ទីក្រុងម៉ូស្គូ៖ នៅទីបំផុត កិច្ចខិតខំប្រឹងប្រែងរបស់ទីក្រុងវ៉ាស៊ីនតោនក្នុងការដោះស្រាយបញ្ហាអ៊ុយក្រែនចាប់ផ្ដើមចេញផ្លែផ្កាជាបណ្ដើរៗហើយ។ ក្រោយការសន្ទនាគ្នាជាមួយលោកត្រាំកាលពីយប់មិញ លោកពូទីនឯកភាពចំណុចសំខាន់មួយគឺផ្អាកវាយប្រហារគ្នាទៅវិញទៅមកទៅលើទីតាំងផលិតថាមពលដូចជាអគ្គិសនី ប្រេង និងឧស្ម័នជាដើមរយៈពេល៣០ថ្ងៃ។ យោងតាមទីភ្នាក់ងារព័ត៌មានអេភី (AP) លោកត្រាំ…
ទីក្រុងម៉ូស្គូ៖ នៅទីបំផុត កិច្ចខិតខំប្រឹងប្រែងរបស់ទីក្រុងវ៉ាស៊ីនតោនក្នុងការដោះស្រាយបញ្ហាអ៊ុយក្រែនចាប់ផ្ដើមចេញផ្លែផ្កាជាបណ្ដើរៗហើយ។ ក្រោយការសន្ទនាគ្នាជាមួយលោកត្រាំកាលពីយប់មិញ លោកពូទីនឯកភាពចំណុចសំខាន់មួយគឺផ្អាកវាយប្រហារគ្នាទៅវិញទៅមកទៅលើទីតាំងផលិតថាមពលដូចជាអគ្គិសនី ប្រេង និងឧស្ម័នជាដើមរយៈពេល៣០ថ្ងៃ។
យោងតាមទីភ្នាក់ងារព័ត៌មានអេភី (AP) លោកត្រាំ និងលោកពូទីនឯកភាពទៅលើបទឈប់បាញ់រយៈពេល៣០ថ្ងៃដោយផ្ដោតសំខាន់ទៅលើការផ្អាកវាយប្រហារទីតាំងផលិតថាមពល និងហេដ្ឋារចនាសម្ព័ន្ធ។ លោកពូទីនបញ្ជាក់ថាលុះត្រាតែអ៊ុយក្រែនផ្អាកការវាយប្រហាររបស់ខ្លួនទៅលើរុស្ស៊ីដែរទើបលោកយល់ព្រមផ្អាកវាយប្រហារ។
មានន័យថាបទឈប់បាញ់នេះឈប់បាញ់តែថាមពលទេ។ ចំណែកទីតាំងផ្សេងអាចបាញ់គ្នាជាបន្តទៀតបាន។ វិមានក្រឹមឡាំងថ្លែងថាលោកពូទីនបានបញ្ជាទៅទាហានរុស្ស៊ីដើម្បីត្រៀមអនុវត្តតាមអនុសាសន៍នេះ។ វិមានក្រឹមឡាំងបានចេញសេចក្ដីប្រកាសមួយដែលមានសេចក្ដីជាអាទិ៍ថា «លោកត្រាំ និងលោកពូទីនបានផ្លាស់ប្ដូរយោបល់គ្នាប្រកបដោយការនិយាយត្រង់ទៅត្រង់មកអំពីបញ្ហាអ៊ុយក្រែន»។
នៅក្នុងការសន្ទនាគ្នានោះ លោកពូទីនជម្រាបលោកត្រាំថាដំណោះស្រាយបញ្ហាអ៊ុយក្រែននេះត្រូវតែ១-ប្រកបដោយភាពស៊ីជម្រៅគ្រប់ជ្រុងជ្រោយ, ២-ប្រកបដោយនិរន្តរភាព (មិនរអាក់រអួល បន្តិចសន្តិភាព បន្តិចសង្គ្រាម) និង៣-ប្រកបដោយចីរភាព (ស្ថិតស្ថេរចីរកាលយូរអង្វែង)។ លោកសង្កត់ធ្ងន់ថានៅក្នុងការដោះស្រាយបញ្ហានេះ គេចាំបាច់ត្រូវតែយកចិត្តទុកដាក់នូវអ្វីដែលកង្វល់របស់រុស្ស៊ីពាក់ព័ន្ធនឹងបញ្ហាសន្តិសុខជាតិ និងប្រភពឫសគល់នៃសង្គ្រាម។
យោងតាមវិមានក្រឹមឡាំង លោកត្រាំ និងលោកពូទីនក៏បានពិភាក្សាគ្នាឡើងវិញអំពីសំណើនៃបទឈប់បាញ់រយៈពេល៣០ថ្ងៃដែលគណៈប្រតិភូរបស់លោកត្រាំបានបញ្ជូនទៅឱ្យលោកពូទីនពិនិត្យមើលកាលពីសប្ដាហ៍មុន ហើយដែលអ៊ុយក្រែនបានប្រកាសទទួលយកជាឯកតោភាគីទុកជាមុន។ លោកពូទីនបានដកស្រង់យកចំណុចសំខាន់ៗនៅក្នុងសំណើនោះមកនិយាយឡើងវិញ។
លោកថាគេត្រូវតែធានាការឃ្លាំមើលការអនុវត្តបទឈប់បាញ់នេះឱ្យបានដិតដល់ ហើយត្រូវធានាឱ្យបានថាអ៊ុយក្រែនមិនឆ្លៀតឱកាស៣០ថ្ងៃនេះដើម្បីចល័តកងទ័ព និងដឹកអាវុធដើម្បីត្រៀមវាយប្រហារជាថ្មីនោះទេ។ លោកពូទីនសង្កត់ធ្ងន់ថាដើម្បីទប់ស្កាត់មិនឱ្យភ្លើងសង្គ្រាមឆាបឆេះកាន់តែខ្លាំង និងធ្វើការរួមគ្នាដើម្បីស្វែងរកដំណោះស្រាយនយោបាយ និងការទូតលុះត្រាតែបញ្ឈប់ការផ្ដល់ជំនួយយោធា និងឈប់ផ្ដល់ព័ត៌មានសម្ងាត់ទៅឱ្យអ៊ុយក្រែន។ នេះបើយោងតាមវិមានក្រឹមឡាំង៕
ចែករំលែកព័តមាននេះ