រដ្ឋបាលខណ្ឌឫស្សីកែវ លើកទឹកចិត្តដល់កងកម្លាំងបង្ការ ពន្លត់អគ្គិភ័យ និងសង្គ្រោះ
រាជធានីភ្នំពេញ ៖ លោក ជិន ប៊ុនធឿន ប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ នៅព្រឹកថ្ងៃសុក្រ ទី១៤ ខែមីនា ឆ្នាំ២០២៥នេះ…
រាជធានីភ្នំពេញ ៖ លោក ជិន ប៊ុនធឿន ប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ នៅព្រឹកថ្ងៃសុក្រ ទី១៤ ខែមីនា ឆ្នាំ២០២៥នេះ បានចុះសួរសុខទុក្ខកងកម្លាំងពន្លត់អគ្គិភ័យ នៃការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ដែលប្រចាំការនៅក្នុងមូលដ្ឋានខណ្ឌឫស្សីកែវ និងបាននាំយកនូវសម្ភារមួយចំនួនជា ឯកសណ្ឋានសង្គ្រោះ និងពន្លត់អគ្គិភ័យ ទឹកសុទ្ធ រួមជាមួយថវិការមួយចំនួន ដើម្បីលើកទឹកចិត្តដល់កងកម្លាំង ។
លោក ជិន ប៊ុនធឿន ក្នុងនាមលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងក្នុងនាមរដ្ឋបាលខណ្ឌឫស្សីកែវ លោកមានការស្ញប់ស្ញែងចំពោះវីរភាពកងកម្លាំងនគរបាលពន្លត់អគ្គិភ័យទាំងអស់ ដែលកំពុងបំពេញកាតព្វកិច្ច ប្រកបដោយការទទួលខុសត្រូវខ្ពស់បំផុត ទាំងកម្លាំងកាយចិត្ត មិនខ្លាចនឿយហត់យប់ឬថ្ងៃ គ្មានពេលសម្រាក។ ទោះបីពេលខ្លះ អាចរងរបួស និងគ្រោះថ្នាក់ដល់អាយុជីវិតក្នុងពេលប្រតិបត្តិការសង្គ្រោះយ៉ាងណាក្តី គឺកងកម្លាំងយើង តែងចុះជួយទាន់ពេលវេលាភ្លាមៗ និងមានប្រសិទ្ធភាព ដែលនេះជាការផ្តល់ភាពកក់ក្តៅដល់ប្រជាពលរដ្ឋរស់នៅក្នុងមូលដ្ឋាន ។
លោកអភិបាល ក៏បានណែនាំបងប្អូនកងកម្លាំងទាំងអស់ ត្រូវប្រុងប្រយ័ត្នពីសុវត្ថិភាពផ្ទាល់ខ្លួន ក្នុងពេលមានប្រតិបត្តិការសង្គ្រោះពន្លត់អគ្គិភ័យក្នុងមូលដ្ឋាន ៕
ចែករំលែកព័តមាននេះ