ADផ្ទាំងផ្សព្វផ្សាយពាណិជ្ជកម្ម

ម្ចាស់ភោជនីយដ្ឋានចេញឃ្លីបវីដេអូសុំទោ.ស ក្រោយប្រើបំពង់ពន្លត់អគ្គិភ័យ និងទុយោទឹកបា.ញ់លើអ្នកលក់ទឹកអំពៅ និងកង្កែបបោប

18 ម៉ោង មុន

ភ្នំពេញ
០៩ ខែ មីនា ឆ្នាំ ២០២៥ ម៉ោង ០៩:៤៥

ភ្នំពេញ៖ ម្ចាស់ភោជនីយដ្ឋានជ័យជម្នះ២នាក់បានប្រើអំពើហិង្សាទៅលើអ្នកលក់ទឹកអំពៅនិងកង្កែបបោបអាំង ដែលបានដាក់លក់ដូរបន្តិចបន្តួចគ្រាន់និងរស់ នៅលើចិញ្ចើមផ្លូវជាតិលេខ ស្ថិតនៅចំណែកផ្លូវម្ខាងទៀតទល់មុខភោជនីយដ្ឋានរបស់ខ្លួន គឺរំលង១ផ្លូវរណបទើបដល់ភោជនីយដ្ឋាននោះ ។ ប៉ុន្តែម្ចាស់ភោជនីយដ្ឋានខាងលើបានហាមឃាត់មិនឲ្យដាក់លក់ ទើបមានទំនាស់ពាក្យសម្ដីគ្នារហូតដល់កើតជាអំពើហិង្សា ដោយម្ចាស់ភោជនីយដ្ឋាននោះ…

ទង្វើនេះត្រូវបានមហាជនចាត់ទុកថាអសីលធម៌ ដែលបានកើតឡើង បង្កឲ្យមានការភ្ញាក់ផ្អើល កាលពីថ្ងៃទី០៧ ខែមីនា ឆ្នាំ២០២៥ នៅចំណុចផ្សារបុរីពិភពថ្មី ផ្លូវជាតិលេខ៤ ស្ថិតនៅក្នុងភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ ។

ថ្វីដ្បិតតែមិនបានបណ្ដាលឲ្យមានការរងរបួសស្នាមក៏ពិតមែន ប៉ុន្តែបានបញ្ជាក់ប្រាប់អំពីទង្វើរបស់ជនបង្កដែលអាងខ្លួនជាអ្នកមានប្រាក់ មានមុខរបរធំដុំ បែរជាធ្វើបាបអ្នកក្រីក្រគ្រាន់តែលក់ដូរបន្តិចបន្តួចចិញ្ចឹមឆ្នាំង ហើយលក់តែលើចិញ្ចើមផ្លូវសាធារណៈទៀត មិនបានប៉ះពាល់ដល់ទីតាំងរបស់ខ្លួនផង ។ មិនតែប៉ុណ្ណោះបានបង្កឲ្យទឹកអំពៅនិងកង្កែបបោប ព្រមទាំងអ្នកលក់ រងការប្រឡាក់ប្រឡូកទៅដោយធូលីនិងកម្ទេចម្សៅបំពង់ពន្លត់អគ្គិភ័យសក្បុសបណ្ដាលឲ្យខូចខាតមិនអាចលក់ដូរបានឡើយ ហើយអតិថិជនដែលទៅទិញទឹកអំពៅនិងកង្កែបបោបក៏រត់ចេញជាន់ជើងគ្នា ព្រមទាំងប៉ះពាល់ដល់អ្នកដំណើរតាមផ្លូវថែមទៀត ។

ម្ចាស់ភោជនីយដ្ឋានជ័យជម្នះខាងលើនោះម្នាក់ឈ្មោះ ប៊ុន វ៉ាន់សៃ ភេទប្រុស អាយុ៤៨ឆ្នាំ និងម្នាក់ទៀតឈ្មោះកែវ សាវុធ ភេទប្រុស អាយុ ៤៥ឆ្នាំ ។ នគរបាលខណ្ឌកំបូលមិនបានឃាត់ខ្លួនបុគ្គល២នាក់នេះទេ ប៉ុន្តែបានហៅទៅសួរនាំនិងធ្វើកិច្ចសន្យាឲ្យបញ្ឈប់សកម្មភាពតទៅទៀត ចំណែកអ្នកលក់ទឹកអំពៅនិងកង្កែបបោបអាំងរងគ្រោះខាងលើឈ្មោះ ហួត ដាវី ។

បើតាមប្រជាពលរដ្ឋបាននិយាយថា ជនរងគ្រោះមិនបានទៅដាក់លក់នៅផ្ទាល់និងមុខភោជនីយដ្ឋានជ័យជម្នះខាងលើនោះ ដែលនាំឲ្យមានការរំខានដល់ការរកស៊ីរបស់ម្ចាស់ភោជនីយដ្ឋាននោះឡើយ គឺពួកគាត់បានដាក់លក់នៅចិញ្ចើមផ្លូវផ្នែកម្ខាងទៀត បើមើលជាក់ស្ដែងគឺរំលងផ្លូវរណបផ្លូវជាតិលេខ៤ ទើបដល់ភោជនីយដ្ឋាននោះ ។ ប៉ុន្តែម្ចាស់ភោជនីយដ្ឋានអាងវ៉ាងហាមឃាត់មិនឲ្យដាក់លក់ឡើយ ធ្វើដូចជាផ្លូវខាងលើជាកម្មសិទ្ធិផ្ដាច់មុខរបស់ខ្លួនអ៊ីចឹង ហើយបើទោះបីជាភោជនីយដ្ឋានរបស់ខ្លួនកំពុងបើកដំណើរការលក់ ឬក៏ផុតម៉ោងលក់បិទទ្វារទៅហើយក៏ដោយ ក៏មិនឲ្យដាក់លក់នៅចំណុចនោះដែរ ។

ប្រជាពលរដ្ឋបាននិយាយទៀតថា ម្ចាស់ភោជនីយដ្ឋាននេះខ្លាំងជាងអាជ្ញាធរទៅទៀត ព្រោះតែអាជ្ញាធរមិនឈឺឆ្អាលដេញចេញផង ដោយសារតែមានការអាណិតអាសូរដល់ប្រជាពលរដ្ឋក្រីក្រឲ្យពួកគាត់លក់ដូរបន្តិចបន្តួចគ្រាន់បាន ប្រាក់ចិញ្ចឹមឆ្នាំង ។ ម្យ៉ាងទៀតអ្នកលក់ដូរទាំងនោះមិនបានបង្កផលប៉ះពាល់ដល់អ្នកដទៃឡើយ តែបែរជាម្ចាស់ភោជនីដ្ឋានខាងលើ ដែលទីតាំងខណ្ឌចែកដោយដងផ្លូវសោះ ឈឺឆ្អាលហាមឃាត់មិនឲ្យដាក់លក់ទៅវិញ ។ ទើបបង្កឲ្យមានការឈ្លោះប្រកែកគ្នាកើតឡើង ហើយម្ចាស់ភោជនីយដ្ឋាននោះបានតាមរករឿងនិងប្រើអំពើហិង្សាយកបំពង់ពន្លត់អគ្គិភ័យនិងទុយោទឹកបាញ់ទៅលើអ្នកលក់ទឹកអំពៅនិងកង្កែបបោបតាមរបៀបអសីលធម៌បែបនេះតែម្ដង ។ ប៉ុន្តែក្រោយពីមានការរិះគន់ពីមហាជនជាច្រើនតាមបណ្ដាញសង្គមហ្វេសប៊ុក ម្ចាស់ភោជនីយដ្ឋានជ័យជម្នះនោះបានចេញឃ្លីបវីដេអូសុំទោសដល់សាធារណៈជន និងសន្យាថា ពួកខ្លួននិងឈប់ធ្វើទង្វើអាក្រក់បែបនេះទៀតហើយ ។

នគរបាលខណ្ឌកំបូលបានប្រាប់ឲ្យដឹងថា បន្ទាប់ពីមានហេតុការនោះកើតឡើង នៅវេលាព្រឹកថ្ងៃទី០៨ ខែមីនា ឆ្នាំ២០២៥ សមត្ថកិច្ចប៉ុស្តិ៍នគរបាលរដ្ឋបាលកន្ទោក នៃអធិការដ្ឋាននគរបាលខណ្ឌកំបូល បានអញ្ជេីញម្ចាស់ភោជនីយដ្ឋានខាងលើទៅធ្វើការសួរនាំទាំង២នាក់ ។ ខណៈនោះបានដឹងថា ម្នាក់ឈ្មោះ ប៊ុន វ៉ាន់សៃ ភេទប្រុស អាយុ៤៨ឆ្នាំ និងម្នាក់ទៀតឈ្មោះ កែវ សាវុធ ភេទប្រុស អាយុ៤៥ឆ្នាំ បានទាស់ពាក្យសម្ដីគ្នាជាមួយអាជីវករឈ្មោះ ហួត ដាវី ដែលលក់ដូរនៅទល់មុខនោះ រួចក៏យកបំពង់ពន្លត់អគ្គិភ័យ និងទុយោទឹក ទៅបាញ់លើអាជីវករឈ្មោះ ហួត ដាវី តែម្ដង ។

នគរបាលខណ្ឌកំបូលបានប្រាប់ឲ្យដឹងបន្តទៀតថា ម្ចាស់ភោជនីយដ្ឋាននោះក៏បានដឹងនិងទទួលស្គាល់កំហុសរបស់ខ្លួន ហើយបានសុំទោសជាសាធារណៈ បន្ទាប់មកនគរបាលបានធ្វើកំណត់ហេតុ ហើយធ្វើការណែនាំនិងធ្វើកិច្ចសន្យាឲ្យម្ចាស់ភោជនីយដ្ឋាននោះបញ្ឈប់សកម្មភាពអាក្រក់ដូចខាងក្រោម៖

ម្ចាស់ភោជនីយដ្ឋានជ័យជម្នះឈ្មោះ ប៊ុន វ៉ាន់សៃ និងឈ្មោះ កែវ សាវុធ ត្រូវបញ្ឈប់ការបាញ់ទឹក និងយកបំពង់ពន្លុតអគ្គិភ័យ ឬធ្វើអ្វីមួយដែលបង្កឲ្យប៉ះពាល់ដល់កិត្តិយស និងសេចក្ដីថ្លៃថ្នូរអាជីវករលក់ដូរនៅទល់មុខផ្នែកខាងជើងផ្លូវ និងបង្កការប៉ះពាល់ដល់សុខមាភាពរបស់បងប្អូនប្រជាពលរដ្ឋដែលធ្វើដំណើរតាមផ្លូវសាធារណៈបន្តទៀត ។ ក្នុងករណីមិនព្រមអនុវត្តន៍តាមការណែនាំខាងលើនោះទេ នគរបាលនិងចាត់ការតាមនិតិវិធីច្បាប់ ៕