នាទាំងស្រុង ហើយក្នុងរយៈពេលខ្លីបញ្ចប់សង្គ្រាមដ៏សែនទារុណនោះរវាងរុស្សុីនិងអ៊ុយក្រែន។
ក្នុងការសន្ទនាគ្នាតាមទូរស័ព្ទនោះដែរ លោកពូទីនប្រកាសថា រុស្សុីនិងអ៊ុយក្រែននឹងធ្វើការដោះដូរឈ្លើយសឹកគ្នាម្ខាងៗ១៧៥នាក់។ លោកពូទីនអះអាងថា នាថ្ងៃទី១៩មីនាភាគីរុស្សុីនិងភាគីអ៊ុយក្រែន ដោះដូរឈ្លើយសឹកគ្នាម្ខាងៗ១៧៥នាក់។ លោកពូទីនកំណត់បណ្ដាលក្ខខណ្ឌសម្រាប់បទឈប់បាញ់គ្នានៅអ៊ុយក្រែន ក្នុងនោះមានការបញ្ឈប់ផ្ដល់អាវុធដល់អ៊ុយក្រែន។ ក្នុងសេចក្ដីប្រកាសមួយរុស្សុីរៀបរាប់ថា ភាគីរុស្សុីគូសបញ្ជាក់ពីចំណុចសំខាន់មួយចំនួន ដែលទាក់ទិននឹងចំនួនទាហានពេលមានបទឈប់បាញ់គ្នា នៅលើខ្សែរណសិរ្សទាំងមូល ពីភាពចាំបាច់នៃការបញ្ចប់ការកេណ្ឌប្រមូលទ័ពនៅអ៊ុយក្រែន និងការបំពាក់អាវុធជាថ្មីដល់កងទ័ពអ៊ុយក្រែន។
ម្យ៉ាងវិញទៀតលោកពូទីនស្នើដល់លោកត្រាំ ឲ្យបញ្ឈប់ទាំងស្រុងជំនួយយោធាលោកខាងលិច និងការចែកចាយព័ត៌មានសើុបការណ៍ដល់អ៊ុយក្រែន។ លោកគូសបញ្ជាក់ថា លក្ខខណ្ឌគន្លឹះសម្រាប់រារាំងការកើនឡើងនៃជម្លោះនិងរកដំណោះស្រាយជម្លោះតាមផ្លូវនយោបាយនិងការទូត ត្រូវតែបញ្ឈប់ទាំងស្រុងជំនួយយោធាបរទេសនិងការផ្ដល់ព័ត៌មានដល់ក្រុងគៀវ៕
ចែករំលែកព័តមាននេះ