អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅរសៀលថ្ងៃទី១៨ ខែមីនា ឆ្នាំ២០២៥ បានឱ្យដឹងថា តម្លៃមាសបានបន្តហក់ឡើងខ្ពស់បំផុតបំបែកកំណត់ត្រាសាជាថ្មីទៀត បន្ទាប់ពីទម្លុះរនាំង…
អន្តរជាតិ ៖ យោងតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅរសៀលថ្ងៃទី១៨ ខែមីនា ឆ្នាំ២០២៥ បានឱ្យដឹងថា តម្លៃមាសបានបន្តហក់ឡើងខ្ពស់បំផុតបំបែកកំណត់ត្រាសាជាថ្មីទៀត បន្ទាប់ពីទម្លុះរនាំង ៣,០០០ដុល្លារក្នុង១អោនជាលើកដំបូងក្នុងប្រវត្តិសាស្ត្រ កាលពីថ្ងៃទី១៤ ខែមីនា ឆ្នាំ២០២៥ ខណៈដែលបណ្តាអ្នកវិនិយោគនៅតែបង្ហាញក្តីព្រួយបារម្ភខ្លាំងឡើងៗ ពាក់ព័ន្ធនឹងបញ្ហាពាណិជ្ជកម្ម និងសេដ្ឋកិច្ចសកល ដែលជំរុញដោយគោលនយោបាយពន្ធរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។
បើតាមប្រភពពី Reuters បានឱ្យដឹងថា តម្លៃមាសអន្តរជាតិ Spot Gold បានកើនឡើង ០.២% ក្នុងតម្លៃ ៣,០០៦.៨៨ដុល្លារក្នុងមួយអោន ឬជាង ៣,៦២៤ដុល្លារក្នុង១តម្លឹង គិតត្រឹមរសៀលថ្ងៃទី១៨ ខែមីនា ឆ្នាំ២០២៥ បន្ទាប់ពីហក់ឡើងដល់កម្រិតខ្ពស់បំផុតមិនធ្លាប់មានក្នុងប្រវត្តិសាស្ត្រ ៣,០១៦.៩២ដុល្លារក្នុង១អោនក្នុងការជួញដូរមុន។
លោក Edward Meir អ្នកវិភាគនៅក្រុមហ៊ុន Marex ដែលជាក្រុមហ៊ុនសេវាកម្មហិរញ្ញវត្ថុមានមូលដ្ឋាននៅចក្រភពអង់គ្លេស បានថ្លែងថា «មាសកំពុងឡើងថ្លៃខ្ពស់ដោយសារតែប្រាក់ដុល្លារអាមេរិកធ្លាក់ចុះ បូករួមនឹងភាពមិនប្រាកដប្រជានៃសង្គ្រាមពន្ធនាំចូល»។
សន្ទស្សន៍ប្រាក់ដុល្លារអាមេរិកបានធ្លាក់ចុះជិតដល់រយៈពេលបួនខែ ដែលធ្វើឱ្យមាសមានតម្លៃថោកសម្រាប់អ្នកទិញនៅបរទេស។ ហើយគឺជាប្រវត្តិសាស្ត្រទៅហើយ ដែលមាសត្រូវបានចាត់ទុកជាទ្រព្យសម្បត្តិដ៏មានសុវត្តិភាព ហើយក៏ជារនាំងការពារដ៏រឹងមាំ អំឡុងពេលអស្ថិរភាពភូមិសាស្ត្រនយោបាយ។
ចាប់តាំងពីលោក ត្រាំ ចូលកាន់តំណែងកាលពីខែមករា ឆ្នាំ២០២៥ តម្លៃមាសបានឡើងដល់កម្រិតខ្ពស់បំផុតជាប្រវត្តិសាស្ត្រចំនួន១៤លើក ខណៈដែលភាពតានតឹងពាណិជ្ជកម្មសកលបានជំរុញឱ្យមានតម្រូវការមាសកាន់តែខ្ពស់។ លោក ត្រាំ បានដាក់ចេញផែនការពន្ធនាំចូលជាបន្តបន្ទាប់ រាប់ចាប់ពីពន្ធ ២៥% លើការនាំចូលដែកថែប និងអាលុយមីញ៉ូមដែលបានចូលជាធរមានកាលពីខែកុម្ភៈកន្លងទៅ រហូតដល់ពន្ធសងសឹកទៅវិញទៅមក ដែលលោកបានអះអាងថានឹងចូលជាធរនៅថ្ងៃទី២ ខែមេសា ខាងមុខនេះ។
ធនាគារ ក៏ដូចជាអ្នកវិភាគមួយចំនួន បានបង្កើនការព្យាករណ៍តម្លៃមាសរយៈពេល៣ខែបន្ទាប់ អាចឡើងដល់៣,១០០ដុល្លារក្នុង១អោន និងរយៈពេល៦ខែបន្ទាប់ នឹងឡើងដល់ ៣,២០០ដុល្លារក្នុង១អោន ដោយលើកឡើងពីការកើនឡើងកម្តៅ នៃភាពតានតឹងភូមិសាស្ត្រនយោបាយ ពាណិជ្ជកម្មសកល ការកាត់បន្ថយគោលនយោបាយរូបិយវត្ថុ ក៏ដូចជាការសម្រុកទិញមាសស្តុកទុកពីបណ្តាធនាគារកណ្តាលធំៗនៅជុំវិញពិភពលោក។
ស្របពេលដែលក្រុមអ្នកព្យាករណ៍បានកំណត់ការរំពឹងទុករបស់ពួកគេ ចំពោះកំណើនសេដ្ឋកិច្ចរបស់សហរដ្ឋអាមេរិកនៅឆ្នាំនេះ កាន់តែបង្កើនការព្រួយបារម្ភអំពីការធ្លាក់ចុះសេដ្ឋកិច្ច និងការកើនឡើងអតិផរណារបស់ប្រទេសមហាអំណាច់សេដ្ឋកិច្ចពិភពលោកមួយនេះ៕
ចែករំលែកព័តមាននេះ