ប្រទេសជប៉ុន ៖ កីឡាករបាល់ទាត់ជប៉ុន Kota Yamada ត្រូវបានក្លិបបញ្ចប់កិច្ចសន្យាមុនកំណត់ បន្ទាប់ពីរូបគេបានផ្ញើសារមិនសមរម្យទៅកាន់ប្រពន្ធមិត្តរួមក្រុមដល់ទៅពីរនាក់ តាមបណ្តាញទំនាក់ទំនងសង្គម។ ខ្សែបម្រើ Kota…
ប្រទេសជប៉ុន ៖ កីឡាករបាល់ទាត់ជប៉ុន Kota Yamada ត្រូវបានក្លិបបញ្ចប់កិច្ចសន្យាមុនកំណត់ បន្ទាប់ពីរូបគេបានផ្ញើសារមិនសមរម្យទៅកាន់ប្រពន្ធមិត្តរួមក្រុមដល់ទៅពីរនាក់ តាមបណ្តាញទំនាក់ទំនងសង្គម។
ខ្សែបម្រើ Kota Yamada បានចែកផ្លូវជាមួយក្លិប Gamba Osaka នៅលីគកំពូលជប៉ុន J1 League ដើម្បីចូលរួមជាមួយក្លិបរួមលីគ Yokohama FC កាលពីចុងខែកុម្ភៈកន្លងទៅថ្មីៗនេះ។ ទោះយ៉ាងណាក៏ដោយ យោងតាមទស្សនាវដ្តីជប៉ុន Friday Digital កាលពីថ្មីៗនេះ បានរាយការណ៍ថា ការចាកចេញរបស់ Yamada មិនមែនជាការផ្ទេរធម្មតានោះទេ ដោយបានផ្សារភ្ជាប់ទៅនឹងរឿងដ៏ចម្រូងចម្រាសមួយ។
ខ្សែបម្រើវ័យ២៥ឆ្នាំរូបនេះ ត្រូវបានរាយការណ៍ថាបានផ្ញើសារមិនសមរម្យទៅកាន់ប្រពន្ធមិត្តរួមក្រុមដល់ទៅពីរនាក់របស់ខ្លួនតាមបណ្តាញសង្គម ហើយក្រុមទាំងមូលបានដឹងអំពីរឿងនេះ។ ជាលទ្ធផល Yamada ត្រូវបានដកឈ្មោះចេញពីក្រុម ស្របពេលដែលក្លិប Gamba Osaka គ្មានជម្រើសផ្សេងក្រៅពីដាក់ពិន័យកីឡាកររូបនេះឡើយ។
ដំបូងឡើយ ក្លិបគ្រោងគ្រោងបញ្ចប់កិច្ចសន្យារបស់ Yamada ដោយសម្ងាត់ ប៉ុន្តែទោះជាយ៉ាងណាក៏ដោយ ទីបំផុតពួកគេបានជ្រើសរើសការប្រកាសជាផ្លូវការលើគេហទំព័រ ព្រមទាំងបណ្តាញសង្គម X តែម្តង។ ក្លិបបានប្រកាសដូច្នេះថា «យើងសូមបញ្ជាក់ថា Kota Yamada ដែលជាកីឡាកររបស់យើងបានបង្កបញ្ហាដល់អ្នកដទៃ តាមរយៈការប្រើប្រាស់បណ្តាញសង្គមដោយមិនសមរម្យ។ Yamada បានទទួលការព្រមានយ៉ាងខ្លាំង ហើយបន្ទាប់ពីការពិភាក្សាជាច្រើនដង យើងបានសម្រេចថា គេនឹងចាកចេញពីក្រុម»។
កើតនៅឆ្នាំ ១៩៩៩ ខ្សែបម្រើ Kota Yamada ធ្លាប់ត្រូវបានចាត់ទុកថាជាយុវជនដ៏មានទេពកោសល្យក្នុងវិស័យបាល់ទាត់ជប៉ុន។ កីឡាកររូបនេះ គឺជាផ្នែកមួយដ៏សំខាន់នៃក្រុមជម្រើសជាតិជប៉ុនអាយុក្រោម២០ឆ្នាំ សម្រាប់ការប្រកួតបាល់ទាត់ពិភពលោក U20 ឆ្នាំ ២០១៩ ។ Yamada បានបង្ហាញខ្លួនជាលើកដំបូងនៅលីគកំពូលជប៉ុនជាមួយនឹងក្រុម Yokohama F. Marinos កាលពីឆ្នាំ ២០១៨។
ក្រោយមករូបគេបានទៅចូលរួមជាមួយ Nagoya Grampus និង Shimizu S-Pulse មុនពេលផ្លាស់ទៅ Kashiwa Reysol ក្នុងកាលពីឆ្នាំ ២០២៣។ កាលពីរដូវកាលមុន Kota Yamada បានលេងឱ្យក្រុម Gamba Osaka ដោយបង្ហាញខ្លួន២៣ប្រកួត ស៊ុតបញ្ចូលទីបាន៤គ្រាប់ ជួយឱ្យក្រុមបញ្ចប់នៅក្នុងចំណាត់ថ្នាក់លេខ៤ នៃលីគកំពូលជប៉ុន។ កីឡាករ Kota Yamada ក៏ត្រូវបានរាយការណ៍ថាបានរៀបការរួចហើយ ព្រមទាំងមានកូនផងដែរ៕ ប្រភព ៖ VnExpress
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ