ADផ្ទាំងផ្សព្វផ្សាយពាណិជ្ជកម្ម

Picture

សមត្ថកិច្ច​ឃាត់ខ្លួន​ជនសង្ស័យ​០៤​នាក់ ពី​បទ​ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បទ​ប្រមាថ

1 ថ្ងៃ មុន

រាជធានី​ភ្នំពេញ ៖ អ្នកនាំពាក្យ នៃ​ស្នងការដ្ឋាន​នគរបាល​រាជធានី​ភ្នំពេញ នៅ​ថ្ងៃ​ទី​១៨ មីនា ២០២៥​នេះ បាន​ចេញ​សេចក្ដី​ប្រកាស​ព័ត៌មាន ជុំវិញ​ការ​ឃាត់ខ្លួន​ជនសង្ស័យ​ចំនួន​០៤​នាក់ ពី​បទ​ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម…

រាជធានី​ភ្នំពេញ ៖ អ្នកនាំពាក្យ នៃ​ស្នងការដ្ឋាន​នគរបាល​រាជធានី​ភ្នំពេញ នៅ​ថ្ងៃ​ទី​១៨ មីនា ២០២៥​នេះ បាន​ចេញ​សេចក្ដី​ប្រកាស​ព័ត៌មាន ជុំវិញ​ការ​ឃាត់ខ្លួន​ជនសង្ស័យ​ចំនួន​០៤​នាក់ ពី​បទ​ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បទ​ប្រមាថ ។

អ្នកនាំពាក្យ នៃ​ស្នងការដ្ឋាន​នគរបាល​រាជធានី​ភ្នំពេញ ជម្រាប​ជូន​សាធារណជន​ឱ្យ​បាន​ជ្រាប​ថា កាលពី​ថ្ងៃ​ទី​១៣ រហូត​ដល់​ថ្ងៃ​ទី​១៧ ខែមីនា ឆ្នាំ​២០២៥ សមត្ថកិច្ច នៃ​ស្នងការដ្ឋាន​នគរបាល​រាជធានី​ភ្នំពេញ បាន​ធ្វើការ​ស្រាវជ្រាវ ស៊ើបអង្កេត ប្រមូល​បាន​ភស្តុ​តាង និង​អនុវត្ត​តាម​ដីកា​បញ្ជា​ឱ្យ​ចូលខ្លួន​របស់​ព្រះរាជអាជ្ញា ព្រមទាំង​មានការ​សម្របសម្រួល នីតិវិធី​ពី​អយ្យការ​អម​សាលាដំបូង​រាជធានី​ភ្នំពេញ បាន​ធ្វើការ​ឃាត់ខ្លួន​ជនសង្ស័យ ០៤​នាក់ រួម​មាន​៖

១. ឈ្មោះ ឡុ​ក អូ​រី​ដេ ភេទ ប្រុស អាយុ​៣៥​ឆ្នាំ មុខរបរ អាជីវករ ទីលំនៅ​បច្ចុប្បន្ន​សង្កាត់​សំរោង ក្រុង​បាត់ដំបង ខេត្តបាត់ដំបង ។
២. ឈ្មោះ មុត រិ​ន ភេទ ប្រុស អាយុ​៧៨​ឆ្នាំ មុខរបរ សមាជិក​ក្រុមប្រឹក្សា​ស្រុក ទីលំនៅ​បច្ចុប្បន្ន​ឃុំ​ជយោ ស្រុក​ចំការលើ ខេត្តកំពង់ចាម ។
៣. ឈ្មោះ កាន់ គុន ភេទ​ប្រុស អាយុ​៥៦​ឆ្នាំ មុខរបរ​ជំទប់​ទី​២​ឃុំ​តា​ប្រុ​ក ទីលំនៅ​បច្ចុប្បន្ន​ឃុំ​តា​ប្រុ​ក ស្រុក​ចំការលើ ខេត្តកំពង់ចាម ។
៤. ឈ្មោះ ម៉ៅ ហេ​ន ភេទ​ប្រុស​អាយុ​៦២​ឆ្នាំ មុខរបរ​ជំទប់​ទី​២​ឃុំ​ជយោ ទីលំនៅ​បច្ចុប្បន្ន​ឃុំ​ជយោ​ស្រុក​ចំការលើ​ខេត្តកំពង់ចាម ។

អ្នកនាំពាក្យ បានដឹង​ថា ក្នុង​ចំណោម​ជនសង្ស័យ​ទាំង​០៤​នាក់ គឺ​មាន​ជនសង្ស័យ​០៣​នាក់ ជា​សកម្មជន​គណបក្ស ភ្លើងទៀន និង​គណបក្ស ឆន្ទៈ​ខ្មែរ នៅ​ស្រុក​ចំការលើ ខេត្តកំពង់ចាម ។

ជនសង្ស័យ​ទាំង​០៤​នាក់ ត្រូវ​បាន​សមត្ថកិច្ច នៃ​ស្នងការដ្ឋាន​នគរបាល​រាជធានី​ភ្នំពេញ នាំ​ខ្លួន​មក​សាកសួរ ដោយ​យោង​តាម​ចម្លើយ​សារភាព និង​ភស្តុ​តាង ពួក​គេ​ពិតជា​បាន​ប្រើប្រាស់​បណ្តាញ​សង្គម យក​មក​ធ្វើ​សកម្មភាព ញុះញង់ និង​អុជអាល​តាម​រយៈ​បំភ្លៃ​ព័ត៌មាន​ខុស​ពី​ការ​ពិត បង្ក​ឲ្យ​ប៉ះពាល់​ដល់​សន្តិសុខ​សង្គម និង​កិត្តិយស​ថ្នាក់ដឹកនាំ នៃ​ព្រះរាជាណាចក្រ​កម្ពុជា ដែល​ជា​អំពើ​ត្រូវ​ចាត់ជា​បទល្មើស​ព្រហ្មទណ្ឌ ។

អ្នកនាំពាក្យ នៃ​ស្នងការដ្ឋាន​នគរបាល​រាជធានី​ភ្នំពេញ បញ្ជាក់​ថា ការ​ឃាត់ខ្លួន​ជនសង្ស័យ​ខាងលើ គឺ​សមត្ថកិច្ច​អនុវត្ត​ទៅ​តាម​អង្គហេតុ និង​អង្គច្បាប់​នៃ​ការ​ប្រព្រឹត្ត​បទល្មើស ដែល​មាន​ចែង​ក្នុង​ក្រមព្រហ្មទណ្ឌ ដោយ​មិន​ជាប់​ពាក់ព័ន្ធ​នឹង​រឿង​នយោបាយ ឬ​ការ​គាបសង្កត់ បំភិតបំភ័យ និង​ការ​ធ្វើទុក្ខបុកម្នេញ ផ្នែក​នយោបាយ​ដល់​សមាជិក​គណបក្ស​នយោបាយ ណាមួយ​ឡើយ ។

អ្នកនាំពាក្យ នៃ​ស្នងការដ្ឋាន​នគរបាល​រាជធានី​ភ្នំពេញ សូម​បដិសេធ និង​ច្រានចោល​ទាំងស្រុង ចំពោះ​ការ​ចោទប្រកាន់​ទាំង​បំពាន ដោយ​គ្មាន​មូលដ្ឋាន​ច្បាស់លាស់​របស់​គណបក្ស​ភ្លើងទៀន និង​គណបក្ស​ឆន្ទៈ​ខ្មែរ ដែល​ចុះ​ផ្សាយ​នៅ​ថ្ងៃ​ទី​១៨ ខែមីនា ឆ្នាំ​២០២៥ ។ នៅ​ក្នុង​សង្គម​នីតិរដ្ឋ ការ​អនុវត្ត​វិធានការ​ច្បាប់​ទៅ​លើ​បុគ្គល ដែល​បាន​ធ្វើ​សកម្មភាព​បង្កចលាចល​ដល់​សណ្ដាប់ធ្នាប់​សាធារណៈ គឺជា​មូលដ្ឋាន​គ្រឹះ នៃ​សន្តិសុខ​សង្គម ៕

អត្ថបទសរសេរ ដោយ

កែសម្រួលដោយ