លុយនរណាក៏ចង់បាន! នរណាក៏ចង់ចាយ ។ ប៉ុន្តែនៅសុខៗស្រាប់តែគេវេរលុយចូលគណនីរបស់យើង សូមកុំចង់បាន ។ តែយើងចង់បាន ឬយកលុយគេទៅចាយវាយផ្តេសផ្តាស យើងអាចនឹងមានទោស ហើយករណីបែបនេះ…
លុយនរណាក៏ចង់បាន! នរណាក៏ចង់ចាយ ។ ប៉ុន្តែនៅសុខៗស្រាប់តែគេវេរលុយចូលគណនីរបស់យើង សូមកុំចង់បាន ។ តែយើងចង់បាន ឬយកលុយគេទៅចាយវាយផ្តេសផ្តាស យើងអាចនឹងមានទោស ហើយករណីបែបនេះ គឺមានជាបន្តបន្ទាប់ហើយនៅកម្ពុជាយើង ។
តាមការចុះផ្សាយ នៅលើបណ្តាញសង្គម និងសារព័ត៌មានមួយចំនួនបានឲ្យដឹងថា យុវជនសរុប៥នាក់ ត្រូវបានសមត្ថកិច្ចឃាត់ខ្លួន និងកសាងសំណុំរឿងចាត់វិធានការតាមច្បាប់ ក្រោយពេលដែលពួកគេបានព្យាយាមវេរលុយចេញពីគណនីមួយ ដែលក្រុមហ៊ុនមួយនៅខាងខេត្តកំពង់ចាមបានធ្វើប្រតិបត្តិការវេរច្រឡំពាក់ព័ន្ធនឹងបញ្ហាបច្ចេកទេស កាលពីថ្ងៃទី ១៣ ខែមីនា កន្លងទៅថ្មីៗនេះ។
នៅក្នុងករណីនេះ តាមការចុះផ្សាយនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិបានឲ្យដឹងថា នៅថ្ងៃទី១៣ ខែមីនា ក្រុមហ៊ុនមួយ នៅកំពង់ចាមមានបញ្ហាបច្ចេកទេសធ្វើឱ្យមានប្រតិបត្តិការវេរប្រាក់ដោយភ័ន្តច្រឡំទៅកាន់គណនីឈ្មោះ ក.ន ចិ.ត ក្រោយមកបុគ្គលរូបនេះ បានបន្តផ្ទេរប្រាក់ចេញទៅគណនីផ្សេងៗជាច្រើនទៀត ។
ក្រោយកើតហេតុការណ៍ ក្រុមហ៊ុនបានប្តឹងទៅសមត្ថកិច្ចនៅខេត្តកំពង់ចាម ហើយសមត្ថកិច្ចក៏បានធ្វើការសង្កេតស្រាវជ្រាវ រហូតដល់សមត្ថកិច្ចបានឃាត់ខ្លួនជនសង្ស័យបានចំនួន២នាក់ ។ ពួកគេមានឈ្មោះ ក.ន ចិ.ត អាយុ២៣ឆ្នាំ ជាម្ចាស់គណនី និងម្នាក់ទៀតអាយុ១៩ឆ្នាំ រស់នៅរាជធានីភ្នំពេញ ។
ក្រោយមកនៅថ្ងៃទី១៥ ខែមីនា យុវជន២នាក់ទៀតត្រូវបានឃាត់ខ្លួននៅរាជធានីភ្នំពេញ និងម្នាក់ទៀតនៅខេត្តកំពង់ចាមដែរជាបន្តបន្ទាប់។ ក្រោយការឃាត់ខ្លួននៅពេលនេះ សមត្ថកិច្ចបានកំពុងតែអនុវត្តនិតិវិធីច្បាប់ចោទប្រកាន់ពួកគេ ហើយគេមិនដឹងថា តើពួកគនឹងត្រូវប្រឈមមុខច្បាប់ និងមានទោសកម្រិតណានោះទេ ។
កន្លងមក នៅកម្ពុជា មានករណីវេរប្រាក់ច្រឡំជាច្រើន ហើយនៅក្នុងនោះអ្នកដែលទទួលប្រាក់វេរច្រឡំនេះក៏មានអ្នកដែលស្មោះត្រង់បានស្ម័គ្រចិត្តវេរលុយដែលគេទទួលដោយច្រឡំនេះទៅម្ចាស់ដើមវិញ ។ ហើយខ្លះទៀតក៏ធ្វើមិនដឹងហើយសម្ងំចាយប្រាក់គេ ហើយដោយសារវាមិនច្រើនម្ចាស់គេមិនប្តឹងក៏ចេះតែមានជាហូរហែ ។
នៅក្នុងករណីបែបនេះ អ្នកដែលទទួលប្រាក់គេតាមគណនីដែលគេវេរច្រឡំហើយយកប្រាក់គេទៅចាយផ្តេសផ្តាស ឬក៏ប៉ុនប៉ងគ្រប់គ្រងលុយដែលគេវេរច្រឡំនោះដូចករណីយុវជនខាងលើ ប្រសិនបើម្ចាស់ប្រាក់គេប្តឹងនោះយើងនឹងមានពិរុទ្ធហើយ ។
ករណីបែបនេះមិនមែនជាលើកទីមួយនោះទេ ។ កន្លងមក ពោល គឺកាលពីខែតុលា ឆ្នាំ២០២៤ ក៏មានករណីស្រដៀងគ្នានេះដែរ ហើយអ្នកដែលប្រពឹត្តិនៅក្នុងករណីនោះក៏ត្រូវបានសមត្ថកិច្ចជំនាញស្រាវជ្រាវបានដែរ ហើយបង្ក្រាបកសាងនិតិវិធីតាមច្បាប់ដែរ ។
សូមកុំផ្តេសផ្តាស ពីព្រោះការទទួលប្រាក់តាមរយៈប្រព័ន្ធធនាគារដែលពុំមានប្រភពច្បាស់លាស់តាមរយៈការផ្ទរ ឬទូទាត់ច្រឡំ ហើយយើងដែលជាអ្នកទទួលមានចេតនាទុច្ចរិតគេចវេសមិនផ្ទេរត្រឡប់ទៅម្ចាស់គណនីដើមគេវិញ ត្រូវបានគេចាត់ទុកថា ជាអំពើលួចទ្រព្យសម្បត្តិអ្នកដទៃដែលនឹងមានទោសទណ្ឌតាមច្បាប់ ។
ម្យ៉ាងវិញទៀត ករណីនៅសុខៗបែបនេះមានគេផ្ញើលុយចូលគណនីរបស់យើងនោះយើងក៏គួរតែប្រុងប្រយ័ត្នពីព្រោះយើងអាចត្រូវក្រុមសង្គមងងឹតលួចធ្វើប្រតិបត្តិការទទួលប្រាក់ហើយពួកគេព្យាយាមប្រើប្រាស់គណនីរបស់យើងទៅលាងលុយទាំងនោះវិញ ។ នៅក្នុងករណីនេះ យើងជាម្ចាស់គណនីក៏អាចប្រឈមមុខនឹងផ្លូវច្បាប់ដ៏ស្មុគស្មាញផងដែរ ។
ផ្អែកតាមទឡ្ហីករណ៍ទាំងនេះហើយ នៅពេលដែលទទួលបានលុយដែលមិនមែនជាលុយដែលយើងគួរតែទទួលតាមរយៈកម្លាំងពលកម្ម តាមរយៈការងារ តាមរយៈញើញឈាមរបស់យើងទេនោះកុំចេះចាត់ចែងលុយទាំងនោះផ្តេសផ្តាស ហើយក៏មិនគួរចង់បានដែរ ។ លុយនរណាក៏ចង់ចង់មាន ចង់គ្រប់គ្រង ដូច្នេះគ្រប់កាក់គ្រប់សេនមិនមែននៅសុខវារត់មករកយើងងាយៗបានឡើយ ។ នៅក្នុងករណីដែលមានការហូរចូលមិនប្រក្រតី គួរតែប្រុងប្រយ័ត្ន ៕
ចែករំលែកព័តមាននេះ