ខេត្តបាត់ដំបង ៖ ទឹកដោះគោស្រស់ ប្រមាណជាង ៩តោន ត្រូវបានកម្លាំងជំនាញសាខា «ក.ប.ប.» ខេត្តបាត់ដំបង ដុតកម្ទេចចោលបន្ទាប់ពីសមត្ថកិច្ចជំនាញ រកឃើញទំនិញទឹកដោះគោស្រស់ទាំងនោះ…
ខេត្តបាត់ដំបង ៖ ទឹកដោះគោស្រស់ ប្រមាណជាង ៩តោន ត្រូវបានកម្លាំងជំនាញសាខា «ក.ប.ប.» ខេត្តបាត់ដំបង ដុតកម្ទេចចោលបន្ទាប់ពីសមត្ថកិច្ចជំនាញ រកឃើញទំនិញទឹកដោះគោស្រស់ទាំងនោះ បានធ្វើការដឹកជញ្ជូនពុំមានលក្ខណៈសមស្របតាមលក្ខខណ្ឌតម្រូវសម្រាប់មនុស្សបរិភោគ ។
តាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម បានតែដឹងថា នារសៀលថ្ងៃទី១៧ ខែមីនា ឆ្នាំ២០២៥ មន្ត្រីអធិការកិច្ចម្ហូបអាហារ នៃសាខា ក.ប.ប. ខេត្តបាត់ដំបង សហការជាមួយមន្ត្រីនគរបាលប្រឆាំងបទល្មើសសេដ្ឋកិច្ចខេត្តបាត់ដំបង តំណាងក្រុមហ៊ុន UNT បានធ្វើការដុតកម្ទេចចោល នូវទំនិញទឹកដោះគោស្រស់ ដែលបានធ្វើការដឹកជញ្ជូនពុំមានលក្ខណៈសមស្របតាមលក្ខខណ្ឌតម្រូវសម្រាប់មនុស្សបរិភោគ (ដឹកជញ្ជូនពុំបានត្រឹមត្រូវ) ដែលកម្លាំងសមត្ថកិច្ចជំនាញនគរបាលប្រឆាំងបទល្មើសសេដ្ឋកិច្ចចាប់ឃាត់ទុកបាន ចំនួន ២១២ កេស ស្មើនឹង ១០,៦០០ដប ទម្ងន់សរុប ៩,៥៤០គីឡូក្រាម។ ទោះបីជាយ៉ាងណា មន្ត្រីជំនាញ មិនបានបញ្ជាក់ពីថា ទឹកដោះគោស្រស់ទាំងនោះ មានម៉ាក់អ្វីនោះទេ ។
ការដុតកម្ទេចនេះ ស្ថិតនៅទីលានចាក់សំរាម ភូមិអូរមុនី១ ឃុំអន្លង់វិល ស្រុកសង្កែ ខេត្តបាត់ដំបង ក្រោយពីទទួលបានគោលការណ៍អនុញ្ញាតពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង ៕
ចែករំលែកព័តមាននេះ