ទីក្រុងកៀវ៖ បន្ទាប់ពីសំណើនៃបទឈប់បាញ់ដាក់ជូនលោកពូទីនត្រូវលោកប្រកាសគាំទ្រ ប៉ុន្តែមិនចុះហត្ថលេខាទទួលយកទេ រុស្ស៊ី និងអ៊ុយក្រែនចាប់ផ្ដើមពន្លះគ្នាមួយអស់ដៃជាថ្មីម្ដងទៀត។ ភាគីទាំង២ព្យាយាមយកប្រៀបលើគ្នា ឬយ៉ាងហោចណាស់រក្សាទឹកដីដែលខ្លួនកំពុងគ្រប់គ្រងឱ្យនៅដូចដើមដើម្បីងាយស្រួលតថ្លៃគ្នានៅពេលមានការចរចាសន្តិភាព។ រយៈពេល២ថ្ងៃ សៅរ៍ និងអាទិត្យ…
ទីក្រុងកៀវ៖ បន្ទាប់ពីសំណើនៃបទឈប់បាញ់ដាក់ជូនលោកពូទីនត្រូវលោកប្រកាសគាំទ្រ ប៉ុន្តែមិនចុះហត្ថលេខាទទួលយកទេ រុស្ស៊ី និងអ៊ុយក្រែនចាប់ផ្ដើមពន្លះគ្នាមួយអស់ដៃជាថ្មីម្ដងទៀត។ ភាគីទាំង២ព្យាយាមយកប្រៀបលើគ្នា ឬយ៉ាងហោចណាស់រក្សាទឹកដីដែលខ្លួនកំពុងគ្រប់គ្រងឱ្យនៅដូចដើមដើម្បីងាយស្រួលតថ្លៃគ្នានៅពេលមានការចរចាសន្តិភាព។
រយៈពេល២ថ្ងៃ សៅរ៍ និងអាទិត្យ កងទ័ពទាំងសងខាងវាយប្រហារគ្នាយ៉ាងខ្លាំងក្លា។ ពោលគឺធ្វើឡើងត្រឹមតែបន្តិចប៉ុណ្ណោះបន្ទាប់ពីលោកពូទីនជួបប្រេសិតពិសេសរបស់លោកត្រាំ។ អ៊ុយក្រែន និងរុស្ស៊ីអះអាងថាយន្តហោះដ្រូនរបស់ភាគីម្ខាងៗជាង១រយគ្រឿងបានហោះទៅវាយប្រហារទីតាំងរបស់ខ្លួន។ នេះបើយោងតាមការផ្សាយរបស់ទីភ្នាក់ងារព័ត៌មានអេភី (AP)។
លោកពូទីនថ្លែងថាលោកគាំទ្រស្មារតីជារួមនៃបទឈប់បាញ់រយៈពេល៣០ថ្ងៃ។ ប៉ុន្តែលោកស្នើសុំឱ្យសរសេរឡើងវិញឱ្យបានច្បាស់លាស់ និងលម្អិតជាងនេះ។ មិនតែប៉ុណ្ណោះ លោកបានផ្ញើទៅឱ្យលោកត្រាំវិញនូវលក្ខខណ្ឌមួយចំនួនសម្រាប់ជាការពិចារណាដាក់បញ្ចូលទៅក្នុងគម្រោងសរសេរបទឈប់បាញ់នៅពេលក្រោយទៀត។ ទោះជាយ៉ាងណាក្ដី នាយករដ្ឋមន្ត្រីអង់គ្លេសនិយាយបែបដេញជើងថាបើលោកពូទីនពិតជាគាំទ្របទឈប់បាញ់មែន គាត់គួរណាស់ចុះហត្ថលេខាយល់ព្រម។
នៅក្នុងសេចក្ដីថ្លែងការណ៍ថ្មីៗនេះ លោកហ្សេឡិនស្គីចោទប្រកាន់ថារុស្ស៊ីកំពុងពង្រឹងកម្លាំងយោធាបន្ថែមទៀតនៅតាមព្រំដែន។ នៅក្នុងន័យនេះ លោកយល់ថាទីក្រុងម៉ូស្គូមានចេតនាមិនចង់ដោះស្រាយបញ្ហាតាមការទូតទេ។ ប៉ុន្តែចង់ធ្វើសង្គ្រាមជាបន្តទៀត។ លោកហ្សេឡិនស្គីយល់ថាបើរុស្ស៊ីមិនទទួលយកបទឈប់បាញ់ទេ អាមេរិកគួរចាត់វិធានការក្ដៅទៅលើរុស្ស៊ី។
កាលពីយប់មិញ អ៊ុយក្រែនថាខ្លួនរងការវាយប្រហារដោយដ្រូន១៧៨គ្រឿងរបស់រុស្ស៊ី។ រុស្ស៊ីក៏បានបាញ់មីស៊ីលផ្លោងប្រភេទបលលីសស្ទីក (ballistic) ២គ្រាប់ចូលទឹកដីអ៊ុយក្រែនផងដែរ។ កងទ័ពអាកាសអ៊ុយក្រែនថ្លែងថារុស្ស៊ីបានប្រើប្រាស់ចម្រុះគ្នានូវដ្រូនអត្តឃាតរបស់អ៊ីរ៉ង់ម៉ាកសាហ៊ីតផង (Shahed) និងដ្រូនធម្មតាផងដើម្បីបោកបញ្ឆោតប្រព័ន្ធការពារដែនអាកាស។
អ៊ុយក្រែនក៏មិនណយប៉ុន្មានដែរបានបញ្ជូនដ្រូនវាយប្រហារទីក្រុងវ៉ុលហ្គោក្រាត (Volgograd) របស់រុស្ស៊ី ប៉ុន្តែត្រូវខែលការពារដែនអាកាសរុស្ស៊ីបាញ់ទម្លាក់។ បំណែករបស់ដ្រូនបានបង្កជាអគ្គិភ័យនៅក្បែររោងចក្រចម្រាញ់ប្រេង។ ព្រលានយន្តហោះនៅក្បែរនោះត្រូវផ្អាកដំណើរការជាបណ្ដោះអាសន្ន។ សារព័ត៌មានក្នុងស្រុកផ្សាយថាគ្មានមនុស្សស្លាប់ ឬរបួសទេ។
ផលវិបាកនៃសង្គ្រាមអ៊ុយក្រែន
សង្គ្រាមរយៈពេលជាងបីឆ្នាំនេះបានឆក់យកជីវិតយុទ្ធជនរុស្ស៊ី និងអ៊ុយក្រែនច្រើនណាស់ព្រោះសង្គ្រាមនេះមិនសាមញ្ញពេកទេ។ ថ្វីដ្បិតពីសម្បកក្រៅជាសង្គ្រាមរវាងរុស្ស៊ី និងអ៊ុយក្រែន ប៉ុន្តែអាមេរិកទទួលស្គាល់ថាវាជាសង្គ្រាមប្រយោលរវាងរុស្ស៊ី និងមហាអំណាចបស្ចិមប្រទេសដោយខ្ចីដៃរបស់អ៊ុយក្រែនសម្រាប់ប្រើប្រាស់។ សារព័ត៌មានហ៊ីនឌូស្ថានថាមស៍របស់ឥណ្ឌា (Hindustan Times) បានដកស្រង់ប្រភពពីភ្នាក់ងារសម្ងាត់អាមេរិកមកចុះផ្សាយថារុស្ស៊ីស្លាប់ និងរបួសជាង១សែននាក់។
រុស្ស៊ីក៏ខាតបង់លុយមិនស្ទើរដែរព្រោះត្រូវចំណាយលើប្រាក់ឧបត្ថម្ភបេសកកម្ម, ចំណាយទៅលើអាវុធយុទ្ធភ័ណ្ឌ និងទទួលរងទណ្ឌកម្មសេដ្ឋកិច្ច និងហិរញ្ញវត្ថុថែមទៀត។ សម្រាប់អ៊ុយក្រែន ក្រៅពីស្លាប់ និងរបួសជាង១សែននាក់ អ៊ុយក្រែនក៏រងគ្រោះខ្លាំងផ្នែកសេដ្ឋកិច្ចដូចគ្នា។ ក្រៅពីនេះ ហេដ្ឋារចនាសម្ព័ន្ធ មនុស្សធម៌ សង្គមកិច្ចក៏រងផលប៉ះពាល់យ៉ាងខ្លាំងផងដែរ។
ជាលទ្ធផលនៃសង្គ្រាម រុស្ស៊ីគ្រប់គ្រង២០%នៃទឹកដីអ៊ុយក្រែន។ អ៊ុយក្រែនកាលពីមុននេះគ្រប់គ្រងទឹកដីរុស្ស៊ីបានច្រើនពាន់គីឡូម៉ែត្រការ៉េនៅតំបន់ខឺស។ ប៉ុន្តែឥឡូវនេះឮថាពួកគេបានរបូតទឹកដីទាំងនោះទៅ ហើយកំពុងជាប់ការឡោមព័ទ្ធ។ បើមិនលើកដៃសូមចុះចាញ់ទេមានផ្លូវស្លាប់១មុខគត់។ ប៉ុន្តែហ្សេឡិនស្គីប្រកែកថាកងទ័ពរបស់គាត់នៅតែប្រយុទ្ធគ្នាជាបន្តទៀត។
ដោយឡែក ក្រុមបស្ចិមប្រទេសថ្វីដ្បិតមិនបានបញ្ជូនទ័ពជាផ្លូវការទៅច្បាំងដោយផ្ទាល់ ប៉ុន្តែក្រុមអ្នកស្ម័គ្រចិត្តរបស់ខ្លួនក៏ទៅជួយច្បាំងនៅអ៊ុយក្រែនផងដែរ។ អាមេរិក និងអឺរ៉ុបបានចំណាយលុយជាង២៦០ពាន់លានដុល្លារដើម្បីជួយអ៊ុយក្រែន។ អគ្គលេខាធិការអង្គការណាតូថ្លែងថារដ្ឋជាសមាជិកអង្គការណាតូបានផ្ដល់ជំនួយទៅអ៊ុយក្រែនជាង៥០ពាន់លានដុល្លារ។
ដូច្នេះសរុបទៅមិនក្រោម៣០០ពាន់លានដុល្លារនោះទេគ្រាន់តែផ្ដល់ជំនួយសម្រាប់អ៊ុយក្រែន។ នេះបើយោងតាមការផ្សាយរបស់គេហទំព័រប៊ីប៊ីស៊ីរបស់អង់គ្លេស។ លោកត្រាំឥឡូវនេះ ចាប់ផ្ដើមប្រើថវិកាយ៉ាងត្បិតត្រៀតសន្សំសំចៃជាទីបំផុត និងផ្ដាច់ជំនួយខ្ទេចខ្ទីអស់ហើយដើម្បីប្រមូលលុយទៅជួយអ៊ុយក្រែន។ ហេតុនេះហើយបានជាលោកចង់បញ្ចប់សង្គ្រាមឱ្យបានឆាប់តាមដែលអាចធ្វើទៅបាន៕
ចែករំលែកព័តមាននេះ