ក្រោយពេលដែលពលរដ្ឋរអ៊ូរទាំច្រើនរឿងបិទផ្លូវយូរ ពេលមានក្បួនថ្នាក់ដឹកនាំជាតិ និងអន្តរជាតិឆ្លងកាត់ រហូតដល់កកស្ទះដល់ប្រតិបត្តិការរថយន្តសង្គ្រោះដែលកំពុងតែដឹកអ្នកជំងឺដង្ហក់រង់ចាំការសង្គ្រោះជីវិតបានដឹងដល់ថ្នាក់ដឹកនាំហើយ ។ ក្រោយពេលដែលទទួលបានព័ត៌មានដ៏រសើបបែបនេះសារបញ្ជាជាសំឡេងដ៏កម្រត្រូវបានចេញ នៅថ្ងៃទី០៩ ខែមីនា ឆ្នាំ២០២៥ ដោយប្រមុខរដ្ឋាភិបាល…
ក្រោយពេលដែលពលរដ្ឋរអ៊ូរទាំច្រើនរឿងបិទផ្លូវយូរ ពេលមានក្បួនថ្នាក់ដឹកនាំជាតិ និងអន្តរជាតិឆ្លងកាត់ រហូតដល់កកស្ទះដល់ប្រតិបត្តិការរថយន្តសង្គ្រោះដែលកំពុងតែដឹកអ្នកជំងឺដង្ហក់រង់ចាំការសង្គ្រោះជីវិតបានដឹងដល់ថ្នាក់ដឹកនាំហើយ ។
ក្រោយពេលដែលទទួលបានព័ត៌មានដ៏រសើបបែបនេះសារបញ្ជាជាសំឡេងដ៏កម្រត្រូវបានចេញ នៅថ្ងៃទី០៩ ខែមីនា ឆ្នាំ២០២៥ ដោយប្រមុខរដ្ឋាភិបាល ដោយបានណែនាំសមត្ថកិច្ចនគរបាលចរាចរណ៍ឲ្យសម្រួលរថយន្តសង្គ្រោះដែលមានអ្នកជំងឺពិតប្រាកដកំពុងតែស្ថិតនៅលើនោះអាចធ្វើដំណើរបន្តបានដោយធម្មតា ហើយព្យាយាមសម្របសម្រួលចរាចរណ៍កុំអោយមានការកកស្ទះខ្លាំង និងមិនត្រូវបិទផ្លូវយូរពេកដែរ ។
សក្ខីកម្មនេះយើងអាចមើលឃើញ នៅពេលដែលប្រមុខរដ្ឋាភិបាល សម្តេចធិបតី ហ៊ុន ម៉ាណែត បានចេញសារបញ្ជាជាសំឡេងដ៏កម្រដល់កម្លាំងសមត្ថកិច្ច ពិសេសនគរបាលចរាចរណ៍ឲ្យពិនិត្យឡើងវិញករណីបិទចរាចរណ៍រថយន្ដសង្គ្រោះបន្ទាន់ ដែលកំពុងដឹកអ្នកជំងឺទៅកាន់មន្ទីរពេទ្យនៅពេលមានក្បួនឆ្លងកាត់ផ្លូវសាធារណៈម្តងៗ ។
សម្តេចធិបតី បានបញ្ជាក់ថា ការងារសន្តិសុខសម្រាប់ការពារថ្នាក់ដឹកនាំជាតិ និងអន្តរជាតិ មិនមែនជារឿងងាយស្រួលទេ ។ សម្តេចក៏យល់ច្បាស់អំពីការលំបាកនេះក្នុងអំឡុងពេល បំពេញភារកិច្ចតាមតួនាទី ក្នុងការធានាតុល្យភាពនៃការការពារសុវត្ថិភាពជូនថ្នាក់ដឹកនាំជាតិ និងអន្តរជាតិជាមួយនឹងការសម្រួលសកម្មភាពជូនប្រជាពលរដ្ឋ នៅក្នុងតំបន់ការពារសុវត្ថិភាពមួយចំនួន ។
ប៉ុន្តែទោះជាយ៉ាងនេះក្តី ការអនុវត្តភារកិច្ចដោយម៉ឺងម៉ាត់ និងម៉ត់ចត់ ប្រកបដោយភាពបត់បែនទៅតាមករណីចាំបាច់នីមួយៗ ជាពិសេសករណីពាក់ព័ន្ធជាមួយការសង្គ្រោះអាយុជីវិតរបស់ប្រជាពលរដ្ឋ ជាកិច្ចការដែលយើងត្រូវខិតខំបន្តរួមគ្នាធ្វើ ដើម្បីកាត់បន្ថយផលប៉ះពាល់ដល់ប្រជាពលរដ្ឋ ។ សម្តេចធិបតី ក៏បានគូសបញ្ជាក់ថា ទន្ទឹមនឹងការអនុញ្ញាតឲ្យរថយន្ដសង្គ្រោះបន្ទាន់ឆ្លងកាត់នៅពេលមានក្បួនថ្នាក់ដឹកនាំជាតិ និងអន្ដរជាតិនោះសមត្ថកិច្ចនៅគោលដៅនោះក៏ត្រូវពិនិត្យឲ្យបានច្បាស់លាស់ថា នៅក្នុងរថយន្ដសង្គ្រោះបន្ទាន់នោះ តើមានអ្នកដែលត្រូវសង្គ្រោះមែនឫអត់ ព្រោះខ្លាចមានការលួចបន្លំប្រើប្រាស់រថយន្ដសង្គ្រោះ ដើម្បីធ្វើសកម្មភាពផ្សេងៗប៉ះពាល់ដល់សុវត្ថិភាពថ្នាក់ដឹកនាំ ។
ជាមួយគ្នានេះ ប្រមុខរដ្ឋាភិបាល ក៏បានណែនាំទៀតថា នៅពេលបិទចរាចរណ៍ថ្នាក់ដឹកនាំឆ្លងកាត់រួចរាល់ហើយនោះ សមត្ថកិច្ច ពិសេសនគរបាលចរាចរណ៍ត្រូវសម្រួលដល់ប្រជាពលរដ្ឋទូទៅកុំឲ្យនៅកកស្ទះយូរពេក ព្រោះទាំងប្រជាពលរដ្ឋ និងថ្នាក់ដឹកនាំ សុទ្ធតែមានធុរៈរៀងៗខ្លួន ។ លើសពីនេះនៅពេលបិទក្បួនថ្នាក់ដឹកនាំមិនគួរបិទយូរពេកនោះទេ ពោលមុនក្បួនបន្ដិច ហើយក្បួនឆ្លងកាត់រួចត្រូវបើកដំណើរការឡើងវិញ ។
ជាមួយគ្នានោះ សម្តេចធិបតីក៏បានថ្លែង សូមការយោគយល់អំពីប្រជាពលរដ្ឋ ដែលទោះបីជាបងប្អូនសមត្ថកិច្ចខិតខំប្រឹងប្រែងកាត់បន្ថយផលប៉ះពាល់ជាអតិបរមាយ៉ាងណាក៏ដោយ ក៏ពេលខ្លះមិនអាចជៀសផុតពីការរំខានដល់លំហូរចរាចរណ៍រយៈពេលខ្លីនៅតាមផ្លូវសាធារណៈមួយចំនួនដែរ ។ សារជាសំឡេងនេះចេញ ក្រោយពេលដែលសម្តេចផ្ទាល់បានឃើញនូវវីដេអូមួយដែលត្រូវបានគេចែកចាយនៅតាមបណ្ដាញសង្គមនៅក្នុងអំឡុងពេលសមត្ថកិច្ចបិទចរាចរណ៍ នៅពេលមានក្បួនថ្នាក់ដឹកនាំឆ្លងកាត់ដែលបណ្តាលឲ្យរថយន្តសង្គ្រោះដែលកំពុងតែដឹកអ្នកជំងឺត្រូវស្ទះ ។
រឿងបិទចរាចរណ៍នេះមហាជនទូទៅបានរអ៊ូរទាំយូរហើយ ដោយពេលខ្លះនៅកណ្តាលថ្ងៃត្រង់ក្តៅហែង ពួកគេត្រូវបានសមត្ថកិច្ចបិទរហូតដល់កន្លះម៉ោងក៏មាន ។ នរណាមិនខឹង នរណាមិនក្តៅក្រហាយ ដែលមេឃកំពុងតែក្តៅខ្លាំងត្រូវមកឈប់ស្ងៀមកណ្តាលថ្ងៃក្តៅចេសបែបនេះ ។ ពេលខ្លះទៀតវារឹតតែធ្វើឲ្យពលរដ្ឋក្តៅក្រហាយថែមទៀត នៅពេលដែលពួកគេកំពុងតែដឹកកូនតូចៗហើយត្រូវជាប់កណ្តាលផ្លូវក្រោមកំដៅដ៏ក្តៅ ក្មេងយំពេញផ្លូវ។
រឿងសន្តិសុខថ្នាក់ដឹកនាំធំៗ ដែលមានច្បាប់មានទម្លាប់ត្រឹមត្រូវ គឺមិនថ្វីប៉ុន្មានឡើយ រឿងដែលពលរដ្ឋក្តៅថែមទៀត គឺក្រុមមន្ត្រីមួយចំនួន ដែលមានឋានៈ និងតួនាទី មិនដល់ថ្នាក់អាចបិទចរាចរណ៍បានផងនោះក៏ត្រូវបានបិទដែរ ។ រឿងដែលរឹតតែក្តៅទៀតនោះ គឺថា ពេលដែលបិទហើយ សមត្ថកិច្ចមួយចំនួនមិនព្យាយាមសម្រួលចរាចរណ៍ឡើងវិញសិនទេ។ គ្រាន់តែក្បួនរថយន្តមេចេញបាត់ គឺពួកគេដើរចេញភ្លាមៗដែលនាំឲ្យចរាចរណ៍ច្របូកច្របល់កកស្ទះក៏មានជាបន្តបន្ទាប់ដែរ ។
សកម្មភាពទាំងនេះហើយ ដែលធ្វើឲ្យពលរដ្ឋកាន់តែថ្នាំងថ្នាក់នៅក្នុងអារម្មណ៍កាន់តែច្រើនឡើងៗ ដូច្នេះហើយការដែលនាយករដ្ឋមន្ត្រីចេញជាសារសំឡេងនេះឡើងសង្ឃឹមថា សមត្ថកិច្ចពាក់ព័ន្ធនឹងពិនិត្យស្ថានការណ៍ហើយ និងសម្របសម្រួលចរាចរណ៍ឲ្យកាន់តែមានប្រសិទ្ធភាព ៕
ចែករំលែកព័តមាននេះ