សង្គ្រាមអ៊ុយក្រែន ៖ នេះជាការវាយប្រហាររបស់អ៊ុយក្រែនដ៏សំខាន់បំផុតមួយលើដែនដីរុស្ស៊ីតាំងពីចាប់ផ្ដើមសង្គ្រាមមក។ កាលពីយប់ថ្ងៃទី១០ មក១១ មីនា មានការវាយប្រហារដ៏ធំប្រើដ្រូនច្រើនរយគ្រឿងសំដៅក្រុងមូស្កូនិងតំបន់រុស្ស៊ីជាច្រើន បណ្ដាលឲ្យមនុស្សយ៉ាងតិចម្នាក់ស្លាប់ ដែលការវាយប្រហារនោះធ្វើឡើង ខណៈសល់ពេលប៉ុន្មានម៉ោងទៀត…
សង្គ្រាមអ៊ុយក្រែន ៖ នេះជាការវាយប្រហាររបស់អ៊ុយក្រែនដ៏សំខាន់បំផុតមួយលើដែនដីរុស្ស៊ីតាំងពីចាប់ផ្ដើមសង្គ្រាមមក។ កាលពីយប់ថ្ងៃទី១០ មក១១ មីនា មានការវាយប្រហារដ៏ធំប្រើដ្រូនច្រើនរយគ្រឿងសំដៅក្រុងមូស្កូនិងតំបន់រុស្ស៊ីជាច្រើន បណ្ដាលឲ្យមនុស្សយ៉ាងតិចម្នាក់ស្លាប់ ដែលការវាយប្រហារនោះធ្វើឡើង ខណៈសល់ពេលប៉ុន្មានម៉ោងទៀត ចាប់ផ្ដើមការចរចានៅអារ៉ាប៊ីសាអូឌីត រវាងតំណាងអ៊ុយក្រែន និងតំណាងអាមេរិក។
អភិបាលក្រុងមូស្គូលោកស័រហ្គេយសូប៊ីយ៉ានីនថ្លែងតាមតេឡេក្រាមថា កងការពារអាកាសនៃក្រសួងការពារប្រទេស បានរុញច្រានការវាយប្រហារដោយហ្វូងដ្រូនអ៊ុយក្រែន សំដៅក្រុងមូស្គូនាវេលាម៉ោងដំបូងនៃពេលព្រឹក។ លោកបន្តថា បណ្ដាអ្នកឯកទេសខាងសង្គ្រោះបានធ្វើការនៅតាមបណ្ដាកន្លែងមានបំំណែកដ្រូនធ្លាក់។
រុស្សុីគូសបញ្ជាក់ថា បានបាញ់ទម្លាក់ដ្រូនអ៊ុយក្រែន៣៣៧គ្រឿង នៅលើតំបន់ជាច្រើន ក្នុងនោះ៩១គ្រឿងក្នុងតំបន់ក្រុងមូស្គូ។ នេះជាការអះអាងរបស់ក្រសួងការពារប្រទេសរុស្សុីក្នុងសេចក្ដីប្រកាសមួយ។ អភិបាលតំបន់ក្រុងមូស្គូលោកអានដ្រេវូ៉រ៉ូប៊ីអូវ រាយការណ៍ពីមនុស្សម្នាក់ស្លាប់និង៣នាក់ទៀតរងរបួសក្នុងការវាយប្រហារ លើមូលដ្ឋាន២ស្ថិតក្នុងតំបន់ជាយក្រុងខាងត្បូងនៃក្រុងមូស្គូ។
នៅតំបន់ក្រុងបែលហ្គោរ៉ូដជាប់ព្រំដែនជាមួយអ៊ុយក្រែន ក៏កើតមានការវាយប្រហារដោយដ្រូនពីសំណាក់កងទ័ពអ៊ុយក្រែនដែរ តែមិនបណ្ដាលឲ្យមានជនរងគ្រោះឡើយ។ ដ្រូន១គ្រឿងក៏ត្រូវបាញ់ទម្លាក់ដែរក្នុងតំបន់វ្ល៉ាឌីមៀរខាងកើតក្រុងមូស្គូ។ បណ្ដាសារព័ត៌មានរុស្សុីបានផ្សាយរូបភាពនៃបណ្ដាអគារស្នាក់នៅរងការប៉ះពាល់ដោយបំណែកដ្រូន ជាមួយការបែកកញ្ចក់ឬការធ្លុះដំបូល។ ព្រលានយន្តហោះអន្តរជាតិមួយនៃក្រុងមូស្គូបានផ្អាកការហោះហើររបស់បណ្ដាយន្តហោះ ហើយព្រលានយន្តហោះក្រុងមូស្គូ៣ទៀតក៏រិតត្បិតការហោះហើរដែរ។
ការវាយប្រហារដោយដ្រូនក្នុងទ្រង់ទ្រាយធំនេះពិសេសលើតំបន់ក្រុងមូស្គូធ្វើឡើងពេលអ៊ុយក្រែនរៀបចំខ្លួន សម្រាប់ការចរចាដ៏សំខាន់ជាមួយអាមេរិកនៅអារ៉ាប៊ីសាអីឌីតនាថ្ងៃទី១១មីនា។ ការចរចានោះសំដៅស្វែងរកមធ្យោបាយបញ្ចប់សង្គ្រាមនិងក៏ដើម្បីស្ដារឡើងវិញនៃទំនាក់ទំនងរវាងក្រុងគៀវនិងក្រុងវ៉ាសិុនតោន ក្រោយភាពល្អក់កករខ្លាំងដោយសារការប៉ះទង្កិចពាក្យសម្ដីគ្នាធ្ងន់រវាងប្រធានាធិបតីអាមេរិកនិងសមភាគីអ៊ុយក្រែន៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ