សំនួរដ៏ឈឺក្បាលសម្រាប់អ្នកទៅញ៉ាំការម្តងៗ មិនមែនជាសំនួរដែលតែងតែសួរគ្នានៅកម្ពុជានោះទេ សំនួរនេះក៏ត្រូវបានពលរដ្ឋវៀតណាមសាកសួរដូចគ្នា ខណៈម្ចាស់ការចង់ឲ្យភ្ញៀវចងដៃច្រើន តែភ្ញៀវម្នាក់ៗចង់ចងដៃតិច ដោយសារតែម្នាក់ៗការច្រើនរោង ហើយថ្លៃជីវភាពប្រចាំថៃ្ងក៏ខ្ពស់ ។ នៅក្នុងអំឡុងពេលនេះជារដូវដែលពលរដ្ឋពេញនិយម រៀបចំពិធីអាពាហ៍ពិពាហ៍បំផុត…
សំនួរដ៏ឈឺក្បាលសម្រាប់អ្នកទៅញ៉ាំការម្តងៗ មិនមែនជាសំនួរដែលតែងតែសួរគ្នានៅកម្ពុជានោះទេ សំនួរនេះក៏ត្រូវបានពលរដ្ឋវៀតណាមសាកសួរដូចគ្នា ខណៈម្ចាស់ការចង់ឲ្យភ្ញៀវចងដៃច្រើន តែភ្ញៀវម្នាក់ៗចង់ចងដៃតិច ដោយសារតែម្នាក់ៗការច្រើនរោង ហើយថ្លៃជីវភាពប្រចាំថៃ្ងក៏ខ្ពស់ ។
នៅក្នុងអំឡុងពេលនេះជារដូវដែលពលរដ្ឋពេញនិយម រៀបចំពិធីអាពាហ៍ពិពាហ៍បំផុត ប៉ុន្តែដោយសារតែម្នាក់ៗទទួលសំបុត្រអញ្ជើញវាច្រើនពេក ហើយចំពេលដែលដំណើរ និងសកម្មភាពរកលុយវារាងពិបាកផងនោះម្នាក់ៗកំពុងតែរអ៊ូ ។
បុរសម្នាក់បានអះអាងថា ចាប់តាំងពីខែ១២ មកដល់ពេលនេះ អាទិត្យខ្លះលោកត្រូវបានគេអញ្ជើញការរាល់ថ្ងៃ ។ លោកបានបន្តថា ឥឡូវនេះ ឃើញម្ហូបការ គឺលែងចង់ហើយ ។ បុរសវ័យ៤៦ឆ្នាំ រូបនេះបានបន្តថា ប៉ុន្តែអារឿងធ្ងន់ជាងនេះ គឺលុយចំណងដៃ ។ លោកបានបន្តថា ជាធម្មតានៅក្នុងមួយរោងលោកចងដៃ៣០ដុល្លារ នៅក្នុងមួយរោង ប៉ុន្តែពេលនេះសុំតែ២០ដុល្លារទ ដោយសារតែវាច្រើនពេក ។
ស្ត្រីវ័យ៣៦ឆ្នាំមួយរូបទៀត បានលើកឡើងថា ឥឡូវនេះ ទៅការមួយរោងចង២០ដុល្លារអីគេលែងមើលមុខហើយ ប៉ុន្តែធ្វើម៉េចបើវាអត់ ។ លោកស្រី បាននិយាយផង ហើយលេងសើចផងថា ឥឡូវនេះប្រាក់ខែត្រឹម២លានរៀលអី ពេលខ្លះចំណាយតែនៅលើថ្លៃទៅហូបការគេនេះឯង ។ លោកស្រីថា «លុយចង់សន្សំម៉េចក៏មិនសល់ដែរនៅក្នុងរង្វង់ខែ១២ ខែ១ ខែ២អីនេះ សំបុត្រការវាច្រើនពេកដល់ថ្នាក់ឥឡូវខ្ញុំចង់គេចមុខគេគេចមុខឯងហើយ ខ្លាចរឿងគេហៅការនេះតែម្តង »។
រឿងឈឺក្បាលអំពីថ្លៃចំណងដៃការគេនេះមិនមែនឈឺក្បាលតែនៅកម្ពុជានោះទេ សូម្បីតែនៅវៀតណាមថ្មីៗនេះ ក៏សារព័ត៌មានគេចុះផ្សាយថា ពលរដ្ឋវៀតណាមក៏កំពុងតែឈឺក្បាលលើថ្លៃចំណាយរឿងទៅចូលរួមការគេនេះដែរ ។
សារព័ត៌មាន VN Express បានរាយការណ៍ថា សម្រាប់ពលរដ្ឋវៀតណាមនៅពេលនេះពេល បើពួកគេចងដៃ២០ដុល្លារ ត្រូវគេគិតថាវា តិច ប៉ុន្តែប្រសិនបើ៤០ដុល្លារ គឺវាច្រើនពេក នៅក្នុងពេលបច្ចុប្បន្ននេះ ។
ប្រភពដដែលបានដកស្រង់សម្តីរបស់កូនក្រមុំ និងកូនកម្លោះនៅក្នុងប្រទេសក្បែរខាងភាគខាងកើត និងខាងត្បូងកម្ពុជាថា ជាទូទៅពួកគេតែងតែប្រាថ្នាចង់ឲ្យភ្ញៀវម្នាក់គួរចងដៃការពួកគេពី២៥ដុល្លារ ទៅ៣៥ដុល្លារ ។ កូនកម្លោះក្រមុំមួយគូបានអះអាងថា ឥឡូវនេះបើភ្ញៀវចងត្រឹមតែម្នាក់២០ដុល្លារ គឺពួកគេនឹងត្រូវប្រឈមមុខនឹងការខាតបង់ហើយ ។ ដោយឡែក អ្នកដែលត្រូវបានគេអញ្ជើញចូលរួមវិញក៏បានលើកឡើងថា ពួកគេក៏មានអារម្មណ៍តានតឹងដែរ ប៉ុន្តែមិនដឹងធ្វើយ៉ាងម៉េច បើជៀសមិនរួច ។
សារព័ត៌មាននោះបានដកស្រង់សម្តីរបស់ពលរដ្ឋវៀតណាមម្នាក់ថា «ពេលឃើញសំបុត្រអញ្ជើញការម្តងៗខ្ញុំមានអារម្មណ៍ថា តានតឹងណាស់ ។ អ្នកមិនសូវជិតដិតចេះតែគេចៗ ដោយផ្ញើចំណងដៃតិចតួចបាន ប៉ុន្តែបើមិត្តជិតស្និទ្ធអី គឺទៅទាំងតានតឹង »។
ពលរដ្ឋវៀតណាមដដែលនោះ បានលើកឡើងទៀតថា បើប៉ះចំគេអញ្ជើញទៅការកន្លែងធំៗដូចជា សណ្ឋាគារអី គឺរឹតតែតានតឹងថែមទៀតដោយសារចង៥០ម៉ឺនដុង ដែលស្មើនឹង ២០ដុល្លារវាតិចពេក តែបើចងដល់១លានដុល្លារ ឬ៤០ដុល្លារវាច្រើនពេក។
ប្រភពដដែលបានបន្តថា សព្វថ្ងៃនេះ តម្លៃនៃចំណងដៃសម្រាប់ពិធីរៀបការមួយរោងនៅវៀតណាម គឺគួរចង់ដៃពី៧០ម៉ឺន ទៅ៨០ម៉ឺនដុង ពោល គឺប្រហែល២៥ ទៅ៣០ដុល្លារ ៕
ចែករំលែកព័តមាននេះ