រាជធានីភ្នំពេញ ៖ ជនសង្ស័យម្នាក់ ដែលឆក់កាបូបជនបរទេសជាគូដណ្ដឹងរបស់លោក Christ ដែលជា Vlogger ល្បីឈ្មោះ ត្រូវបានកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ…
រាជធានីភ្នំពេញ ៖ ជនសង្ស័យម្នាក់ ដែលឆក់កាបូបជនបរទេសជាគូដណ្ដឹងរបស់លោក Christ ដែលជា Vlogger ល្បីឈ្មោះ ត្រូវបានកម្លាំងនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ សហការជាមួយនគរបាលព្រហ្មទណ្ឌ នៃស្នងការនគបាលរាជធានីភ្នំពេញ និងនគរបាលមូលដ្ឋាន ស្រាវជ្រាវបង្ក្រាបបានហើយ ។
មន្ត្រីនគរបាល ឱ្យដឹងថា ជនសង្ស័យរូបនោះឈ្មោះ កែវ ខួចចិន្តា ជាមុខសញ្ញាចាស់ ត្រូវបានកម្លាំងសមត្ថកិច្ចចាប់ខ្លួនបាននៅចំណុចបន្ទប់ជួល ផ្លូវ៩៣ ក្នុងសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ កាលពីវេលាម៉ោង១៦និង៥៥នាទីរសៀល នៅថ្ងៃទី១៥ ខែមីនា ឆ្នាំ២០២៥នេះ ។
តាមនគរបាល ឲ្យដឹងថា បន្ទាប់ពីមានករណីមានជនបរទេស២នាក់ (ជាគូដណ្ដឹង) ធ្វើការឡាយវីដេអូផ្សព្វផ្សាយតាមបណ្តាញសង្គម ថា មានករណីចោរឆក់កាបូបរបស់ពួកគេបានសម្រច កើតឡើងនៅវេលាម៉ោង១២និង៤០នាទី ថ្ងៃទី១៥ ខែមីនា ឆ្នាំ២០២៥ ចំណុចផ្លូវ១០៦ កែងផ្លូវលេខ១៣ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។
ក្រោយពីទទួលបានព័ត៌មាននេះភ្លាម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានី ក៏បានបញ្ជាដល់សមត្ថកិច្ចជំនាញ នៃអធិការដ្ឋាននគរបាលខណ្ឌដូនពេញ បានស្វះស្វែងរកជនរងគ្រោះ ជាជនជាតិបរទេសខាងលើ ។បន្ទាប់មក សមត្ថកិច្ចបានរកឃើញជនរងគ្រោះ ដោយបានអញ្ជើញពួកគាត់មកកាន់ប៉ុស្តិ៍នគរបាលរដ្ឋបាលវត្តភ្នំ សួរនាំដំណើររឿង និងជនរងគ្រោះបានដាក់ពាក្យបណ្តឹងភ្លាម សមត្ថកិច្ចជំនាញកំពុងធ្វើការងារតាមជំនាញជាបន្ទាន់ ។
បានតែប៉ុន្មានម៉ោងក្រោយមក ដោយមានការស្រាវជ្រាវស៊ើបអង្កេតពីកម្លាំងជំនាញព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងជំនាញ នាយកដ្ឋាននគរបាលព្រហ្មទណ្ឌ កំណត់បានមុខសញ្ញាជនសង្ស័យ នៅរសៀលថ្ងៃដដែលទី១៥ ខែមីនា ឆ្នាំ២០២៥ សមត្ថកិច្ចបានឈានចាប់ឃាត់ខ្លួនជនសង្ស័យឈ្មោះ កែវ ខួចចិន្តា នៅចំណុចបន្ទប់ជួល ផ្លូវ៩៣ ក្នុងសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ ព្រមទាំងដកហូតសម្ភាររបស់ជនរងគ្រោះមកវិញ ផងដែរ ។
បច្ចុប្បន្ន ជនសង្ស័យ កំពុងត្រូវបានឃាត់ខ្លួនសាកសួរនៅនាយកដ្ឋាននគរបាលព្រហ្មទណ្ឌ ដើម្បីចាត់ការតាមនីតិវិធី ។
សូមជម្រាបផងដែរថា លោក Christ និងគូដណ្តឹង នឹងធ្វើដំណើរចាកចេញពីកម្ពុជាត្រលប់ទៅអាមេរិកវិញ ហើយក្នុងដំណើរត្រឡប់មកកម្ពុជានៅខែក្រោយ លោក Christ បានសន្យាថា នឹងនាំ Vlogger ល្បីៗមកជាមួយ ដើម្បីជួយផ្សព្វផ្សាយពីប្រទេសកម្ពុជា ទៅកាន់ពិភពលោក កាន់តែខ្លាំងឡើង ព្រោះលោកស្រឡាញ់កម្ពុជា ។ លោក Christ មិនភ្លេចរម្លឹកដែរថា ពេលលោកទៅប្រទេសវៀតណាម ក៏ធ្លាប់ចោរឆក់កាបូបដែរ ហើយញឹកទៀត តែសម្រាប់កិច្ចអន្តរាគមន៍វិញ មិនដូចសមត្ថកិច្ចកម្ពុជានោះទេ ៕
ចែករំលែកព័តមាននេះ