ADផ្ទាំងផ្សព្វផ្សាយពាណិជ្ជកម្ម

Picture

ហ្សេឡិនស្គី​ថា​ពូទីន​ចង់​បន្ត​សង្គ្រា​ម​មុន​ការ​សន្ទ​នា​ជាមួយ​ត្រាំ​យប់​នេះ

12 ម៉ោង មុន

ទី​ក្រុង​វ៉ាស៊ីនតោន៖ លោក​ត្រាំ​ថ្លែង​ថា​ចំណុច​សំខាន់ៗ​ជា​គោល​នៃ​កិច្ច​ព្រម​ព្រៀង​សន្តិ​ភាព​នៅ​អ៊ុយ​ក្រែន​ត្រូវ​លោក​ពូទីន​ទទួ​ល​យក​ជា​បណ្ដើរ​ៗ​ហើយ​។ ​ដូច្នេះ​ ការ​ចរ​ចា​គ្នា​អាច​នឹង​មាន​ដំណើរ​ការ​​ទៅ​មុខ​។ លោក​ថ្លែង​ដូច្នេះ​មុន​​ការ​ជួប​សន្ទនា​គ្នា​តាម​ទូរ​ស័ព្ទ​​​នៅរាត្រី​ថ្ងៃ​អង្គារ​។ ប៉ុន្តែ​លោក​​ទទួល​ស្គាល់​​ថា​មាន​កិច្ច​ការ​ជា​ច្រើន​ទៀត​ដែល​ត្រូវ​ចូល​រួម​ដោះ​ស្រាយ​ទាំង​អស់​គ្នា​។​ លោក​បង្ហោះ​សារ​នៅ​លើ​បណ្ដាញ​សង្គម​ថា​ក្នុង​មួយ​សប្ដាហ៍​ ភាគី​ទាំង​២​​ពលី​ជីវិត​យុទ្ធ​ជន​២៥០០​នាក់​។ ដូច្នេះ​សង្គ្រាម​នេះ​ត្រូវ​តែ​បិទ​បញ្ចប់​។ លោក​កំពុង​ទន្ទឹង​រង់​ចាំ​យ៉ាង​អន្ទះ​សា​ដើម្បី​សន្ទនា​គ្នា​ជា​មួយ​លោក​ពូទីន​។…

ទី​ក្រុង​វ៉ាស៊ីនតោន៖ លោក​ត្រាំ​ថ្លែង​ថា​ចំណុច​សំខាន់ៗ​ជា​គោល​នៃ​កិច្ច​ព្រម​ព្រៀង​សន្តិ​ភាព​នៅ​អ៊ុយ​ក្រែន​ត្រូវ​លោក​ពូទីន​ទទួ​ល​យក​ជា​បណ្ដើរ​ៗ​ហើយ​។ ​ដូច្នេះ​ ការ​ចរ​ចា​គ្នា​អាច​នឹង​មាន​ដំណើរ​ការ​​ទៅ​មុខ​។ លោក​ថ្លែង​ដូច្នេះ​មុន​​ការ​ជួប​សន្ទនា​គ្នា​តាម​ទូរ​ស័ព្ទ​​​នៅរាត្រី​ថ្ងៃ​អង្គារ​។ ប៉ុន្តែ​លោក​​ទទួល​ស្គាល់​​ថា​មាន​កិច្ច​ការ​ជា​ច្រើន​ទៀត​ដែល​ត្រូវ​ចូល​រួម​ដោះ​ស្រាយ​ទាំង​អស់​គ្នា​។​

លោក​បង្ហោះ​សារ​នៅ​លើ​បណ្ដាញ​សង្គម​ថា​ក្នុង​មួយ​សប្ដាហ៍​ ភាគី​ទាំង​២​​ពលី​ជីវិត​យុទ្ធ​ជន​២៥០០​នាក់​។ ដូច្នេះ​សង្គ្រាម​នេះ​ត្រូវ​តែ​បិទ​បញ្ចប់​។ លោក​កំពុង​ទន្ទឹង​រង់​ចាំ​យ៉ាង​អន្ទះ​សា​ដើម្បី​សន្ទនា​គ្នា​ជា​មួយ​លោក​ពូទីន​។ ​លោក​​ទើប​តែ​និយាយ​ថ្មី​ៗ​នេះ​ថា​​​​យើង​​​រង់​ចាំ​មើល​ទាំង​អស់​គ្នា​ដើម្បី​ចង់​ដឹង​ថា​តើ​​អាច​​ឈាន​ដល់​បទ​ឈប់​បាញ់​ ឬ​កិច្ច​ព្រម​ព្រៀង​សន្តិ​ភាព​​ដែរ​ឬ​ទេ​។​ លោក​មាន​ជំនឿ​​ថា​យើង​អាច​ធ្វើ​កិច្ច​ការ​នេះ​បាន​។

ទោះ​បី​លោក​​ត្រាំ​សង្ឃឹម​យ៉ាង​ដូច្នេះ​ក្ដី ប៉ុន្តែ​លោក​ហ្សេឡិនស្គី​ថ្លែង​សុន្ទរ​កថា​នៅ​ពេល​រាត្រី​រិះ​គន់​លោក​ពូទីន​ខ្លាំង​ៗ​។ លោក​ហ្សេឡិន​ស្គី​ថា​លោក​ពូទីន​ចង់​បន្ត​សង្គ្រាម​។ ​​សំណើ​នៃ​ការ​បញ្ចប់​សង្គ្រាម​គួរ​ណាស់​អនុវត្ត​ជាក់​ស្ដែង​តាំង​ពី​យូរ​​មក​ហើយ​។ លោក​ហ្សេ​ឡិនស្គី​ក៏​ទទួល​ស្គាល់​ដូច​លោក​ត្រាំ​ដែរ​គឺ​ថា​សង្គ្រាម​អូស​បន្លាយ​កាន់​តែ​យូរ​​ស្លាប់​ជីវិត​មនុស្ស​ក៏​កាន់​តែ​ច្រើន​។​​

​អង់គ្លេស និង​បារាំង​កំពុង​ជំរុញ​ឱ្យ​លោក​ពូទីន​បង្ហាញ​ជំហរ​ថា​លោក​​ចង់​បាន​កិច្ច​ព្រម​ព្រៀង​សន្តិ​ភាព​ពិត​ប្រាកដ​មែន​ មិន​មែន​និយាយ​តែ​​មាត់​ទទេ​នោះ​​​។ លោក​ម៉ាក្រុង​ថ្លែង​កោត​សរ​សើរ​លោក​ហ្សេឡិន​ស្គី​ថា​ជា​មេដឹក​នាំ​មាន​ចិត្ត​មោះ​មុត​ក្លាហាន​ដែល​ហ៊ាន​ប្រកាស​ទទួល​យក​សំណើ​នៃ​បទ​ឈប់​បាញ់​ជា​ឯក​តោ​ភាគី​មុន​ពេល​រុស្ស៊ី​ពិចារណា​ទៅ​លើ​សំណើ​នេះ​ទៅ​ទៀត​។

រដ្ឋ​មន្ត្រី​ការ​បរទេស​អង់​គ្លេស​និយាយ​បែប​ផ្គើន​ថា​​​លោក​ពូទីន​គួរ​ណាស់​​ទទួល​យក​បទ​ឈប់​បាញ់​ទាំង​ស្រុង​​ដោយ​មិន​ចាំ​បាច់​យក​លេស​ច្រើន​ទេ​ ហើយ​ក៏​​មិន​ចាំ​បាច់​ដាក់​លក្ខ​ខណ្ឌ​ត្រឡប់​ទៅ​វិញ​ដែរ​​។ នេះ​បើ​លោក​ពូទីន​ពិត​ជា​មាន​ចិត្ត​សឿង​មែន​​។ ផ្ទុយ​ទៅ​វិញ​ អង់គ្លេស​យល់​ថា​លោក​ពូទីន​គ្មាន​ឆន្ទៈ​មោះ​មុត​ក្នុង​ការ​ចរ​ចា​សន្តិ​ភាព​ទេ​។ អង់​គ្លេស​ថា​ខ្លួន​ និង​សម្ព័ន្ធ​មិត្ត​មាន​សន្លឹក​បៀរ​នយោបាយ​ល្អ​ៗ​ជា​ច្រើន​សម្រាប់​លេង​កំដរ​លោក​ពូទីន​ដើម្បី​ជួយ​ជំរុញ​ឱ្យ​លោក​ចរ​ចា​គ្នា​​ដោយ​ប្រាកដ​ប្រជា​។​

នៅ​ក្នុង​ការ​សន្ទ​នា​គ្នា​យប់​​នេះ អ្នក​នាំ​ពាក្យ​សេត​វិមាន​ថ្លែង​ថា​លោក​ត្រាំ​តាំង​ចិត្ត​យ៉ាង​មុត​មាំ​ថា​លោក​ត្រូវ​តែ​និយាយ​គ្នា​ឱ្យ​​​​បាន​ដាច់​ស្រេច​អំពី​កិច្ច​ព្រម​ព្រៀង​សន្តិ​ភាព​។​ លោក​​នឹង​និយាយ​អំពី​រោង​ចក្រ​អគ្គិស​នី​នៅ​​ព្រំ​ដែន​អ៊ុយ​ក្រែន​-​រុស្ស៊ី​។​ ​​ចង់​សំដៅ​លើ​រោង​ចក្រ​នុយ​ក្លេអ៊ែរ​នៅ​ហ្សាប៉ូ​រី​ហ្សៀ​។ នេះ​ជា​រោង​ចក្រ​ធំ​ជាង​គេ​នៅ​​អឺរ៉ុប​ដែល​​រុស្ស៊ី​ចូល​កាន់​កាប់​​ពី​ខែមីនា ឆ្នាំ​២០២២​។​

​ទន្ទឹម​នឹង​ការ​ចរ​ចា​គ្នា​ បើ​គេ​ក្រឡេក​ទៅ​មើល​សមរភូមិ​យោធា​ឯណោះ​វិញ លោក​ហ្សេឡិនស្គី​ចោទ​​​ថា​លោក​ពូទីន​ត្រៀម​ពង្រីក​សង្គ្រាម​​ឱ្យ​កាន់​តែ​ឆាប​ឆេះ​បន្ថែម​ទៀត​។ គាត់​ដាក់​ពង្រាយ​កង​ទ័ព​នៅ​ព្រំ​ដែន​ដើម្បី​​វាយ​ប្រហារ​អ៊ុយ​ក្រែន​។ ដូច្នេះ​​អ៊ុយ​ក្រែន​ត្រូវ​តែ​ចាត់​វិធាន​ការ​ឆ្លើយ​តប​​​។ រុស្ស៊ី​ចល័ត​​ទ័ព​ជើង​គោក​ទៅ​កៀក​នឹង​តំបន់​ស៊ូមី​ (Sumy)​ នៅ​​​អ៊ុយ​ក្រែន​​ខាង​កើត​។

ហ្សេឡិន​ស្គី​ថា​ការ​ដែល​រុស្ស៊ី​​​​​ចល័ត​​ទ័ព​កាន់​តែ​ច្រើន​ឡើង​ៗ​បែប​នេះ​ជា​សញ្ញា​បង្ហាញ​ថា​​ពួក​គេ​​មិន​ចង់​ដោះ​ស្រាយ​បញ្ហា​តាម​មធ្យោ​បាយ​កា​រទូត​ទេ​។ អ៊ុយ​ក្រែន​នឹង​បញ្ជូន​ព័ត៌​មាន​​ទៅ​​ប្រទេស​ជា​ដៃ​គូ​​ដើម្បី​ឱ្យ​ពួក​គេ​យល់​ច្បាស់​អំពី​សភាព​ការណ៍​ពិត​​។ ​
ប៉ុន្មាន​ថ្ងៃ​នេះ​ រុស្ស៊ី និង​អ៊ុយ​ក្រែន​វាយ​ប្រហារ​​គ្នា​ដោយ​យន្ត​ហោះ​ដ្រូន​យ៉ាង​ខ្លាំង​ក្លា​​​។ ​កង​ទ័ព​អាកាស​អ៊ុយ​ក្រែន​ថា​ខ្លួន​បាញ់​ទម្លាក់​ដ្រូន​របស់​រុស្ស៊ី​៤៧​គ្រឿង​។ ចំណែក​៣៣​គ្រឿង​ទៀត​វង្វេង​បាត់​នៅ​ក្នុង​សមរភូមិ​។

ទី​តាំង​ដែល​រង​ការ​វាយ​ប្រហារ​មាន​ដូចជា​ខា​គីវ កៀវ និង​អូដេសា​។ ប៉ុន្តែ​អ៊ុយ​ក្រែន​ក៏​វាយ​ប្រហារ​ចូល​រុស្ស៊ី​វិញ​ដែរ​។ ក្រសួង​កា​រពារ​ជាតិ​រុស្ស៊ី​ថា​ខ្លួន​បាញ់​ទម្លាក់​ដ្រូន​អ៊ុយ​ក្រែន​៣១​គ្រឿង​ដែល​ហោះទៅ​វាយ​ប្រហារ​ទី​តាំង​បួន​កន្លែង​របស់​រុស្ស៊ី​។​ ទន្ទឹម​នឹង​នោះ សង្គ្រាម​នៅ​តំបន់​ខឺស​ក៏​កំពុង​ផ្ទុះឡើង​យ៉ាង​ក្ដៅ​គគុក​។ ក្រសួង​ការ​ពារ​ជាតិ​រុស្ស៊ី​ប្រកាស​ថា​គ្មាន​ការ​ចរ​ចា​សន្តិ​ភាព​កើត​ឡើង​ជា​ដាច់​ខាត​លុះ​ត្រា​តែ​រុស្ស៊ី​រំដោះ​បាន​តំបន់​ខឺស​ទាំង​ស្រុង​។ នេះ​បើ​យោង​តាម​ការ​ផ្សាយ​របស់​ប៊ីប៊ីស៊ី និង​អេ​ប៊ី​ស៊ី​៕

អត្ថបទសរសេរ ដោយ

កែសម្រួលដោយ