ខេត្តប៉ៃលិន ៖ ប្រជាពលរដ្ឋជាច្រើនគ្រួសារ បាននាំគ្នាត្អូញត្អែរ អំពីបញ្ហាក្លិនទឹកស្អុយ ដែលបានហូរមកពីផ្នែកខាងលើ ធ្លាក់ចូលទៅក្នុងអូរ ដែលពួកគាត់ធ្លាប់ប្រើប្រាស់ប្រចាំថ្ងៃ ធ្វើឱ្យប៉ះពាល់ដល់ការរស់នៅ និងធ្វើឱ្យពុលងាប់ត្រីផងដែរ…
ខេត្តប៉ៃលិន ៖ ប្រជាពលរដ្ឋជាច្រើនគ្រួសារ បាននាំគ្នាត្អូញត្អែរ អំពីបញ្ហាក្លិនទឹកស្អុយ ដែលបានហូរមកពីផ្នែកខាងលើ ធ្លាក់ចូលទៅក្នុងអូរ ដែលពួកគាត់ធ្លាប់ប្រើប្រាស់ប្រចាំថ្ងៃ ធ្វើឱ្យប៉ះពាល់ដល់ការរស់នៅ និងធ្វើឱ្យពុលងាប់ត្រីផងដែរ ដែលបញ្ហានេះ បានកើតឡើងកាលពីរសៀលថ្ងៃទី១៥ ខែមីនា ឆ្នាំ២០២៥ ស្ថិតនៅចំណុចក្បាលឡាន ក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
បើតាមប្រភពព័ត៌មានពីប្រជាពលរដ្ឋរស់នៅក្នុងភូមិភ្នំស្ពង់ បានរៀបរាប់ឱ្យដឹងថា តាំងពីដើមរៀងរហូតមក ទឹកអូរខាងលើនេះ ត្រូវបានប្រជាពលរដ្ឋ ប្រមាណជាង៤០គ្រួសារ ដួសយកទៅស្រោចដំណាំ និងប្រើប្រាស់បោកគក់សម្លៀកបំពាក់ ព្រមទាំងអ្នកខ្លះយកទៅដាំបាយធ្វើម្ហូបអាហារប្រចាំថ្ងៃថែមទៀតផង។ តែរយៈពេលប៉ុន្មានឆ្នាំចុងក្រោយនេះ ស្រាប់តែទឹកអូរខាងលើ ប្រែក្លាយទៅជាមានក្លិនស្អុយ ធ្វើឱ្យពុលត្រី ក្នុងអូរងាប់ ជាបន្តបន្ទាប់គ្មានសល់អ្វីមួយឡើយ សូម្បីតែសត្វមាន់ សត្វទា និងសត្វគោរបស់អ្នកភូមិ ដែលចុះទៅផឹកទឹកអូរនេះ ក៏ទទួលរងគ្រោះថ្នាក់បណ្តាលឱ្យពុលផងដែរ ។
បើតាមប្រភពព័ត៌មានពីស្ត្រី ឈ្មោះ ចាន់ សុំ អាយុ៦៤ឆ្នាំ និងឈ្មោះ ស្រីរ័ត្ន អាយុ២៤ឆ្នាំ រស់នៅក្នុងភូមិខាងលើ បានឱ្យដឹងដូចៗ គ្នាថា ទឹកអូរខាងលើនេះ បានចាប់ផ្តើមទៅជាស្អុយអស់រយៈពេលជាងកន្លះខែ កន្លងមកហើយ នាដើមឆ្នាំ២០២៥ ខណៈពេលដែលពីមុន ក៏ធ្លាប់ទទួលរងនូវបញ្ហាក្លិនស្អុយបែបនេះម្តងដែរ តែក្រោយមកក៏បាត់ស្អុយទៅវិញ។ ស្រាប់តែនៅពេលនេះ បន្ទាប់ពីភ្លៀងធ្លាក់ជាប់ៗគ្នា បណ្តាលឱ្យទឹកអូរខាងលើ ប្រែក្លាយទៅជាស្អុយ មិនអាចឱ្យពួកគាត់ប្រើប្រាស់កើតឡើយ ថែមទាំងធ្វើឱ្យត្រីក្នុងអូរងាប់អណ្តែតត្រៀបត្រា និងបង្កក្លិនស្អុយឆួលចូលទៅក្នុងផ្ទះពួកគាត់ រំខានដល់ការរស់នៅ និងបង្កជាជំងឺផ្តាសាយរលាកបំពង់ក. ថែមទៀត ។
ពួកគាត់បន្តទៀតថា ទឹកស្អុយនេះ បានហូរក្នុងទិសដៅពីលិចទៅកើត និងបត់បែនពីជើងទៅត្បូង មកពីភូមិអូររអិល ឃុំស្ទឹងកាច់ ស្រុកសាលាក្រៅ ដោយកាលពីប៉ុន្មានឆ្នាំមុន គេសង្ស័យថា មានការបង្ហូរទឹកស្អុយចូលទៅក្នុងអូរ ខណៈដែលរោងចក្រចិនក្រុមហ៊ុនផលិតដំណាប់ផ្លែស្វាយ បានធ្វើឱ្យហូរទឹកកាកសំណល់ចូលទៅក្នុងអូរ លុះក្រោយមកក៏មានការផ្អាកហូរទៅវិញ ព្រោះអាជ្ញាធរមូលដ្ឋាន បានចុះពិនិត្យ និងណែនាំដល់ម្ចាស់ក្រុមហ៊ុន ឱ្យរៀបចំកន្លែងស្តុកទឹកស្អុយ ដើម្បីកុំឱ្យប៉ះពាល់ដល់ប្រជាពលរដ្ឋ ។
ពួកគាត់បញ្ជាក់ទៀតថា ក្លិនទឹកស្អុយកាកសំណល់ ក៏លែងមានបន្តទៀត អស់រយៈពេលជាច្រើនខែកន្លងមក។ ប៉ុន្តែនៅពេលនេះ ស្រាប់តែមានទឹកស្អុយ ចាប់ផ្តើមហូរចូលទៅក្នុងអូរ ដែលពួកគាត់ប្រើប្រាស់ឡើងវិញ បណ្តាលឱ្យប៉ះពាល់ដល់បញ្ហាជីវភាពរស់នៅប្រចាំថ្ងៃរបស់ពួកគាត់។ ហើយពួកគាត់ ក៏សំណូមពរដល់អាជ្ញាធរមូលដ្ឋាន ឱ្យចុះពិនិត្យ និងជួយទប់ស្កាត់កុំឱ្យទឹកស្អុយបែបនេះ ហូរធ្លាក់ក្នុងអូរបន្តទៅទៀត ។
ពាក់ព័ន្ធទៅនឹងបញ្ហានេះ លោក ស័ក្តិ សាវរិទ្ធ ប្រធានមន្ទីរបរិស្ថានខេត្តប៉ៃលិន បានឱ្យដឹងថា ទឹកស្អុយនេះ កន្លងមកបង្កពីរោងចក្រចិនផលិតដំណាប់ផ្លែស្វាយ នៅផ្នែកខាងលើ។ តែបន្ទាប់ពីអាជ្ញាធរចុះណែនាំ ខាងម្ចាស់ក្រុមហ៊ុន បានរៀបចំបិទ និងស្តុកទឹកស្អុយនៅកន្លែងរបស់ខ្លួនរួចរាល់ហើយ កាលពីឆ្នាំមុន។ តែដោយសារមានក្អែលចាស់ៗ ជាតិស្អុយនៅកកក្នុងបាតអូរនារដូវប្រាំង លុះភ្លៀងធ្លាក់ជោកជាំ បណ្តាលឱ្យក្អែលចាស់នោះហូរម្តងទៀត ទើបបង្កទៅជាក្លិនស្អុយ។ ទោះបីជាយ៉ាងណា ខាងលោកនឹងចាត់មន្ត្រីជំនាញ ឱ្យចុះពិនិត្យ ដើម្បីដោះស្រាយបញ្ហានេះជូនដល់ប្រជាពលរដ្ឋខាងលើ ៕
ចែករំលែកព័តមាននេះ