ទីក្រុងវ៉ាស៊ីនតោន៖ លោកត្រាំប្រកាសនៅយប់ថ្ងៃអង្គារថាលោកនឹងដំឡើងពន្ធទ្វេមួយជាពីរ មានន័យថា២៥%ដែលកំពុងនៅជាធរមាននោះនឹងដំឡើងដល់៥០%ទៅលើដែក និងអាលុយមីញ៉ូមរបស់កាណាដា។ លោកថានេះជាវិធានការឆ្លើយតបទៅកាណាដាដែលដំឡើងពន្ធ២៥%ទៅលើភ្លើងអគ្គិសនីនាំចូលពីអាមេរិក។ កាណាដាដំឡើងពន្ធក៏ដោយសារត្រាំដំឡើងពន្ធមុន។ ដូច្នេះ នេះជាការវាយបកគ្នាទៅវិញទៅមក។
លោកត្រាំបង្ហោះនៅលើបណ្ដាញសង្គមទ្រូសសូសល (Truth Social) ថាគាត់បានប្រាប់រដ្ឋមន្ត្រីក្រសួងពាណិជ្ជកម្មដើម្បីដំឡើងពន្ធ២៥%ទៀតទៅលើទំនិញកាណាដាដូចរៀបរាប់ខាងលើនេះ ហើយមិនរង់ចាំយូរទេ។ ពន្ធ៥០%នេះនឹងចូលជាធរមាននៅថ្ងៃស្អែកតែម្ដង។ លោកត្រាំហាក់ដូចជាមានកំហឹងយ៉ាងខ្លាំងនឹងការប្រព្រឹត្តអាកប្បកិរិយាបែបផ្គើនដាក់គាត់។
លោកត្រាំសរសេររៀបរាប់ថាកាណាដាត្រូវតែទម្លាក់ជាបន្ទាន់នូវការដំឡើងពន្ធរបស់ខ្លួនទៅលើទំនិញផលិតពីទឹកដោះគោរបស់អាមេរិកដែលសព្វថ្ងៃមានចន្លោះពី២៥០%-៣៩០%។ លោកចាត់ទុកថាពន្ធហ្នឹងគួរឱ្យក្ដៅក្រហាយមែនទែន។ លោកព្រមានថានឹងប្រកាសអាសន្នជាតិផ្នែកភ្លើងអគ្គិសនីនៅក្នុងតំបន់ដែលរងការគំរាមកំហែងពីការដំឡើងពន្ធរបស់កាណាដា។
ក្រៅពីនេះ លោកត្រាំក៏គំរាមដំឡើងពន្ធឱ្យបានច្រើនឡើងៗទៅលើរថយន្តនាំពីកាណដាចូលទៅអាមេរិកផងដែរ ហើយអនុវត្តចាប់ពីថ្ងៃទី១២ ខែមេសាតទៅ។ លោកបញ្ជាក់ឡើងវិញថាលោកនឹងអនុវត្តវិធីនេះបើកាណាដានៅតែមិនព្រមទម្លាក់ការដំឡើងពន្ធរបស់ខ្លួនទៅលើទំនិញរបស់អាមេរិក។ មានន័យថាលោកទុកពេលមួយខែឱ្យកាណាដាគិតគូរពិចារណាចំពោះរឿងនេះ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ