ខេត្តស្វាយរៀង ៖ ប្រជាកសិករភូមិគោកតែក ឃុំចន្ទ្រា សប្បាយរីករាយដោយស្រូវប្រាំងរបស់ពួកគាត់ចំនួនជិត២,០០០ហិកតា ល្អមានទិន្នផលខ្ពស់ ហើយដល់ពេលប្រមូលផល មានទីផ្សារល្អលក់បានតម្លៃខ្ពស់ ស្រូវដំណើប ក្នុងគីឡូក្រាមតម្លៃ១,១២០រៀល(លុយដុង៧,៤០០ដុង)នៅស្រុកចន្ទ្រា។…
ខេត្តស្វាយរៀង ៖ ប្រជាកសិករភូមិគោកតែក ឃុំចន្ទ្រា សប្បាយរីករាយដោយស្រូវប្រាំងរបស់ពួកគាត់ចំនួនជិត២,០០០ហិកតា ល្អមានទិន្នផលខ្ពស់ ហើយដល់ពេលប្រមូលផល មានទីផ្សារល្អលក់បានតម្លៃខ្ពស់ ស្រូវដំណើប ក្នុងគីឡូក្រាមតម្លៃ១,១២០រៀល(លុយដុង៧,៤០០ដុង)នៅស្រុកចន្ទ្រា។
បើតាមតំណាងកសិករម្នាក់ឈ្មោះ សាន ស្នា ភេទប្រុស អាយុ៥៥ឆ្នាំ នៅភូមិគោកតែក ឃុំចន្ទ្រា ស្រុកចន្ទ្រា បានប្រាប់កោះសន្តិភាពនៅរសៀលថ្ងៃទី៧ មិនា ឆ្នាំ២០២៥ ថា អ្នកភូមិគោកតែក ធ្វើស្រូវប្រាំងស្រូវបណ្តេញទឹក ដោយប្រើពូជស្រូវដំណើប ដោយស្រូវដំណើប ត្រូវនិងដីភូមិនេះមានជីជាតិអំណោយផល បង្កបង្កើនផលបានទិន្នផលខ្ពស់ ហើយលក់បានតម្លៃថ្លៃជាងស្រូវខ្សាយ។
បុរសរូបនេះបន្តថា គ្រួសាររបស់គាត់មានដីស្រែចំនួន១៥ហិកតា បានច្រូតកាត់ប្រមូលផល អស់១០ហិកតាហើយនៅសល់ចំនួន៥ហិកតាទៀតកំពុងរៀបចំប្រមូលផល់ ហើយស្រូវដំណើបនេះមានទិន្នផលខ្ពស់ក្នុង១ហិកតា ចាប់ពី០៥តោនទៅ០៦តាន ហើយក្នុង១គីឡូក្រាមលក់ឲ្យវៀតណាមផ្ទាល់បានតម្លៃ៧,៤០០ដុង បើគិតជាលុយខ្មែរស្មើ១,១២០រៀលក្នុង១គីឡូ។
ប្រភពបន្តទៀតថា នៅភូមិគោកតែកនេះ ក្នុង១ឆ្នាំធ្វើស្រែបានតែម្តងទេដោយនៅភូមិគោកតែកជាដីទំនាបជាប់តាមបន្ទាត់ព្រំដែន ខែវស្សា ទឹកជនលិច ។ស្រូវដំណើបនេះ គឺយកពូជមកពីប្រទេសវៀតណាម ហើយការចាប់ផ្តើមភ្ជួរាស់ដាស់ដីគឺចាប់ផ្តើមនៅដើមខែ១០ ធ្វើស្រែប្រដេញទឹកខែ១១ (២០២៤) ចាប់ផ្តើមភ្ជួរព្រោះ រហូតមកដល់ខែមិនា ២០២៥នេះស្រូវចាប់ផ្តើមទុំ ច្រូតកាត់ប្រមូលផលបាន។
ប្រភពបន្តទៀតថា ប្រជាកសិករនៅភូមិគោកតែកនេះ ក្នុង០១គ្រួសារ មានដីស្រែចាប់ពី១០ហិកតា ឡើងទៅ ខ្លះមាន១៥ហិកតាខ្លះមាន២០ហិកតា ខ្លះទៀតមានរហូតដល់៤០ទៅ៥០ហិកតាឯណ្ណោះហើយគ្រួសារខ្លះគេមិនធ្វើស្រែខ្លួនឯងទេគឺជួលឲ្យគេធ្វើយកផល។ហើយដីស្រែក្នុងភូមិគោកតែកនេះគឺមានសរុបជិត២,០០០ហិកតា ធ្វើស្រូវដំណើបទាំងអស់ ហើយការប្រើប្រាស់ទឹក គឺអ្នកភូមិបានធ្វើប្រពន្ធ័ទឹកស្រោចស្រប់ដោយខ្លួនឯងនិងបង្កើតក្រុមអ្នកផ្គត់ផ្គង់ទឹកដោយពេលខែប្រាំងត្រូវទិញទឹកពីប្រទេសវៀតណាម ក្នុង១រដូវចំណាយប្រាក់តម្លៃ១០០លានដុង ប្រជាកសិករខ្មែរយើងឈរជាតំណាងបូមទឹកបង្ហូរដាក់តាមប្រឡាយមេរួចចែកចាយគ្នាបង្ហូរដាក់ស្រែនិងបូមដាក់ស្រែរៀងៗខ្លួន គិតតាមចំនួនដីស្រែ( គឺយក១០០លានដុងចែកនិងដីស្រែ ជិត២,០០០ហិកតា)រួចបង់ប្រាក់តាមចំនួនដី។
ហើយពេលប្រមូលផលឈ្មួញវៀតណាមចូលមកប្រមូលទិញដល់ស្រែតែម្តងគឺច្រូតកាត់ហើយថ្លឹងលក់នៅក្នុងស្រែតែម្តង ហើយបើគិតទូទាត់លើការចំណាយដើមទុនទៅលើការភ្ជួររាស់ព្រោះស្រូវ ពូជ ជីនិងថ្នាំការពារសត្វចង្រៃ និងទឹក ថ្លៃច្រូតកាត់ ក៏នៅចំណេញប្រាក់សុទ្ធក្នុង១ហិកតា ១ពាន់ដុល្លារដែរ។
ប្រភពបន្តថា បើប្រៀបធៀបពីអតីតៈកាលនៅឆ្នាំ១៩៨០មកដល់ឆ្នាំ២០១០ប្រជាពលរដ្ឋរស់នៅភូមិគោកតែកនេះមានជីវភាពក្រីក្រលំបាកខ្លាំង រស់នៅផ្ទះខ្ទនបិទដី ផ្ទះឈើ តូចតាបក៏បន្តែមកដល់បច្ចុប្បន្នប្រពលរដ្ឋភូមិគោកតែកបានអភិវឌ្ឍន៍ជីវភាពធូធា ល្អប្រសើរ មានផ្ទះថ្មក្រោមឈើលើ មានផ្ទះវីឡាតឿ ផ្ទះវីឡារស់នៅ មានឡាន មានម៉ូតូជិះគ្រប់ផ្ទះនិងមានត្រាក់ទ័រ ប្រើប្រាស់ធ្វើស្រែ៕
ចែករំលែកព័តមាននេះ