Tiger Woods ណាត់ជួបអតីតប្រពន្ធកូនប្រុសច្បងរបស់លោក ដូណាល់ ត្រាំ
សហរដ្ឋអាមេរិក ៖ កំពូលកីឡាករវាយកូនហ្គោលអាមេរិក លោក Tiger Woods និងអ្នកស្រី Vanessa Haydon អតីតប្រពន្ធលោក…
សហរដ្ឋអាមេរិក ៖ កំពូលកីឡាករវាយកូនហ្គោលអាមេរិក លោក Tiger Woods និងអ្នកស្រី Vanessa Haydon អតីតប្រពន្ធលោក Donald Trump Jr. ដែលជាកូនច្បងរបស់ប្រធានាធិបតីអាមេរិក លោក ដូណាល់ ត្រាំ (Donald Trump) នោះ ត្រូវបានប្រព័ន្ធផ្សព្វផ្សាយនៅអាមេរិក ពិសេសសារព័ត៌មាន People ទម្លាយថា កំពុងណាត់ជួបគ្នាសម្ងាត់អស់រយៈពេលជាច្រើនខែមកហើយ។
ប្រភពពី People រាយការណ៍ថា Tiger Woods អាយុ៤៩ឆ្នាំ និង Vanessa Haydon អាយុ៤៧ឆ្នាំ បានជួបគ្នាលើកដំបូង អំឡុងថ្ងៃបុណ្យ Thanksgiving ខណៈអ្នកទាំងពីររស់នៅផ្ទះក្បែរគ្នា ដោយធ្វើដំណើរត្រឹម២០នាទីប៉ុណ្ណោះ ស្ថិតនៅតំបន់ Palm Beach រដ្ឋផ្លរីដា។ ប្រភពមួយបានប្រាប់កាសែត Daily Mail ថា អ្នកទាំងពីរមិនរស់នៅជាមួយគ្នាទេ ដោយគ្រាន់តែណាត់ជួបគ្នា២ទៅ៣ដងក្នុងមួយសប្តាហ៍ ដោយចូលចិត្តដើរលេង និងញ៉ាំអាហារពេលល្ងាចជាដើម ហើយបើទោះជានៅផ្ទះក្បែរគ្នា ប៉ុន្តែពួកគេបានសម្រេចចិត្តមិនបង្ហាញអំពីការណាត់ជួបគ្នាជាសាធារណៈនោះទេ។
អ្នកស្រី Vanessa Trump បានលែងលះជាមួយលោក Donald Trump Jr. កូនប្រុសច្បងប្រធានាធិបតីអាមេរិកទី៤៧ លោក ដូណាល់ ត្រាំ នៅក្នុងឆ្នាំ ២០១៨ ក្រោយរួមរស់ជាមួយគ្នាអស់រយៈពេល១២ឆ្នាំ។ អ្នកស្និទ្ធនឹងគ្រួសារលោក ត្រាំ បានប្រាប់ People ថា កូនប្រុសលោក ត្រាំ មិនប្រកាន់អូសដំណើរនឹងការណាត់ជួបរបស់អតីតប្រពន្ធជាមួយនឹងលោក Tiger Woods នោះទេ។ ស្របពេលប្រភពមួយបានប្រាប់សារព័ត៌មាន Page Six ថា សូម្បីតែលោកប្រធានាធិបតី ដូណាល់ ត្រាំ ក៏បង្ហាញការគាំទ្រចំពោះការណាត់ជួបឈានទៅដល់ទំនាក់ទំនងស្នេហ៍ថ្មីរបស់អតីតកូនប្រសារស្រីរបស់លោកផងដែរ។
យ៉ាងណាមិញ អ្នកទាំងពីរត្រូវបានគេប្រទះឃើញជាមួយគ្នាជាសាធារណៈ កាលពីខែមុន នៅឯព្រឹត្តិការណ៍វាយកូនហ្គោល Genesis Invitational របស់កម្មវិធី PGA Tour នៅទីលាន Torrey Pines ក្នុងរដ្ឋកាលីហ្វ័រញ៉ា ព្រមទាំងមានកូនស្រីអាយុ១៧ឆ្នាំរបស់អ្នកស្រី Vanessa ឈ្មោះ Kai ដែលស្រឡាញ់កីឡាវាយកូនហ្គោលដូចជីតាខាងឪពុករបស់នាង នៅទីនោះជាមួយផង។ ចៃដន្យអីកូនរបស់លោក Tiger Woods ក៏ត្រូវបានរាយការណ៍ថាកំពុងរៀននៅសាលាដូចគ្នានឹង Kai ផងដែរ។ លើសពីនេះទៀត មិនត្រឹមតែ Kai ប៉ុណ្ណោះទេ សូម្បីតែបងប្អូនបង្កើតទាំងបួននាក់របស់នាង ក៏បានដឹងឮអំពីទំនាក់ទំនងរបស់ម្តាយពួកគេជាមួយ Tiger Woods ផងដែរ។
វត្តមានរបស់អ្នកស្រី Vanessa Haydon ត្រូវបានគេមើលឃើញថាអាចជួយលុបបំបាត់ទុក្ខសោករបស់លោក Tiger Woods ដែលបានឆ្លងកាត់បញ្ហាជាច្រើននៅឆ្នាំនេះ។ ថ្មីៗនេះ Tiger Woods ទើបតែបានបង្ហើបថា លោកបានរងរបួសដាច់សរសៃពួរកែងជើងខាងឆ្វេងដោយទទួលការវះកាត់ ហើយទំនងឃ្លាតឆ្ងាយពីការប្រកួតក្របខណ្ឌ Masters និងអាចពេញមួយរដូវកាលក៏ថាបាន។ បន្ថែមលើទុក្ខលំបាករបួសនេះ ម្តាយបង្កើតជនជាតិថៃរបស់លោក គឺលោកស្រី Kultida បានទទួលមរណភាពកាលពីខែមុន ដោយបង្ខំឱ្យលោកដកខ្លួនចេញពីការប្រកួតព្រឹត្តិការណ៍ Genesis Invitational ដើម្បីសម្រួលផ្លូវចិត្ត ក្រោយការបាត់បង់មនុស្សជាទីស្រឡាញ់។
សូមជម្រាបថា Tiger Woods គឺជាកីឡាករវាយកូនហ្គោលអាជីពអាមេរិកដ៏លេចធ្លោខ្លាំងបំផុត ដោយឈ្នះពានរង្វាន់កម្មវិធី PGA Tour ច្រើនជាងគេបំផុតក្នុងប្រវត្តិសាស្ត្រ ពោល៨២ដង ស្មើកំណត់ត្រាជាមួយលោក Sam Snead ដែលបានទទួលអនិច្ចកម្ម កាលពីឆ្នាំ ២០០២។ Woods ត្រូវបានចាត់ទុកថាជាកីឡាករវាយកូនហ្គោលដ៏អស្ចារ្យបំផុតគ្រប់ពេល និងជាអត្តពលិកដ៏ល្បីល្បាញបំផុតម្នាក់ក្នុងប្រវត្តិសាស្ត្រកីឡានាសម័យទំនើប។ លោកក៏ទទួលបានមេដាយនៃសេរីភាព ដែលជាកិត្តិយសថ្នាក់ខ្ពស់បំផុតរបស់ជនស៊ីវិល កាលពីខែឧសភា ឆ្នាំ២០១៩ បំពាក់ដោយលោកប្រធានាធិបតី ដូណាល់ ត្រាំ អំឡុងពេលអាណត្តិទី១របស់លោក។
យោងតាមទន្និន័យពីទស្សនាវដ្តីពាណិជ្ជកម្ម Forbes បានបង្ហាញថា ទ្រព្យសម្បត្តិរបស់លោក Tiger Woods សរុបមានចំនួន ១,៣ពាន់លានដុល្លារអាមេរិក គិតត្រឹមថ្ងៃទី១៨ ខែមីនា ឆ្នាំ២០២៥ ដែលរកបានពីអាជីពវាយកូនហ្គោល និងដៃគូសហការជាច្រើន៕ (ប្រភព ៖ VnExpress)
ចែករំលែកព័តមាននេះ