ខេត្តបាត់ដំបង ៖ ក្រុមអ្នកជល់មាន់ចំនួន១៣នាក់ ត្រូវបានកម្លាំងការិយាល័យជំនាញកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១៨ មីនា ចាត់ការតាមនីតិវិធី ក្រោយបញ្ចប់ការសួរនាំ ។ នេះបើតាមមន្ត្រីជំនាញបាននិយាយ…
ខេត្តបាត់ដំបង ៖ ក្រុមអ្នកជល់មាន់ចំនួន១៣នាក់ ត្រូវបានកម្លាំងការិយាល័យជំនាញកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១៨ មីនា ចាត់ការតាមនីតិវិធី ក្រោយបញ្ចប់ការសួរនាំ ។ នេះបើតាមមន្ត្រីជំនាញបាននិយាយ ។
មន្ត្រីការិយាល័យព្រហ្មទណ្ឌកំរិតស្រាលបានប្រាប់ថា លោកស្នងការបានបញ្ជាឲ្យមន្ត្រីការិយាល័យជំនាញ រៀបចំសំណុំរឿងបញ្ជូនក្រុមអ្នកញៀនល្បែងជល់មាន់ទាំង១៣នាក់នោះ ទៅកាន់សាលាដំបូងខេត្ត ក្រោយបញ្ចប់ការសួរនាំ ដើម្បីចាត់ការតាមនីតិវិធី ។ យោងតាមរបាយការណ៍ការិយាល័យព្រហ្មទណ្ឌកំរិតស្រាលនៃស្នងការខេត្ត ក្រុមអ្នកញៀនល្បែងបញ្ជល់មាន់ទាំង១៣នាក់ខាងលើនេះ ត្រូវបានកម្លាំងជំនាញនៃការិយាល័យព្រហ្មទណ្ឌកំរិតស្រាល ឆ្មក់ចូលទៅបង្ក្រាប០២ទីតាំងព្រមៗគ្នា ក្នុងពេលតែមួយ កាលពីរសៀលថ្ងៃទី១៦ មីនា ស្ថិតនៅភូមិព្រៃទទឹក ឃុំជ្រៃ ស្រុកថ្មគោល ។
មន្ត្រីជំនាញបាននិយាយថា អ្នកលេងល្បែងជល់មាន់ទាំង១៣នាក់ខាងលើនេះ ត្រូវបានបង្ក្រាប០២ទីតាំងផ្សេងៗគ្នានៅភូមិព្រៃទទឹង ឃុំជ្រៃ ។ ជាមួយនឹងការឃាត់ខ្លួនមនុស្ស១៣នាក់ សមត្ថកិច្ចក៏រឹបអូសបានវត្ថុតាងមួយចំនួនដែរ រួមមាន៖ មាន់ជល់ចំនួន០៥ក្បាល សង្វៀនចំនួន០១ ជញ្ជីងសម្រាប់ថ្លឹងផ្គូរផ្គងមាន់ចំនួន០១ ម៉ូតូចំនួន០៧គ្រឿង ម៉ូតូកង់បីចំនួន០១គ្រឿង រួមនឹងវត្ថុតាងពាក់ព័ន្ធមួយចំនួនទៀត ។
គួរកត់សម្គាល់ថា ល្បែងបញ្ជល់មាន់នេះ ហាក់កំពុងកើតមានស្ទើរគ្រប់ទីកន្លែង នៅតាមបណ្ដាស្រុកនានាក្នុងខេត្តបាត់ដំបង ។ ល្បែងបញ្ជល់មាន់នេះ ត្រូវបានគេចាត់ទុកជាល្បែងភ្នាល់ ស៊ីសងខុសច្បាប់ តែគេមិនដែលឃើញកម្លាំងសមត្ថកិច្ច នៅក្នុងមូលដ្ឋានចុះបង្ក្រាបម្ដងណាទេ ។ ផ្ទុយទៅវិញ មានតែការឃុំឃិតគ្នារវាងសមត្ថកិច្ចមូលដ្ឋានជាមួយនឹងក្រុមអ្នកញៀនល្បែងខុសច្បាប់ទាំងនេះ ។ ដោយសារគ្មានការអើពើពីកម្លាំងសមត្ថកិច្ចក្នុងមូលដ្ឋានគេឃើញជាងមួយសប្ដាហ៍កន្លងទៅនេះ កម្លាំងការិយាល័យជំនាញនៃស្នងការខេត្តបានឆ្មក់ចុះទៅបង្ក្រាបទីតាំងជល់មាន់នៅតាមបណ្ដាស្រុកមួយចំនួនជាបន្តបន្ទាប់ ។
នៅពេលបែកធ្លាយព័ត៌មាន ឬត្រូវចុះបង្ក្រាបដោយកម្លាំងការិយាល័យជំនាញបែបនេះ កម្លាំងសមត្ថកិច្ចនៅមូលដ្ឋាន តែឆ្លើយដោះសារថា «ពួកគេមិនបានដឹង ឬគ្រប់គ្រងអ្នកញៀនល្បែងទាំងនេះមិនបាន ព្រោះពួកអ្នកល្បែងតែងណាត់គ្នាបើកសង្វៀនឆ្ងាយៗ និងនៅក្នុងព្រៃដែលសមត្ថកិច្ចពិបាកតាមដាន»។
ប៉ុន្តែយ៉ាងណាក៏ដោយ បើតាមលោក ឈឿង គឹមសុង ស្នងការរងទទូលផែនព្រហ្មទណ្ឌបានបញ្ជាក់ថា រាល់ល្បែងស៊ីសងខុសច្បាប់ ដែលបើកលេងបើទោះជានៅកន្លែងណា នៅក្នុងស្រុកណាក៏ដោយ ឲ្យតែមន្ត្រីយើងទទូលបានព័ត៏មានជាក់លាក់ លោកស្នងការនឹងបញ្ជាឲ្យកម្លាំងការិយាល័យជំនាញ ចុះបង្ក្រាបភ្លាម ហើយយើងនៅតែបន្តកិច្ចប្រតិបត្តិការ បង្ក្រាបល្បែងស៊ីសងនេះជាបន្តបន្ទាប់ទៀត ទោះកើតមាននៅស្រុកណាក៏ដោយ ។
លោកស្នងការរងបានស្នើដល់ប្រជាពលរដ្ឋនៅក្នុងមូលដ្ឋានជួយផ្ដល់ព័ត៌មានអំពីទីតាំងល្បែងស៊ីសងខុសច្បាប់ទាំងអស់ដែលកំពុងប្រព្រឹត្ត មកកាន់កម្លាំងសមត្ថកិច្ច ដើម្បីងាយស្រូលក្នុងការចុះបង្ក្រាប៕
ចែករំលែកព័តមាននេះ