នៅដើមឆ្នាំ២០២៥នេះ ស្ថានភាពនៃសរសរស្តម្ភកំណើនសេដ្ឋកិច្ចរបស់កម្ពុជាសំខាន់ៗដែលរួមមាន ពាណិជ្ជកម្ម ទេសចរណ៍ និងការបណ្តាក់ទុន គឺសុទ្ធតែមានស្ថានភាពដ៏វិជ្ជមានជាមួយនឹងកំណើនគួរឲ្យកត់សម្គាល់ ។ ប៉ុន្តែអ្នកវិភាគស្នើឲ្យមានការប្រុងប្រយ័ត្ន ខណៈអាមេរិកដែលជាទីផ្សារ និងបង្គោលធំនៃចរន្តសេដ្ឋកិច្ចពិភពលោកគ្រោងចេញគំនាបពន្ធលើប្រទេសទូទៅដែលនាំចូលប្រទេសខ្លួនហើយ…
នៅដើមឆ្នាំ២០២៥នេះ ស្ថានភាពនៃសរសរស្តម្ភកំណើនសេដ្ឋកិច្ចរបស់កម្ពុជាសំខាន់ៗដែលរួមមាន ពាណិជ្ជកម្ម ទេសចរណ៍ និងការបណ្តាក់ទុន គឺសុទ្ធតែមានស្ថានភាពដ៏វិជ្ជមានជាមួយនឹងកំណើនគួរឲ្យកត់សម្គាល់ ។ ប៉ុន្តែអ្នកវិភាគស្នើឲ្យមានការប្រុងប្រយ័ត្ន ខណៈអាមេរិកដែលជាទីផ្សារ និងបង្គោលធំនៃចរន្តសេដ្ឋកិច្ចពិភពលោកគ្រោងចេញគំនាបពន្ធលើប្រទេសទូទៅដែលនាំចូលប្រទេសខ្លួនហើយ ។
របាយការណ៍ផ្លូវការដែលចេញផ្សាយ កាលពីថ្ងៃច័ន្ទសប្តាហ៍នេះ បានឱ្យដឹងថា ទំហំពាណិជ្ជកម្មក្រៅប្រទេសរបស់កម្ពុជា ឈានដល់តម្លៃ ៩,៤៤ ពាន់លានដុល្លារ ក្នុងរយៈពេលពីរខែដំបូងនៃឆ្នាំ ២០២៥ កើនឡើង ១៦ ភាគរយធៀបនឹងរយៈពេលដដែលកាលពីឆ្នាំ២០២៤ ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករបានឱ្យដឹងថា ការនាំចេញសរុបរបស់កម្ពុជាមានទំហំ៤,៤៦ពាន់លានដុល្លារ ក្នុងអំឡុងខែមករា ដល់ខែកុម្ភៈឆ្នាំនេះកើនឡើងជិត១២ភាគរយ ហើយការនាំចូលសរុបមានតម្លៃជិត៥ពាន់លានដុល្លារកើនឡើង២០,៦ភាគរយ ។
ប្រទេសកម្ពុជាបាននាំចេញជាចម្បងនូវផលិតផលកាត់ដេរ ស្បែកជើង និងទំនិញធ្វើដំណើរកង់ សំបកកង់រថយន្ត បន្ទះស្រូបពន្លឺព្រះអាទិត្យ កៅស៊ូស្ងួត អង្ករ ចេក ស្វាយចន្ទី និងស្វាយជាដើម ហើយបាននាំចូលវត្ថុធាតុដើមសម្រាប់កាត់ដេរ ស្បែកជើង និងទំនិញធ្វើដំណើរប្រេងឥន្ធនៈសម្ភារៈសំណង់ រថយន្ត និងម៉ូតូ និងទំនិញប្រើប្រាស់ផ្សេងៗទៀតមកវិញ ។
ដោយឡែក សម្រាប់វិស័យទេសចរណ៍ដែលជាវិស័យសេវាកម្មដ៏សំខាន់របស់ប្រទេសវិញ ស្ថិតិកាលពីខែមករា បង្ហាញថា បានកត់ត្រាភ្ញៀវបរទេសសរុបចំនួន៦១១.៨៩៤នាក់កើនឡើង១៣,៣ ភាគរយធៀបនឹងខែដូចគ្នា កាលពីឆ្នាំមុន ស្របពេលដែលរដ្ឋាភិបាលគ្រោងទាក់ទាញភ្ញៀវទេសចរឲ្យបាន៧,៥លាននាក់ នៅក្នុងឆ្នាំ២០២៥នេះ ។
ក្រសួងទេសចរណ៍កាលពីថ្ងៃអង្គារ៍បានអះអាងថា ជនជាតិថៃបានឈរលើកំពូលតារាង តាមពីក្រោយដោយប្រទេសវៀតណាម និងចិន ។ ដោយឡែក លើផ្នែកវិនិយោគវិញក្រុមប្រឹក្សាអភិវឌ្ឍន៍កម្ពុជា កាលពីថ្ងៃអង្គារ៍ បានឱ្យដឹងថា ប្រទេសកម្ពុជាបានអនុម័តគម្រោងវិនិយោគ ដែលមានតម្លៃសរុបដល់ទៅ១ពាន់លានដុល្លារ ក្នុងរយៈពេលពីរខែដំបូងនៃឆ្នាំ២០២៥ ។ សេចក្តីប្រកាសព័ត៌មានបានបន្ថែមថា កម្ពុជាបានអនុម័តគម្រោងវិនិយោគសរុបចំនួន១១២ ក្នុងអំឡុងពេលពីខែមករា ដល់ខែកុម្ភៈ ឆ្នាំនេះដែលបង្កើតការងារបានប្រមាណ៧ម៉ឺននាក់ ។ ហើយគម្រោងធំៗរួមមាន រោងចក្រផលិតឧបករណ៍យានដ្ឋាន រោងចក្រផលិតសំបកកង់រថយន្ត រោងចក្រដំឡើងរថយន្ត រោងចក្រកែច្នៃដែក រោងចក្រផលិតផលិតផលផ្លាស្ទិក រោងចក្រថាមពលពន្លឺព្រះអាទិត្យ និងរោងចក្រកាត់ដេរ និងទំនិញធ្វើដំណើរ ។
ពាក់ព័ន្ធនឹងស្ថានភាពបែបនេះ អ្នកវិភាគបានសារទរ ប៉ុន្តែជាមួយគ្នានេះក៏រំលេច និងកន្ត្រាក់ការប្រុងប្រយ័ត្ន និងលើកទឹកចិត្តឲ្យកម្ពុជាត្រៀមលក្ខណៈសម្បត្តិឲ្យហើយ ដើម្បីឆ្លើយតបនឹងបញ្ហាសំពាធពន្ធ និង ស្ថានភាពនានាដែលអាចកើតមាននៅលើពិភពលោក ជាពិសេស គឺអ្វីដែលចេញពីសេចក្តីសម្រេចរបស់រដ្ឋបាលលោកប្រធានាធិបតី ដូណាល់ ត្រាំ ។
លោកបានលើកឡើងថា លោកត្រាំ ពិតជាមិនខ្វល់ពីកម្ពុជាទេ ដោយសារតែទីផ្សារតូច ប៉ុន្តែលោកធ្លាប់បានបង្ហើបហើយថា សហរដ្ឋអាមេរិកនឹងទារពន្ធរាល់ទំនិញទាំងអស់ប្រមាណជា១០ភាគរយ ។ ក្រៅពីនោះ សំពាធពន្ធដែលលោកដាក់លើចិន កាណាដា និងម៉ិកស៊ិក និងសេចក្តីសម្រេចចិត្តផ្សេងៗនៅលើ ពិភពលោក គឺសុទ្ធតែមានផលប៉ះពាល់ដល់កម្ពុជាផងដែរ ៕
ចែករំលែកព័តមាននេះ