សហរដ្ឋអាមេរិក ៖ កំពូលអ្នកប្រដាល់អាមេរិក Floyd Mayweather ដែលជាអ្នកប្រដាល់រកចំណូលបានច្រើនជាងគេនៅក្នុងប្រវត្តិសាស្ត្រនោះ បានបង្ហាញពីអគារអាផាតមិនចំនួន៦២ខ្នង សរុបមានជាង១ពាន់បន្ទប់ ដែលខ្លួនបានទិញនៅក្នុងតម្លៃ ៤០២លានដុល្លារអាមេរិក…
សហរដ្ឋអាមេរិក ៖ កំពូលអ្នកប្រដាល់អាមេរិក Floyd Mayweather ដែលជាអ្នកប្រដាល់រកចំណូលបានច្រើនជាងគេនៅក្នុងប្រវត្តិសាស្ត្រនោះ បានបង្ហាញពីអគារអាផាតមិនចំនួន៦២ខ្នង សរុបមានជាង១ពាន់បន្ទប់ ដែលខ្លួនបានទិញនៅក្នុងតម្លៃ ៤០២លានដុល្លារអាមេរិក ស្ថិតនៅតំបន់ Manhattan ទីក្រុងញូវយ៉ក សហរដ្ឋអាមេរិក។
តាមរយៈវីដេអូបង្ហោះនៅក្នុងគណនី Instagram ដែលមានអ្នកតាមដានជិត៣០លាននាក់ Floyd បានប្រាប់ថា រូបគេបានទិញអគារអាផាតមិនទាំងស្រុងដោយលុយខ្លួនឯង គ្មានដៃគូសហការអាជីវកម្មណាមួយឡើយ។ អគារអាផាតមិន ដែលមានទីតាំងនៅក្នុងសង្កាត់ Morningside Heights, Upper Manhattan និង Harlem ជាកម្មសិទ្ធិរបស់ Floyd នឹងត្រូវដាក់ជួល ដែលអាចរកចំណូលបានរាប់លានដុល្លារក្នុងមួយខែ។
យ៉ាងណាមិញ ការចំណាយជាង៤០០លានដុល្លារនេះ Floyd អះអាងថា គ្រាន់តែជាការចាប់ផ្តើមប៉ុណ្ណោះ ដូច្នេះនៅមានបន្តទៀត។ ក្នុងវីដេអូនោះ Floyd បានដើរចង្អុលអគារទាំងអស់ជាកម្មសិទ្ធិរបស់ខ្លួន ហើយក៏បានបញ្ជាក់ថា ហាងទំនិញលក់រាយទាំងអស់នៅក្រោមអគារក៏ជារបស់ខ្លួនផងដែរ។
សូមជម្រាបថា Floyd Mayweather កើតនៅឆ្នាំ ១៩៧៧ នៅទីក្រុង Grand Rapids រដ្ឋមីឈីហ្គេន បានចាប់ផ្តើមអាជីពប្រដាល់នៅឆ្នាំ ១៩៩៦ ដោយឆ្លងកាត់ការប្រកួតសរុបចំនួន៥០លើក ឈ្នះទាំងអស់ និងផ្តួលគូប្រកួតសន្លប់ចំនួន ២៧លើក ដោយទទួលបានរហស្សនាមថា «អ្នកប្រដាល់មិនស្គាល់ចាញ់»។ Floyd ឈ្នះខ្សែវាត់ពិភពលោកចំនួន១៥ដង លើប្រភេទទម្ងន់៥ផ្សេងគ្នា ហើយត្រូវបានគេចាត់ទុកជាអ្នកប្រដាល់ដ៏អស្ចារ្យបំផុតគ្រប់ពេល។
កំពូលអ្នកប្រដាល់កម្ពស់១,៧៣ម៉ែត្ររូបនេះ រកចំណូលបានរហូតដល់ ១.៤៨ពាន់លានដុល្លារពីអាជីពប្រដាល់ និងដៃគូឧបត្ថម្ភរបស់ខ្លួន ដែលធ្វើឱ្យរូបគេក្លាយជាអ្នកប្រដាល់រកចំណូលបានច្រើនបំផុតក្នុងប្រវត្តិសាស្ត្រ។ រូបគេក៏ជាប់ចំណាត់ថ្នាក់ក្នុងបញ្ជីអត្តពលិកកំពូលទាំង ១០ ដែលរកចំណូលបានខ្ពស់បំផុតមិនធ្លាប់មានក្នុងប្រវត្តិសាស្ត្រ ដោយមានកំពូលកីឡាករបាល់បោះអាមេរិក Michael Jordan ឈរកំពូលតារាងនេះ ជាមួយប្រាក់ចំណូលរហូតដល់ ៣.៧៥ពាន់លានដុល្លារ។
Floyd បានចូលនិវត្តន៍ពីអាជីពនៅឆ្នាំ ២០១៧ ប៉ុន្តែចាប់តាំងពីពេលនោះមក រូបគេឡើងសង្វៀនប្រកួតក្រៅផ្លូវការ ឬមិនអាជីព ដោយរកបានចំណូលរាប់សិបលានដុល្លារក្នុងមួយប្រកួតៗ ជួនកាលអាចលើសពី១០០លានដុល្លារក៏មាន។ កាលពីថ្មីៗនេះ Floyd ទើបតែបង្កើតរឿងភ្ញាក់ផ្អើលលើប្រព័ន្ធផ្សព្វផ្សាយពិភពលោក តាមរយៈពាក្យចចាមអារ៉ាមថារូបគេកំពុងរៀបចំផែនការត្រឡប់ឡើងសង្វៀនវិញនៅឆ្នាំនេះ ជាមួយនឹងគូប្រកួតដែលអាចមានដូចជា Logan Paul, John Gotti ជាដើម។ ប៉ុន្តែរហូតមកទល់ពេលនេះ គ្មានកិច្ចសន្យាមួយណាកើតឡើងនៅឡើយទេ។
ក្រៅពីជាអ្នកប្រដាល់ដ៏អស្ចារ្យ Floyd ក៏ជាអ្នកជំនួញដ៏ប៉ិនប្រសប់ផងដែរ ដោយកន្លងមក រូបគេបានអះអាងថា ដោយគ្រាន់តែការបណ្តាក់ទុនលើអចលនទ្រព្យតែមួយមុខ ក៏អាចជួយរកចំណូលដល់រូបគេរហូតដល់ ៣០០លានដុល្លារក្នុងមួយខែ។ ការផ្តោតសំខាន់លើការរកស៊ីនៅទីក្រុងញូវយ៉ក ក៏ព្រោះតែទីនេះជាទីក្រុងមានប្រជាជនច្រើនជាងគេរបស់សហរដ្ឋអាមេរិក និងជាមជ្ឈមណ្ឌលពិភពលោកសម្រាប់វប្បធម៌ ហិរញ្ញវត្ថុ និងប្រព័ន្ធផ្សព្វផ្សាយផងដែរ។ ដូច្នេះគ្មានអ្វីត្រូវឆ្ងល់សម្រាប់ Floyd ដែលគ្រប់គ្នាស្គាល់ថា បុរសចាយលុយដូចក្រដាស ទមា្លក់ការវិនិយោគរាប់រយលានដុល្លារនៅទីនោះ៕ ដកស្រង់ ៖ New York Post, Supercar Blondie, VnExpress និង VIBE
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ