រាជធានីភ្នំពេញ ៖ ក្រុមការងារអភិរក្សរបស់ប្រទេសកម្ពុជា និងអន្តរជាតិបាននឹងកំពុងចាប់ផ្តើមយុទ្ធនាការហែលទឹកទន្លេមេគង្គ ដែលមានចម្ងាយ១២០គីឡូម៉ែត្រ ចាប់ពីថ្ងៃទី១៧ ដល់២០ ខែមីនា ឆ្នាំ២០២៥ ដើម្បីលើកកម្ពស់ការយល់ដឹងអំពីសត្វផ្សោតដែលជាប្រភេទជិតផុតពូជនៅកម្ពុជា…
រាជធានីភ្នំពេញ ៖ ក្រុមការងារអភិរក្សរបស់ប្រទេសកម្ពុជា និងអន្តរជាតិបាននឹងកំពុងចាប់ផ្តើមយុទ្ធនាការហែលទឹកទន្លេមេគង្គ ដែលមានចម្ងាយ១២០គីឡូម៉ែត្រ ចាប់ពីថ្ងៃទី១៧ ដល់២០ ខែមីនា ឆ្នាំ២០២៥ ដើម្បីលើកកម្ពស់ការយល់ដឹងអំពីសត្វផ្សោតដែលជាប្រភេទជិតផុតពូជនៅកម្ពុជា និងចូលរួមកៀរគរមូលនិធិសម្រាប់ការអភិរក្ស ។
សេចក្តីប្រកាសព័ត៌មានរួមរបស់ក្រសួងកសិកម្មរុក្ខាប្រមាញ់ និងនេសាទ និងភាគីពាក់ព័ន្ធបានលើកឡើងថា យុទ្ធនាការហែលទឹកទន្លេមេគង្គចូលរួមដឹកនាំដោយក្រសួងកសិកម្ម រុក្ខាប្រមាញ់ និងនេសាទ (MAFF) គាំទ្រដោយរដ្ឋបាលជលផល អង្គការ WWF-កម្ពុជា អង្គការក្រុមអភិវឌ្ឍន៍ជនបទកម្ពុជា គណៈកម្មការថនិកសត្វសមុទ្រ សហរដ្ឋអាមេរិក កម្មវិធីស្រាវជ្រាវសត្វ ផ្សោត Sarasota នៅសួនសត្វ Brookfield ក្នុងទីក្រុង Chicago សហរដ្ឋអាមេរិក, IUCN Cetacean Specialist Group និង Oceania Conservation ។
សម្រាប់បេសកកម្មនេះ គឺជាការគាំទ្រកិច្ចខិតខំប្រឹងប្រែងអភិរក្សសត្វផ្សោតដែលរងការគំរាមកំហែងបំផុតមួយរបស់ពិភពលោក ។ សត្វផ្សោត ប្រឈមនឹងហានិភ័យនៃការផុតពូជ ដែលបច្ចុប្បន្នវត្តមានរបស់សត្វផ្សោតមាននៅក្នុងចម្ងាយ១២០គីឡូម៉ែត្ររវាងខេត្តស្ទឹងត្រែង និងក្រចេះ ។ ខណៈពេលដែលកិច្ចខិតខំប្រឹងប្រែងអភិរក្សដែលកំពុងបន្តនេះបានជួយធ្វើឱ្យចំនួនរបស់វាមានស្ថេរភាព ប៉ុន្តែការគំរាមកំហែងក៏នៅតែបន្តបង្កគ្រោះថ្នាក់ដល់ចំនួនសត្វផ្សោតទឹកសាបនេះ ដូចជា ការជាប់ទៅនឹងនៅក្នុងឧបករណ៍នេសាទដោយចៃដន្យ (ហៅថា «bycatch») ការបាត់បង់ទីជម្រក និងការនេសាទខុសច្បាប់ជាដើម ។
សេចក្តីប្រកាសព័ត៌មានបញ្ជាក់ថា៖«ក្នុងរយៈពេល៤ថ្ងៃនេះ ក្រុមអ្នកហែលទឹកនឹងបន្តហែលតាមដងទន្លេមេគង្គ អមដំណើរដោយក្រុមសុវត្ថិភាពជិះទូក កាយ៉ាក និងទូកឆ្នាំទន្លេដើម្បីជួយគាំទ្រសកម្មភាពហែលទឹក ។ បេសកកម្មនេះនឹងមិនត្រឹមតែបង្ហាញពីការស៊ូទ្រាំ និងការលះបង់របស់អ្នកចូលរួមប៉ុណ្ណោះទេ ប៉ុន្តែថែមទាំងជាឱកាសមួយ ដើម្បីកត់ត្រាមើលសត្វផ្សោត កំណត់អត្តសញ្ញាណនៃការគំរាមកំហែងនានា និងប្រមូលយកសំណាកទាំងឡាយដែលអាចបង្កគ្រោះថ្នាក់ និងដកហូតម៉ង នេសាទដែលបោះបង់ចោលចេញពីទន្លេ» ។
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ៖ «ក្រសួងកសិកម្ម រុក្ខាប្រមាញ់ និងនេសាទ គាំទ្រយ៉ាងពេញទំហឹងចំពោះគំនិតផ្តួចផ្តើមរៀបចំយុទ្ធនាការហែលទឹក ទន្លេមេគង្គនេះ ដោយសារយើងកំពុងធ្វើការក្នុងទិសដៅដូចគ្នាក្នុងការអភិរក្សសត្វផ្សោតទន្លេមេគង្គ ។ ដូចលទ្ធផល បានបង្ហាញហើយថា រយៈពេលបីឆ្នាំចុងក្រោយនេះ ចំនួនសត្វផ្សោតទន្លេមេគង្គនៅតែបន្តកើនឡើង ហើយនេះ គឺជាភស្តុតាងដែលបង្ហាញពីការប្តេជ្ញាចិត្ត និងកម្មវិធីអភិរក្សប្រកបដោយប្រសិទ្ធភាពរបស់យើង» ។
សូមជម្រាបថា មូលនិធិដែលរៃអង្គាសបានពីព្រឹត្តិការណ៍នេះនឹងផ្តល់ការគាំទ្រដោយផ្ទាល់ដល់កម្មវិធីអភិរក្សសត្វផ្សោត គាំទ្រដល់ឆ្នាំទន្លេដែលតែងតែចុះល្បាតជាប្រចាំក្នុងកិច្ចខិតខំប្រឹងប្រែង ដើម្បីតាមដាន និងការពារទីជម្រករបស់សត្វផ្សោត ។ បន្ថែមពីលើនេះ ធនធានទាំងនេះក៏នឹងត្រូវបានបម្រុងទុកសម្រាប់ជំរុញការងារស្រាវជ្រាវ និងជំរុញកិច្ចសហការកាន់តែខ្លាំងរវាងកម្មវិធីអភិរក្សសត្វផ្សោតសមុទ្រ និងទឹកសាបនៅកម្ពុជា ។
លោក ចាប វិបុល នាយកអង្គការ WWF-កម្ពុជា បានលើកឡើងថា «ការការពារចំនួនសត្វផ្សោត គឺទាមទារវិធីសាស្ត្រ និងការចូលរួមទាំងអស់គ្នាពីអ្នកអភិរក្ស អ្នកបង្កើតគោលនយោបាយ និងសហគមន៍មូលដ្ឋាន ។ យុទ្ធនាការហែលទឹក ទន្លេមេគង្គនេះ គឺជាសក្ខីភាពនៃកិច្ចការសហការ និងការចូលរួមជាសាធារណៈក្នុងការអភិរក្ស» ។
យុទ្ធនាការហែលទឹកទន្លេមេគង្គនេះ ត្រូវបានរៀបចំឡើងដោយមានការគាំទ្រពីវិទ្យាស្ថានស្រាវជ្រាវជីវវិទ្យាសត្វផ្សោតនៃកម្មវិធីស្រាវជ្រាវសត្វផ្សោត Sarasota នៅសហរដ្ឋអាមេរិក ដែលបានបង្កើតវេទិការរៃអង្គាសថវិកាអន្តរជាតិ ដើម្បីជំរុញកិច្ចខិតខំប្រឹងប្រែងអភិរក្សសត្វផ្សោត ។ អ្នករៀបចំយើងសង្ឃឹមថា បញ្ហាប្រឈមនឹងជំរុញឱ្យមានការគាំទ្រកាន់តែច្រើនឡើងៗសម្រាប់គំនិតផ្តួចផ្តើមនានាក្នុងគោលបំណងធានាដល់អនាគតនៃសត្វផ្សោតរបស់កម្ពុជា ។
ចំណែក លោកស្រីបណ្ឌិត Frances Gulland ប្រធានគណៈកម្មការថនិកសត្វសមុទ្រអាមេរិកបានមានប្រសាសន៍តំណាងឱ្យក្រុមអ្នកហែលទឹកថា ៖ «យុទ្ធនាការហែលទឹកទន្លេមេគង្គនេះ គឺវាជាបេសកកម្ម ដើម្បីការពារផ្សោតដែលជិតផុតពូជរបស់កម្ពុជា និងទន្លេមេគង្គ ហើយក៏ជាការអំពាវនាវឱ្យមានសកម្មភាពចូលរួមគាំទ្រផងដែរ ។ យើងត្រូវតែធ្វើ សកម្មភាពឥឡូវនេះ ដើម្បីធានាថា មនុស្សជំនាន់ក្រោយនឹងបានឃើញសត្វដ៏អស្ចារ្យទាំងនេះដែលរីកចម្រើននៅក្នុងទន្លេមេគង្គ ។
គួរបញ្ជាក់ផងដែរថា នៅឆ្នាំ២០១៦ សត្វផ្សោតនៅក្នុងអន្លង់ឈើទាលកៀកជាប់ទៅនឹងព្រំប្រទល់កម្ពុជា-ឡាវត្រូវបានប្រកាសថា ផុតពូជដែលត្រូវបានកត់ត្រានៅឆ្នាំ២០២២ ។ ការបាត់បង់នេះបង្ហាញពីចំណាត់ការជាបន្ទាន់ ដើម្បីការពារផ្សោតដែលនៅសេសសល់ក្នុងទន្លេមេគង្គ ។
ប្រសិនបើយើងមិនធ្វើសកម្មភាពឥឡូវនេះទេយើងនឹងប្រឈមនឹងការបាត់បង់សត្វដ៏អស្ចារ្យទាំងនេះជារៀងរហូត ។ ចូលរួមជាមួយយើងទាំងអស់គ្នា ដើម្បីការពារអនាគតរបស់សត្វផ្សោត និងទន្លេមេគង្គ៕
ចែករំលែកព័តមាននេះ